1¡'Am qasoxonaxa Líbano, 'auauatoiguilo naua 'anaso'omi,
yaqto' na norec ỹavigaxat ana cedropi!
2¡Qami' piinopi qanỹeñi qome,
cha'aye hua'axañi ana cedropi,
cha'aye ana no'on 'epaq mashe dolachigui!
¡Qaq qami' encina maye qoviita'a na Basán,
qana'alaqaitapiguiñi qome,
souaxat da qailaxachigui ye qalochiguiñi aviaq!
3Na'alaqtapiguiñi na qagueta lo'opi,
souaxat som no'on 'auaqpisat ỹataqta dolachigui.
Qataq qaỹa'aqtega da nnoinaxac so llon,
souaxat som lyac co'ollaxa ye tala Jordán ỹataqta dolachigui.
Soua dos qagueta lo'ol
4Qaq 'eeta', da la'aqtac maye aỹem ỹami' Ñim Nataxala' maye Ñatamnaxala'. «'Aulo'ogue qome ana qaguetapi maye ñaq taỹa'a da qaỹalauat. 5Nam desheenaxana anamayepi da ỹalauat, qalaq saq noma da huo'o ca lasouaxashet, qataq na imen anamayepi qalaq, 'eeta': ‹¡Sanot da ña'achec Ñim Nataxala', cha'aye mashe aỹem sallaxanec!› Qaq ivira'a na maiche nhuataxauapi anamayepi, da saishet da ichoxoreetac. 6Qaq nache sheetec qome nataqa'en da saishet da she'eguelaxalec, da sechoxoren na shiỹaxauapi maye hueta'a ne'ena 'alhua, nachaqrata da saneguet da maiche taỹa't qome namayepi, qataq saneguet da lhuaqỹaxac ca nta'a. Nache camayepi ilaxachigui qome ne'ena 'alhua, qaq saishet da ñeca'alaxateeguesop da lhuaqỹaxac camayepi. Qaq 'era da ỹa'aqtac Aỹem Nataxala'.» 7Nache aỹem selo'ogue aso qaguetapi maye taỹa'a da qaỹalauat. Qaq aỹem so'ot damaye souaxat nam desheenaxatega anamayepi. Qataq sauo'oi soua dos ỹasheltel: Aso 'oonole le'enaxat ñaqa'en «'Achecỹaxac» qaq aso lỹa le'enaxat ñaqa'en «Na'atta'a't». 8Qaq so 'oonolec ca'agoxoic, nache huaigui da samaqraue'c soua tres qagueta lo'ol, cha'aye mashe ñasamiisopa, qataq soomaye ỹataqta aỹem nquiỹalo. 9Qaq huaña nache shenapega ana qaguetapi sheeta': «¡Saishet da nache shecto'ot da qami' selotegueto! ¡Da huo'o aca huotaique da ileu, qaq na'aictaxa da ileu! ¡Qaq da huo'o aca qaỹalauat, qaq na'aictaxa da qaỹalauat! ¡Qaq acam no'onañipi qome, qalaq maiche chec aca lỹa!» 10Ime nache sacona aso ỹashelte, maye le'enaxat «'Achecỹaxac» nache sacagaxachigui, qaq nache la'anaxat ñaqa'en da nlaguiñi da naỹamaxataxac Ñim Lo'onatac 'Enauacna, maye ỹo'ot co'ollaq naỹamaxate' 'enauac nam ỹotta'a't shiỹaxauapi. 11Qaq nache huaigui se'eso na'a'q, da nlaguiñi se'eso aỹamaxataxac, nache som shiỹaxauapi maye desheenaxatega co'ollaxa aso qaguetapi maye aỹem ilotagui, ỹaỹaten da nacheñi Ñim Nataxala' ñim detaqtac, chegoqchigui naqa'en nam so'otpi. 12Qaq huaña, nache shenapega somayepi sheeta': «Da qauaỹamaxareñiita, nache aỹem qausheecheñi; qaq da saishet, nache nachaqye.»
Nache aỹem qaisheeten, aỹem qoỹanem aso treinta anom, maye chegaqaigui na lcat plata. 13Nache Ñim Nataxala' aỹem 'enapega 'eeta': «'Auacona qome ayem anom lcatpiole, ayem huo'o da lyac ñesheetenaqte, nache 'auasaxangui añi laỹe' ana anom maye netaigui añi atamnaxaqui.»
Nache aỹem sacona aso treinta anom lcatpiole, mashe sasaxangui aso laỹe' ana anom maye netaigui añi atamnaxaqui maye lalamaqte Ñim Nataxala'. 14Ime, nache qaltaq sacagaxachigui aso lỹa ỹashelte maye le'enaxat «Na'atta'a't» qaq huaña, nache nlaguiñi da na'atta'a't yeua Judá qataq ye Israel. 15Qaq ime, nache Ñim Nataxala' qaltaq aỹem 'enapega 'eeta': «Nagui nache 'aue'enaxat ca qagueta lo'o maye qaica ca ỹaỹaanapec. 16Cha'aye Aỹem sanaña qome, ne'ena 'alhua ca qagueta lo'o, maye saishet da qochetega aca qagueta maye isomapec, qataq saishet da nmitaique acam deqat, qataq saishet da nataren aca que'emaq, qataq saishet da iquia'axan aca qaica ca la'añaxac, nacherata da chec qome na lapat aca ỹataqta chaxarai, nache ỹataqta qaica ca no'onaxatañi ivira'alo naua nna'ache.»
17¡Qaq choxoraxaso' qome, cam qagueta lo'o maye qaica ca ỹaỹaanapec da ỹalat aca lhuateguishe qaguetapi! ¡Camaye qairolec qome ca ỹeelonec da qaicheguec na lhuaq, qataq añi aloiguishe la'aite! ¡Qaq no'ono' da deqaqa na lhuaq, qataq ỹataqta sanauaañi!
