1Qaq co'ollaq mashe ivi' cuatro vi'iye da nta'a so Darío, nache so na'a'q cuatro so ca'agoxoic nueve maye le'enaxat Quisleu, nache Ñim Nataxala' namaxa so la'aqtac so na'aqtaxanaxanec Zacarías. 2Qaq se'eso na'a'q, som nhuo' le'ecpi ye Betel, ỹama'q co'ollaxa soua Sarezer qataq so Reguen Melec, lỹatrac naqa'en so nalleppi da yaqto' iỹaxanot Ñim Nataxala' ca ntaunaguec, 3qataq da inat so na'aqtaxanaxanecpi, qataq so ntaxaỹaxanaxanecpi maye ilotague' aso atamnaxaqui maye lalamaqte Ñim Nataxala' maye Qaica ca Ỹaqalanapec, 'eeta': «¿Peta'a nache qolaqto'ot da so'otaqtac da qaraquicoxo qataq da qanqouaqchetaxac da ivireuga so ca'agoxoic cinco ye 'oonolec vi'i, dam ñanaguenaqto'ot da so'otaqtac choche ivitta'a nagui?» 4Huaña nache Ñim Nataxala' maye Qaica ca Ỹaqalanapec aỹem 'enapega, 'eeta': 5«Qonapega qome 'enauac na shiỹaxauapi maye hueta'a ne'ena 'alhua, qataq 'enauac na ntaxaỹaxanaxanecpi, qoneta': ‹Qami' qauo'ocheetac naxa da qanqouaqchetaxaqui qataq qanỹeñiitac naxa da ivireuga so ca'agoxoic cinco, qataq so ca'agoxoic siete, qaq de'era mashe ivi' setenta años da qauo'ocheetac. Qalaxaye saishet da qauo'ocheetac damaye, souaxat da huo'o naq 'enec qanqa'eñi aỹem, 6nacherata naxa, da qauqui'iitac qataq da qanỹomiitac qalaq qanmicheetaique da maiche qaraỹamqai.›» 7Ne'enaua ¿Peta'a saisheto' da nachenaua naua la'aqtaqa maye ỹa'n co'ollaxa Ñim Nataxala', ỹachegoxotchigui som hua'au la'aqtaxanaxanecpi, co'ollaq ye Jerusalén ñaq huetaigui da nlagaxayec, qataq nlaqchigui na shiỹaxauapi, qataq nataqa'en na laỹepi nỹecpi maye coleesop yemaye, qataq na 'alhuapi ye Néguev, qataq ye nalochiguiñi 'alhua, maye pa'aigue da nala' lliguiñi? 8Ñim Nataxala' qaltaq huo'o so la'aqtac ỹanem so la'aqtaxanaxanec Zacarías, 'eeta': 9«'Era da samaxasoxoolec, 'eeta': Qami' da huo'o ca qanmiche qarỹai, qalaq iuen da qauo'ogoxoñiỹa dam nalochiguiñi lataxac, qataq da nauotaxanaqtaic qataq nchoxonnataxanaxa. 10Qataq saishet da sa qauaỹamaxacheỹapec aca pa'ai, qataq ca saploq, huo'otaq ca chegaqauec, qataq ca choxoraq. Qataq saishet da qarhuennataqai da qauo'ochec ca qauem ca qarỹai.» 11Qalaxaye se'eso nhuo' le'ecpi saishet co'ollaxa da ỹalaq. Nacherata da datatec, nache ỹe'enaxat da saq hua'aqa. 12Qataq ỹa'añaxachigui añi lquiyaqte, 'eeta'am naqa'en ca coma' maye le'enaxat diamante, da yaqto' saishet da na'axaỹaxana da napaxaguenataxanaxac, qataq nam namaxasoxonaxacpi, maye Ñim Nataxala' maye Qaica ca Ỹaqalanapec ỹachegoxotchigui so Saqcha'a La'añaxac, da ỹa'aqtaxanaxan co'ollaxa so hua'au la'aqtaxanaxanecpi. Qaq ỹoqo'oye Ñim Nataxala' ỹataqta dalemata, 13nache Ñimaye, 'enapeco': «Qaq cha'aye saishet da aỹem na'axaỹaxana somayepi co'ollaq seỹaxaatega, nache nataqa'en Aỹem saishet da sa'axaỹa da aỹem iỹaxaatacot. 14Qaq ỹoqo'oye Aỹem selagaxatapec co'ollaxa sheeta'am aca daua'ache, da yaqto' ỹaleeguet ñaqa'en nam ỹotta'a't shiỹaxauapi maye saỹauatton co'ollaxa. Qaq na na'alhua namayepi ivira'a da ỹataqta toolec, nache qaica ca ishet da nalec. ¡Nam 'alhua maye ỹataqta 'onaxaic co'ollaxa, qalaxaye namayepi ỹo'otec da ỹataqta toolec!»
