Sacerdotes tä tälhe p'ante letes Leví
1Leví leles p'ante lheyis Gersón, Coat, lhäy'e Merari. 2Coat leles p'ante häpehen Amram, Ishar, Hebrón, lhäy'e Uziel. 3Wet Amram leles häpehen Aarón, Moisés, lhäy'e Miriam. Wet Aarón leles lheyis Nadab, Abihú, Eleazar, lhäy'e Itamar.
4Eleazar häpe p'ante Finees lajcha,
wet Finees häpe p'ante Abisúa lajcha.
5Abisúa häpe p'ante Buqui lajcha,
wet Buqui häpe p'ante Uzi lajcha.
6Uzi häpe p'ante Zeraías lajcha,
wet Zeraías häpe p'ante Merayot lajcha.
7Merayot häpe p'ante Amarías lajcha,
wet Amarías häpe p'ante Ahitub lajcha.
8Ahitub häpe p'ante Sadoc lajcha,
wet Sadoc häpe p'ante Ahimaas lajcha.
9Ahimaas häpe p'ante Azarías lajcha,
wet Azarías häpe p'ante Johanán lajcha.
10Johanán häpe p'ante Azarías elh lajcha,
häp lham tä yenlhi sacerdote lechumet
tä ihi Lhawuk Lew'et tä Salomón lhenek tä ihi Jerusalén.
11Azarías häpe p'ante Amarías elh lajcha,
wet Amarías häpe p'ante Ahitub elh lajcha.
12Ahitub häpe p'ante Sadoc elh lajcha,
wet Sadoc häpe p'ante Salum lajcha.
13Salum häpe p'ante Hilcías lajcha,
wet Hilcías häpe p'ante Azarías elh lajcha.
14Azarías häpe p'ante Seraías lajcha,
wet Seraías häpe p'ante Josadac lajcha.
15Häp rey Nabucodonosor yen kweneka Josadac wet ihäne Babilonia. Tsi Lhawuk t'at tä ichene Babilonia häp wichi tä lew'et Judá lhäy'e Jerusalén.
Iyhäj wichi tä tälhe letes Leví
16Leví leles p'ante lheyis Gersón, Coat, lhäy'e Merari. 17Häp Gersón leles lheyis Libni lhäy'e Simey. 18Wet Coat leles häpehen Amram, Ishar, Hebrón, lhäy'e Uziel. 19Wet Merari leles häpehen Mahli lhäy'e Musi. Häp tähistso Leví leles lhäy'e lechetsos.
20Gersón häpe p'ante Libni lajcha,
wet Libni häpe p'ante Jahat lajcha,
wet Jahat häpe p'ante Zima lajcha.
21Zima häpe p'ante Joa lajcha,
wet Joa häpe p'ante Ido lajcha,
wet Ido häpe p'ante Zera lajcha,
wet Zera häpe p'ante Jeatray lajcha.
22Gersón lech'inij Coat häpe p'ante Aminadab lajcha,
wet Aminadab häpe p'ante Coré lajcha,
wet Coré häpe p'ante Asir lajcha.
23Asir häpe p'ante Elcana lajcha,
wet Elcana häpe p'ante Ebiasaf lajcha,
wet Ebiasaf häpe p'ante Asir elh lajcha.
24Asir häpe p'ante Tahat lajcha,
wet Tahat häpe p'ante Uriel lajcha,
wet Uriel häpe p'ante Uzías lajcha,
wet Uzías häpe p'ante Saúl lajcha.
25Elcana leles häpehen Amasay lhäy'e Ahimot,
26wet Ahimot häpe p'ante Elcana elh lajcha,
wet Elcana häpe p'ante Sofay lajcha,
wet Sofay häpe p'ante Nahat lajcha.
27Nahat häpe p'ante Eliab lajcha,
wet Eliab häpe p'ante Jeroham lajcha,
wet Jeroham häpe p'ante Elcana elh lajcha.
28Samuel lhäs tä thaläkw lhey p'ante Joel,
wet lech'inij lhey Abías.
29Leví lhäs tä lhey Merari häpe p'ante Mahli lajcha,
wet Mahli häpe p'ante Libni lajcha.
Libni häpe p'ante Simey lajcha,
wet Simey häpe p'ante Uza lajcha.
