Aso pa'atec soua siete na'anaxanaqtel qataq soua siete nasheerel
1Qaq se'eso Qagueta Llalec can ivita da nqat aso pa'atec soua siete na'anaxanaqtel, nache 'enauac na piguem ỹataqta ntochiguiñi, ivi' media hora.
2Ime, nache sauaachigui se'esoua siete namaxa'she piguem lashe' da qoỹami' ñi 'oonolec ana nasheere, qaq soomaye nachattrañi datataua'alo Ñim Lo'onatac 'Enauacna. 3Ime, qataq anac so lỹa namaxashec piguem le'ec, nasoqta'a aso 'eeta'am ana ỹomaxaqui late'erai maye chegaqaigui na oro, qaq asomaye huetagui so qalota nchenaxanaxat maye ama na laita, da yaqto' ỹavigaxat da datato'ot aso nca'atoxonaxalate, lỹateuo naqa'en da nqouagaxaunaxac 'enauac na lalamaxatpi Ñim Lo'onatac 'Enauacna. 4Qaq na lmala'q se'eso nchenaxanaxat tasheguem, chegoqtelec na lhuaq so namaxashec piguem le'ec, l-llatcheguem da qouagaxaunaxac, nache ivira'a cam hueta'a Ñim Lo'onatac 'Enauacna. 5Nache se'eso namaxashec ỹacona aso 'eeta'am ana ỹomaxaqui late'erai, nache nlaxatchigui ana poqo 'ettaigui ỹachegoxotalec aso nca'atoxonaxalate. Ime, nache icorelec 'enauac ana 'alhua, ime, nache chemaqchiguiñalo na nllimiaxa qataq nqashelgaxa, qataq huo'o so lta'araic lacholaxanaxa ana 'alhua.
6Ime, nache soua siete namaxa'she piguem lashe', naỹamaxaayiñi da yaqto' ỹashiiyiguilo soua lasheerel.
Co'ollaq qaỹashiiyiguilo soua hua'auyiñi cuatro nasheerel
7Nache so hua'auchiguiñi namaxashec piguem le'ec can ỹashiiyigui aso lasheere, nache anac aso lache qataq so norec ỹalecteguet na ntago'q. Nache ỹavic so 'oonolec naua tres lpa'axaco ana 'alhua, nataqa'en ana qo'oipaq, qataq nataqa'en 'enauac na 'auaqpi.
8Qaq so lỹa namaxashec piguem le'ec can ỹashiiyigui aso lasheere, nache qaỹasaxangui aso auaxai aso lcatam ana qaỹoqotcheguemec 'alhua, asomaye 'ettaigui. Nache so 'oonolec naua tres lpa'axaco aso auaxai nañigui na ntago'q. 9Huaña, nache ileu nam huetangui so 'oonolec naua tres lpa'axaco aso auaxai, qataq dolagui añi 'oonole naua tres ana notaxaquipi maye quiguingui na 'etaxat.
10Qaq so lỹa namaxashec piguem le'ec can ỹashiiyigui aso lasheere, nache naañi aso huaqaañi late'erai, nalalec so 'oonolec naua tres lpa'axaco na talapi qataq ana npaxaatasheguempi na le'ec. Qaq asa'aso huaqaañi na le'eraxa, 'eeta'am na le'eraxa ana ncoỹaraxanaqte, 11qaq asa'aso huaqaañi le'enaxat «Chemaxarai.» Nache so 'oonolec naua tres lpa'axaco na 'etaxat ỹataqta chem, nache ỹataqta qalota na shiỹaxauapi ileu, souaxat da nỹomgui.
12Qaq so pa'atec soua cuatro namaxa'she piguem lashe' co'ollaq ỹashiiyigui aso lasheere, nache 'om na laỹe añi nala' qataq ñi ca'agoxoic qataq na huaqaañipi qaileguemaxat, nache saishet da 'eroigui. Qaq ỹoqo'oye huo'o na huaña na yo'oqchiguiñi, qaq ñi ca'agoxoic qataq ana huaqaañipi saishet da 'eroigui ye pe.
13Qaq can ime de'era, nache sela'ague so vi'ic huaỹotac, queto'ot na piguem, nache sa'axaỹa so la'aqtac ỹataqta na'axannec 'eeta':
«¡Ỹataqta qauem da taỹa'ague 'enauac nam huetalec ana 'alhua, qom ivita da ỹashiiyiguilo caua lasheerel caua lỹa't tres namaxa'she piguem lashe'!»
