Da nhuaxanaguec nam ỹotta'a't shiỹaxauapi maye nhuoreuapi
1Qaq 'era da la'aqtac Ñim Nataxala', da yaqto' dataỹa'aguet ye 'alhua Jadrac, qataq ye huaqta'a't nỹecpi ye Damasco. «Ye huaqta'a't nỹecpi ye Siria lalamaxat Ñim Nataxala', qataq 'enauac na nhuo' Israel le'ecpi. 2Nataqa'en Ñimaye, lalamaxat ye Hamat, maye lauoreua yi'iye nỹecpi, qataq ye Tiro qataq ye Sidón na'aictaxa da ỹaguec da ỹaanaxanaxaicpi yemayepi. 3Ye Tiro no'oxoosheguem so lpaqtaxanaxat, qataq lapoosheguem na oro qataq na plata, 'eeta'am na qalota lsoche na 'alhua. 4Qalaxaye Ñim Nataxala', deuotaxanec qome 'enauac damaye, ime nache ỹasaxangui aso auaxai de'era lsallaxa, qataq ỹavigaxat imauec ye huaqta'a't nỹecpi. 5Qaq yem huaqta'a't nỹecpi ye Ascalón qom ila'a de'era, nache ỹataqta nlaxagui da lli'iỹaxa. Ye Gaza nataqa'en qome lta'araic da nque'eenaxac, qaq da naquitaxac ye Ecrón ỹataqta huetaiya'. ¡Qaq ye Gaza qaica qome ca lta'a, qaq ye Ascalón ỹataqta toolec qome! 6Qaq ye Asdod, qalaq hueta'a qome na ỹalega't shiỹaxauapi, qataq nache tachiguiña ñaqa'en da ño'oxonnaxac na Filistea le'ecpi. 7Qataq ñeqateeguesop qome na alap, na lapat maye ñaq huo'o na ltago'q maye chectac, qataq ñeqateeguesopa naua lhue, na nallec maye sa qaỹashen da qanallec. Qalaxaye nacheye yi'iye shiỹaxauapi, da huo'o qome ca no'onañipi da yaqto' ỹalamaxatpi, nache ivira'a qome da ỹaleeguet na Judá le'ecpi, qaq ye Ecrón qalaq 'ena'am qome na jebuseopi. 8Nache aỹem ỹataqta ñauaatalec da yaqto' seueelec nam ỹalamaxatpi, da huo'o ca camachaqca da iloquiaxan namayepi. Qaq na qauemaicpi, nache saishet qome da ỹe'eguelaxalec da ique'eteetac namayepi, cha'aye nagui, Aỹem ñauaatalec namayepi.»
Da lviraxac ca nta'a ye Jerusalén
9¡Ñaq 'antonapigui' qome, 'am nỹecpi maye qonetalec ana qasoxonaxa Sión!
¡'Auo'onaxaatac souaxat da 'antonaxac 'am Jerusalén!
Mashe 'am nata'a na 'arta'a, maye no'on da lataxac, qataq deca'alaqtaxan,
namaye qaica ca la'amaqchec, netalec na 'ashena llalec.
10Qaq namaye ilaxachigui qome ana nnaigonapi ye Ifraín,
qataq na lalopi caipi na Jerusalén, qataq na checnecpi maye lo'o da alaataxac.
Nache ỹa'axatem da nlagaxayec 'enauac na ỹotta'a't shiỹaxauapi,
qataq da lo'onataxanaxac ilo'ogue 'enauac ana auaxaipi,
chegoqchiguiña ye Éufrates, nache ivitta'a ca ỹataqta pa'atec ana 'alhua.
Ñim Nataxala' ñe'eguelaxatsheguem na lalamaxat nhuo' le'ecpi
11'Era da la'aqtac Ñim Nataxala': «'Am Jerusalén,
souaxat so ntago'q maye chegoqchigui da 'am ñaỹamaxate',
nache Aỹem ñeqateeguesop qome añi nshere maye qaica ca le'ec,
na 'arcoñetegueshecpi maye netangui añimaye.
12¡Qami' ncoñeteguishecpi maye ñaqauo'o da qanaquitaxaqui,
qavi'eguelaqaỹa qome ye maiche qarpaqtaxanaxache!
Cha'aye nagui qami' sa'axatema da qami' sanema qome ca qana'achecỹaxaqui,
napacalec ñaqa'en som qoviỹaigui co'ollaxa qanque'eenaxaqui.
13Cha'aye mashe sechegaxaalec na ichecnec da ñalat, maye nachena na Judá,
qataq mashe sanagui ana ichecna, maye nachena na Efraín.
Qaq 'am Sión, nache 'am qome da 'am ỹainec, qataq sanem qome,
na 'aỹa'alaqpi da dataỹa'aguet na llalaqpi ye Grecia.»
14Ñim Nataxala' nachaxan qome, da hueta'aguet na lalamaxat nhuo' le'ecpi;
qaq da ỹaỹenec aca lchecna qalaq 'eeta'am da layaqchec ca nqashelgaxa.
Ñim Lo'onatac 'Enauacna maye Nataxala', ỹasheeyegui qome aca lasheere,
ime nache jec, queuoigui na la'at maye chegaqa'ague da taguiñi.
15Ñim Nataxala' maye Qaica ca Ỹaqalanapec npaxattalec qome na lalamaxatpi,
qaq namayepi petapigui qome na coma'piolec maye npocnaxanaxat,
qataq chec na npa'aguenaxauapi; nache nỹomigui na ltago'q,
'eeta'am naqa'en na lataxa, nache ỹataqta nlaqchigui namayepi,
'eeta'am aca nemaxanaqte late'erai, maye laỹe' na tago'q,
da yaqto' qaicorelec añi nca'atoxonaxalate.
16Que'eca na'a'q, Ñim Nataxala' maye natamnaxala' namayepi,
nca'alaxatec qome nam lalamaxat nhuo' le'ecpi, 'eeta'am naqa'en aca nlo qaguetapi,
huaña nache qashelectapiguiñi na lalamaxatpi da hueta'a ye maiche na'alhua,
'eeta'am aca no'on coma' maye llo'oxoraqte aca aro'o.
17Qaq ỹataqta sano'onolec, qataq ỹataqta 'onaxaic qome yi'iye 'alhua.
Cha'aye souaxat da ỹataqta qalota na trigo, qataq na lataxa,
nache nam nsoxoppi, qataq na qa'ampi, ỹataqta 'onaxaic da lañaxataxac.