30Uza häpe p'ante Sima lajcha,
wet Sima häpe p'ante Haguías lajcha,
wet Haguías häpe p'ante Asaías lajcha.
Música lewos tä ihi Lhawuk lew'et
31Häpe lhamelna tä rey David itshupyenehen p'ante yämlek itetshan música tä ihi Lhawuk lew'et, tälhe lewhäy tä õ'tihi Arca tä Õt'amajchet tä Lhawuk lhämtes ihi. 32Häp lhamel yenlhi p'ante música tä ihi Dios lewukwe tä carpa, yäk ichäte lewhäy tä rey Salomón yenlhi Lhawuk Lew'et tä ihi Jerusalén. Häp tä lhamel yenlhi lechumyaj, mälhyej tä õne'tek lhamel iwoye.
33-38Elh lhamel häpe música lewo tä Coat lhayis elh tä lhey Hemán. Lham häpe Joel lhäs, wet lechätilis Samuel, Elcana, Jeroham, Eliel, Toa, Suf, Elcana elh, Mahat, Amasay, Elcana elh, Joel elh, Azarías, Sofonías, Tahat, Asir, Ebiasaf, Coré, Ishar, Coat, Leví, lhäy'e Israel tä häpe lhamel letes.
39-43Wet elh tä ikasthi Hemán lefwomkat häpe lepuhfwa Asaf. Lham häpe Berequías lhäs, wet lechätilis Sima, Micael, Baasías, Malquías, Etní, Zera, Adaías, Etán, Zima, Simey, Jahat, Gersón, lhäy'e Leví.
44-47Wet elh tä ikasthi Hemán lets'amkat häpe lepuhfwa Etán tä tälhe letes Merari. Etán häpe Quisi lhäs, wet lechätilis Abdi, Maluc, Hasabías, Amasías, Hilcías, Amsi, Bani, Semer, Mahli, Musi, Merari, lhäy'e Leví.
48Wet iyhäj Hemán lepuhfwas tä Leví lhayis, lhamel hich'ote ilhokej Dios lechumet tä ihi lham Lew'et.
Sacerdotes lechumtes
49Häp Aarón lhäy'e wichi tä letes häp lham, lhamel yenlhi lechumet tä iwunhomche tshätäy tä iti'pe altar wet äp iwun incienso tä iti'pe altar elh. Häte lhamel t'at tä itetshan ilhokej Lhawuk lechumet tä ihi Lew'etch'o tä Lhamya tä Õt'amajchet. Lhamel yenlhi lechumet häpkhilek Lhawuk itäyhtej Israel lhayis letes tä ihihlä lesukyajay tä iwoyepej. Häp täjtso m'ak tä Dios lakawo Moisés ne'tep'antek Aarón lhäy'e leles iwoye.
50Häp tähisna wichi tä tälhe p'ante Aarón:
Aarón häpe p'ante Eleazar lajcha,
wet Eleazar häpe p'ante Finees lajcha,
wet Finees häpe p'ante Abisúa lajcha.
51Abisúa häpe p'ante Buqui lajcha,
wet Buqui häpe p'ante Uzi lajcha,
wet Uzi häpe p'ante Zeraías lajcha.
52Zeraías häpe p'ante Merayot lajcha,
wet Merayot häpe p'ante Amarías lajcha,
wet Amarías häpe p'ante Ahitub lajcha.
53Ahitub häpe p'ante Sadoc lajcha,
wet Sadoc häpe p'ante Ahimaas lajcha.
Leví lhayis lew'etes
54Häp tähisna honhat lhipey tä õtajej p'ante Leví lhayis tä tälhe Aarón lhäs tä lhey Coat. Häpe lhamel tä ichun tä õ'tshupyene yämlek õhw'enhomche honhat lhipey. 55Õtajej lhamel Hebrón tä ihi Judá, lhäy'e leläy lhäkw'et tä iwhäye, 56mat häp yachuyajw'etes lhäy'e wichi lew'etes tä tott'aho hupuy, häp tä õhw'enho Caleb tä Jefone lhäs yämlek lewuk.
