'Enapec so ỹale:
1¡Ỹataqta 'am 'onaxaale, 'am ỹoqopitaqte,
ỹataqta 'am 'onaxaale!
Naua 'ara'ai'tolqa 'onaxaiqa 'eeta'ama caua qoto'olqa,
naamaye 'eco' nqañoxottaiguilo na lapoxot na 'arqaic.
Na 'araue 'eeta'am na laue ana quetaq lairaxai,
maye parenaxaata'ague ana qasoxonaxapi ye Galaad.
2Ana 'arhuepi ỹataqta ỹapagaq 'eeta'am ana nlo qaguetapi
maye cheta'ague da qanachelaxaatac
qataq mashe qanpetec,
qataq anamayepi nalochiguiñi.
3Na 'ap qalaq togaxaraic 'eeta'am na nqo'oilliguishec,
qataq huo'o da lamaic naua 'ara'aqtaqa.
Naua 'aramelque tocaleguete 'eeta'ama ana ala ana granada,
'eco' nqañoxottaiguilo na lapoxot na 'arqaic.
4Na 'arqosot logoraic qataq 'onaxaic,
'eeta'am aso lalloxolate so nta'a David,
maye qano'oxoosheguem da coleesop na llo'oxoraxat coma'.
Nache ntaxattañi ana llo'oxoraqtepi
'eeta'am ana ntaxattañi lpaqtaxanaqtepi na qalota 'añaxaicpi.
5Naua 'artetel ñaq qapiole 'eeta'ama
caua dos huayaye ñi'imshe llalole,
da deque'eta'ape nache ỹalectaiguilo
ana lauoxo ana huoue.
6Da ñaq napaltañi qataq natomchiguiñi,
nache aỹem salec ana qasoxonaxapi
maye hualec ana mirra,
qataq aye lcomaraxalatepi maye hualec na nchenaxanaxat.
7¡Ỹataqta 'am 'onaxaale, 'am ỹoqopitaqte,
ỹataqta ivirañi da 'aryacỹaxac,
imauec da 'aro'ocỹaxac 'onaxaic!
¡Qaica da huo'otaq huo'o ca sa ỹaỹamaxañi!
8'Aỹala 'am ñauonaxaua, ña senotaxaueeguesop na pa'asheguem ye Líbano.
Ña qolqa'ai qome ana lmilo ana qasoxonaxa ye Amaná
qataq ye Senir qataq ye Hermón.
Nache qolqa'ai na lauac na quiyoc
qataq na lma' na sauaxaic.
9'Am ỹaqaỹole, maye 'am ñauonaxaua,
ỹataqta 'anaueguela't añi iquiyaqte,
so choche 'oonolec da aỹem 'auamata'a,
qataq can choche sela'a so lquet aso 'arqola.
10'Am ỹaqaỹole maye 'am ñauonaxaua.
Ỹataqta huo'o da lamaic da 'arauotaxanaqtaic.
Damaye napacalec da lamaic na lataxa,
qataq na 'ancoraxat maye ama da laitaỹaxac,
qataq 'enauac na laỹe 'amnaxatpi.
11'Am ñauonaxaua,
da lamaic na 'ap 'eeta'am na dapic lli'i,
dapic lli'i maye lalegue na huaca lche'.
Da lamaic na lcoraxat naua 'ogo
'eeta'am na laita ana pino ye Líbano.
12'Am ỹaqaỹole, maye 'am ñauonaxaua,
'am, qoneta'am ca qaỹapotaua'a nañiguishe lma',
qataq aca qanpaxatteua'a 'etaxat laỹe',
qataq ca ỹataqta qaỹapoteua'a npaxaatasheguem 'etaxat.
13Qataq qoneta'am ca nañiguishe lma'
maye ñaxaalec ana granada
maye qaica ca 'ena'am da lamaic ana ala,
nañiguishe lma' maye nlaqtelec ana lauoxo ana alheña.
14Qataq ana nardo, azafrán,
qataq na canela, cálamo,
qataq na 'enauac ỹotta'a't qo'oipaqpi
maye chegaqaigui na nchenaxanaxat,
qataq na lcha'q ana mirra qataq ana áloe,
qataq 'enauac na ỹataqta no'on ỹotta'a't 'amnaxatpi.
'Enapec aso 'alo:
15Aỹem sheeta'am añi laỹe' na 'etaxat
maye naigui yi'iye nañiguishe lma',
'etaxat llec maye npaxaatasheguem na le'ec,
qataq la'auaxac maye chegoqtapiguisheguema ye Líbano.
16'Am la'at quenaquiaxaic, ¡ña 'anlouec!
'Am la'at nte, ¡ña 'auanac!
¡Ña 'auasheerelec ye ỹañiguishe lma'
nache huaỹoxonec 'anqa'en na ama laitaỹaxac!
¡Anac qome ca ỹauotaxat da nauga ye lañiguishe lma',
nache chec ana ala maye qaica ca 'ena'am da lamaic!
