Da nauanaqchec co'ollaq qaila'a aso nere maye huaỹotac
1Qaq aỹem Zacarías, huo'o so lỹa ỹauanaqchec. Aỹem sela'a aso nere maye huo'o so leraxat, asomaye huaỹotac. 2Qaq som namaxashec piguem le'ec aỹem inat, 'eeta': «¿Negue't so 'aulotague'?» Nache aỹem sasateguet somaye, sheeta': «Qomye aỹem selotague' aso qoỹaxatta'a't nere huaỹotac; qaq asomaye ivi' diez metros ye lalogaxa, qataq cinco metros ye lcateueegue.» 3Qaq huaña nache so namaxashec aỹem da'aqtaxanem, 'eeta': «Asa'aso nere nache nanettalec, nam qauem maye talec qome 'enauac ne'ena 'alhua. Qaq som nanettalec asomaye, 'eeta': Cam decache, huo'otaq ca datenataxan da ỹan ca la'aqtac, camaye talec ca nhuaxanaguec. 4Qaq Ñim Nataxala' maye Qaica ca Ỹaqalanapec da la'aqtac, 'eeta': ‹Aỹem ñamaq ne'ena qauem da yaqto' taigui ca lma' ca cachaxaic, qataq ca lma' cam ỹan ca la'aqtac da datenataxangui da ỹe'enaxat. Qaq de'era qauem nache hueta'a qome ca lma' camaye nache ilaxachigui, cañe' naqa'en na l-llecnaxanaxatpi qataq na coma'pi.›»
Da nauanaqchec co'ollaq qaila'a aso 'alo qataq aso naloqnaxanaxaqui
5Ime, nache npa'auec so namaxashec piguem le'ec maye aỹem na'aqtaxaatague', nache aỹem 'enapega, 'eeta': «¡Ña 'anamatasheguem nagui nache 'auamata'a aram nachaxan!» 6Nache senat somaye, sheeta': «¿Negue't dam ra'?» Nache somaye ỹasateguet aỹem 'eeta': «Qomye naloqnaxanaxaqui. Laloqnaxaqui na lasouaxashet 'enauac nam hueta'a ne'ena 'alhua.» 7Qaq asa'aso naloqnaxanaxaqui ỹapotangui so lapoxot maye chegaqaigui nam ishet da quiguiñi. Nache qanauassheguem so lapoxot, nache asa'aso naloqnaxanaxaqui netangui aso 'alo nso'ootañi. 8Nache so namaxashec piguem le'ec, 'eeta': «Aña'añi 'alo añimaye naigui da qauem.» Ime, nache ỹamaxangui asa'aso 'alo asom naloqnaxanaxaqui, nache ỹapogoña dapoxona so lapoxot asomaye maye chegaqaigui nam ishet da quiguiñi. 9Qaq ime, nache qaltaq ñamatasheguem, nache sela'alo soua dos 'alo. Qaq soomaye huo'oi naua laua't 'eeta'ama naua laua't na huaqap, nache soomaye huaỹoi' queroigui so la'at, nache ỹache' aso naloqnaxanaxaqui. 10Nache aỹem senat so namaxashec piguem le'ec maye aỹem na'aqtaxaatague' sheeta': «¿Hua'ague ca qairo'ogue asa'aso naloqnaxanaxaqui?» 11Nache somaye aỹem ỹasateguet 'eeta': «Asomaye qairo'ogue da Babilonia, yem huaña qome da qano'oxoosheguem aca atamnaxaqui, qaq qom ime acamaye, nache asa'aso naloqnaxanaxaqui qoỹanalec aca nca'atoxonaxalate.»