57-59Wet õhw'enhomche Aarón lhäy'e leles häp Hebrón, häp hupuy tä õletnhawet, lhäy'e Pelaj, N'owujyaj, Estemoa, Hilén, Debir, Tutsey, lhäy'e Fwala Wukwe. Wet elh weihalhapej hupuyna õy'isejpej honhat lhip tä leläy lhäkw'et. 60Häte õhw'enhomche lhamel häp iyhäj hupuy tä ihi honhat tä lewuk Benjamín kawichi. Hupuytso häpehen Geba, Alemet, lhäy'e Anatot, wet elh weihalhapej õy'isejpej honhat lhip tä leläy lhäkw'et. Tä mälhyejtso, trece hupuy tä ilhokej tä õtajej Aarón lhayis.
61Häp iyhäj wichi tä tälhe letes Coat, õtajej lhamel diez hupuy tä ihi honhat tä lewuk häp lechowej Manasés kawichi.
62Häp wichi tä tälhe letes Gersón, õtajej lhamel trece hupuy tä ihi honhates tä lewuhuy Isacar kawichi, Aser kawichi, Neftalí kawichi, lhäy'e lechowej elh häp Manasés kawichi tä ihi Basán.
63Häp wichi tä tälhe letes Merari, õtajej lhamel doce hupuy tä ihi honhates tä lewuhuy Rubén kawichi, Gad kawichi, lhäy'e Zabulón kawichi.
64Wet häp tä mälhyejtso, Israel lhayis hiw'enhomche hupuytso häp wichi tä tälhe letes Leví, lhäy'e honhat lhipey tä ipejwhäye tä leläy lhäkw'etes. 65Häp hupuy tä õyämetso tä ihi honhates tä lewuhuy Judá kawichi, Simeón kawichi, lhäy'e Benjamín kawichi, häp tä õtajej Leví lhayis.
66Wet iyhäj wichi tä tälhe letes Coat õtajej lhamel häp hupuy tä ihi honhat tä lewuk Efraín kawichi. 67-69Õhw'enhomche lhamel Sikem tä häpe hupuy tä õletnhawet tä ihi chenhas tä lewuk Efraín kawichi, lhäy'e Gezer, Jokneam, Bet-horón, Ajalón, lhäy'e Gat-rimón. Wet elh weihalhapej õy'isejpej honhat lhip tä leläy lhäkw'et. 70Wet häp Coat lhayis tä imälhehi, õhw'enhomche lhamel hupuy tä lheyis Aner lhäy'e Bileam tä ihi honhat tä lewuk häp lechowej Manasés kawichi. Wet õy'isej honhat lhipey tä leläy lhäkw'etes.
71-76Häp wichi tä tälhe letes Gersón, õhw'enhomche lhamel Astarot lhäy'e Golán tä ihi Basán. Häp hupuytso ihi honhat tä lewuk häp lechowej Manasés kawichi. Häte õhw'enhomche lhamel Kedes, Daberat, Ramot, lhäy'e Anem, tä ihi Isacar kawichi kahonhat. Wet õy'isej Masal, Abdón, Hukok, lhäy'e honhat lhip tä lhey Alhotaj. Hupuytso ihi honhat tä lewuk Aser kawichi. Häte õhw'enhomche lhamel Kedes tä ihi Galilea, lhäy'e Ts'ifwik Chayohi, lhäy'e Hupuy Täkwfwas. Häp hupuytso lhamel ihi Neftalí kawichi kahonhat. Wet elh weihalhapej hupuytso tä õ'wo lheyisa õy'isejpej honhat lhip tä leläy lhäkw'et.
77-81Wet häp Merari lhayis tä imälhehi, õhw'enhomche lhamel Rimón lhäy'e Tabor tä ihi honhat tä lewuk Zabulón kawichi. Wet õy'isej Beser tä ihi ts'anis, Jahas, Kademot, lhäy'e Waj T'änyaj. Häp hupuytso ihi Rubén kawichi kahonhat tä tumej tewok Jordán lhip tä ifwala tälhche tä itayhlä Jericó. Häte õhw'enhomche lhamel Ramot tä ihi Galaad, Mahanaim, Hesbón, lhäy'e Jazer. Hupuytso ihi honhat tä lewuk Gad kawichi. Wet elh weihalhapej hupuytso tä õ'wo lheyisa õy'isejpej honhat lhip tä leläy lhäkw'et.
