Romanos 15

₁Qomi' maye ỹoqta saỹaanaqta da 'eetapeguec Ñim Lo'onatac 'Enauacna, saishet da nda'a't da seuennaqtega cam 'onaxaic maye maiche qomi' taleguete. Nachaqrata da qomi' setauanaq nam saxanaxa da da'añi da lpi'iỹaxac. ₂'Enauac da shenaqta iuen da souaqapegue' na qaraỹepi qataq selaqaique ca laỹamaxa maye ishet da machiguiñi naqa'en. Qaq 'era da 'eetec da setaunaxac namayepi da nquiguisheguem da lpi'iỹaxac Ñim Lo'onatac 'Enauacna. ₃Cha'aye ivira'a So Cristo da saishet co'ollaxa da iuennatega da 'oonolec da nachaqsota da qaỹaỹamaxareeta. Cha'aye da la'aqtac Ñim Lo'onatac 'Enauacna maye nanettalec ana nere maye huetalec na la'aqtacpi Ñimaye, 'eeta': «Da lsheunaxanaxac nam 'am isheueetac 'enauac Aỹem talec.» ₄Cha'aye 'enauac nam nanettalec ana nere maye huetalec na la'aqtacpi Ñim Lo'onatac 'Enauacna qoỹiyiñi co'ollaxa da yaqto' qomi' ỹapaxague'n. Da la'aqtaxanaxac anamaye qomi' itaua'n da yaqto' huo'o da qara'añaxac qataq qanhualaxaunaxac, qataq ỹataqta 'itchiguiñi da 'eesa dam qara'amqaanataxanaxac. ₅Qaq na'aictaxa da nacheñi Ñim Lo'onatac 'Enauacna Ñim qomi' ỹanema da qarhualaxavic qataq qomi' ỹa'añaqche't. Qaq aỹem seỹaxanot Ñimaye da yaqto' qami' itaua'n yaqto' ỹataqta qana'ayeeta't, qataq qoquiitelec da lataxac So Cristo, ₆yaqto' 'enauac da qoñiita qalapoñiita't da qavio'oxoyiñiitac Ñim Lo'onatac 'Enauacna maye Nta'a.

₇Qaq ỹoqo'oye ñi 'oonolec da qoñiita ỹataqta ỹaconeguet ca lỹa da 'eeta'am naqa'en da 'eetec So Cristo co'ollaq qami' ỹaconegueta, da yaqto' 'enauac qaỹo'oxoren Ñim Lo'onatac 'Enauacna. ₈Cha'aye So Cristo anac da huapegue' nam judiopi, da yaqto' ỹachaxan da Ñim Lo'onatac 'Enauacna ỹataqta ipacchigui 'enauac nam ỹachaxanapeguempi som hua'au qarta'alpi. ₉Somaye nataqa'en anac da yaqto' nam saishet da judiopi ỹanot da na'achec Ñim Lo'onatac 'Enauacna souaxat da lauotaxanaqtaic, nache 'enapec ana nere maye huetalec na la'aqtacpi Ñim Lo'onatac 'Enauacna maye 'eeta':

₁₃Qataq huo'o da iỹaxanaxac Ñim Lo'onatac 'Enauacna maye qomi' ỹanema da qanaquitaxac, da Ñimaye qami' nlaxatchiguilo qome da qaramaicỹaxaqui. Qataq qami' ỹanema da qarlagaxayiqui maye chegaqaigui da qarpi'iỹaxaqui Ñimaye. Qataq chegoqchigui da la'añaxac So Saqcha'a Na'añaxac Qui'itta da nquictasheguem da qanaquitaxaqui.

₁₄Qami' ỹaqaỹarolqa maye qaua'amaqchiñiitac So Cristo, aỹem ỹoqta 'eesa ñaqa'en da ỹataqta qami' nlaqchiguilo da qarauotaxanaqtaiqui qataq da qarauattonaxanaxaqui, cha'aye ñi 'oonolec ỹaỹaten da huaqata ca lỹa. ₁₅Qalaxaye ñaqaiyeta saishet da shi'iỹalec da serelec ana'ana ỹere da qami' samaxalo da sa'axatta 'enauac namayepi, yaqto' saishet qome da qaucoviỹa'ai. Damaye so'ot cha'aye Ñim Lo'onatac 'Enauacna ỹataqta aỹem ỹauotec, ₁₆qataq aỹem lca'aguishec da so'onataxanot So Jesucristo da yaqto' setauan nam saishet da judiopi. Qaq aỹem sheeta'am ca ntaxaỹaxanaxanec da sa'axatem namayepi da no'on na'axaỹaxac maye chegoqo'ot Ñim Lo'onatac 'Enauacna, qataq seroua'a Ñimaye da 'eeta'am aca nachetaqtaxanaqte maye ỹaỹamaxareeta Ñimaye, cha'aye So Saqcha'a Na'añaxac Qui'itta iỹotauga da yaqto' lalamaqte.

₁₇Qaq chegoqchigui de'era aỹem ỹo'otec So Jesucristo, da aỹem seshet da huo'o da ña'amqaanaxac, souaxat da so'onataxaatacot Ñim Lo'onatac 'Enauacna. ₁₈Cha'aye 'eesa, da nachaqrata da sa'axattac dam ỹo'ot So Cristo ỹachegoxotchigui aỹem, da yaqto' nam saishet da judiopi ỹalaxaguet Ñim Lo'onatac 'Enauacna. Qaq damaye sañoxot, qaq saishet da sañoxot damaye da chegoqchiguilo naua ỹa'aqtaqa, maye nataqa'en nam so'otpi. ₁₉Chegoqchigui da la'añaxac So Saqcha'a Na'añaxac Qui'itta da qalota na so'ot nam sa qaỹauanapegapi qataq nam ỹo'ot da na'aalaxa, qataq sevirapeguec da sa'axattac da no'on na'axaỹaxac, sachegoqchiguiña ye Jerusalén qataq choche sevitta'a ye Iliria. ₂₀Qaq ỹataqta huo'o da ñepogoxoinaxac da sauotaique da sa'axat So Cristo da soota'a ca 'alhua maye saxanaxa da qaỹa'axaỹa da na'aqtaguec Somaye. Yaqto' da sa'axattac da no'on na'axaỹaxac, nache saishet da 'eeta'am da ñepa'axanapeguelec da lo'onataxanaxac nam hua'auñi lamaxashecpi So Cristo. ₂₁Nachaqrata da sauotaique da so'ot dam 'enapec ana nere maye huetalec na la'aqtacpi Ñim Lo'onatac 'Enauacna maye 'eeta':

_22-23Qami' ỹaqaỹarolqa, qalota naxa da sauotaique da saigue da Roma da qami' ñamaqtegalo. Qalaxaye saishet da sañoxot souaxat da sa'axattac da no'on na'axaỹaxac, nachera da qaica ca iraqa' naqa'en. Qalaxaye ye mashe semat da ỹo'onataxanaxac ne'ena 'alhua, qataq ye mashe huo'oi naua na'axa'te da sauotaique da qami' ñamaqtegalo, ₂₄nache aỹem iuennataxac da qami' saỹaleguete qome da saigue da España. Qalaxaye saishet da huo'oi caua na'axa'te da qami' soota'agueta qome, qalaxaye saỹaten da huo'o da ñetonaxac da qami' ñamaqtegalo, nataqa'en huo'o da ñaquitaxac da aỹem qautauañi da yaqto' shecto'ot de'era ỹecỹaxac. ₂₅Nagui aỹem saigue da Jerusalén da seroỹa aye ntaunaqte anom cam qarqaỹañicpi maye quetague' So Cristo maye netaña yemaye. ₂₆Aya'aye anom lapoñiguishe nam 'amqaanataxanaxaicpi maye hueta'a ye 'alhua Macedonia qataq nam netaña ye Acaya da ỹauotaique da ltaunaxanaqte da itauan cam qarqaỹañicpi maye huo'o da lhuenaxanaxa maye netaña ye Jerusalén. ₂₇Qaq de'era ỹo'ot yemayepi maiche lhuennataxac, cha'aye nache 'eetec iuen da ỹo'ot yemayepi de'era. Cha'aye nam judiopi maye ỹa'amaqten So Jesús da ỹachetec dam lsallaxa maye saqcha'a nam saishet da judiopi, nache nataqa'en nam saishet da judiopi, iuen da ỹachetec nam judiopi da yo'oqchigui lsallaxa. ₂₈Qaq qom mashe semat de'era, qataq da mashe ime da sanem aye anom cam 'amqaanataxanaxaicpi maye hueta'a ye Jerusalén, huaña qome nache senoxonec da saigue da España, nache qami' saỹaleguete qome da qami' ñamaqtegalo. ₂₉Qaq aỹem ỹoqta 'eesa da qom sevita ye nỹecpi ye Roma, nache qami' sa'aqtaxanema 'enauac nam no'on saconaxaguet maye chegoqo'ot So Cristo.

₃₀Qami' ỹaqaỹañicpi, aỹem qami' ñachoxoreetoiguilo souaxat So Qarataxala' Jesucristo, qataq souaxat da nsoxoyec maye qomi' ỹanema So Saqcha'a Na'añaxac Qui'itta, da aỹem qautauañi qome da qanqouagaxauñiỹot Ñim Lo'onatac 'Enauacna da aỹem qanqouagaxauñiitalec. ₃₁Qauỹaxañiỹot da yaqto' Ñimaye aỹem nca'alaxateeguesop nam sa da'amqaanataxanpi maye netaña ye 'alhua Judea, qataq yaqto' aye ntaunaxanaqte anom maye sera'a ca qarqaỹañicpi maye netaña ye Jerusalén ishet da saqca ca da qom qaỹaconeguet. ₃₂Yaqto' qom qami' ñamaqtegalo qalaq aỹem nlaqchigui da ñetonaxac qataq da yaqto' ishet da ñematec qom qami' soota'agueta, da Ñim Lo'onatac 'Enauacna aỹem ỹasheetem de'era. ₃₃Qaq Ñim Lo'onatac 'Enauacna maye chegoqo'ot da nlagaxayec hueta'aguet ñi 'oonolec da qoñiita. Aja', nache 'eetec.