1~Juan 2

₁Amel tä oaleles, ochen amehen olhämetna yämlek tek lewoyaye asukyajay. Mat chik elh iwoye lesukyaj, n'amel Lhach'otfwa iche tä y'alhyen n'amehen häp Lhajcha. Lham häpe t'at Jesucristo, häp elh tä is alhoho, ₂wet lhayachajehte t'ilek yämlek Dios itäyhat n'amejen lhasukyajay wet noj lewäk. Mat tajlhamhiyet'a häp n'amel lhasukyajay, mat häte nilhokej wichi tä i'pe honhat.

₃Chik y'awoye Dios lhämtes, kalelhäj tä y'antäfwelej t'at häp lham. ₄Mat chik elh yok, “Olham ontäfwelej Dios”, mat niwoyaye lhämtes, häpe t'at elh tä w'et yämlhi t'at wet m'ak tä matche newahi häp lham. ₅Mat häp elh tä iwoye Dios lhämtes, n'äl tä imälhewek lehumnhayaj tä itiyej Dios. Chik y'awoye täjtso, kalelhäj tä y'ap'akej t'at häp lham. ₆Wet elh chik fwetaj hap'akej Dios, is chik mälhyet iwoye Jesucristo.

₇Ipuhfwas, häp Dios lhämet tä ochen amehenna häpkhit'a m'ak tä nech'ayek, mat häpe t'at m'ak tä pajche lelätaye wet tälhe ifwalatso i'amejen. ₈Mat tej tä mälhyejtso, m'ak tä ochen amehenna häpe t'at Dios lhämet tä nech'ayek, wet Jesucristo lhäy'e amel len'älitay tä matche t'at. Tsi y'aw'en tä yiklhatshi t'at tä noj honataj, wet isi tä matche nech'e ihutunpe honhat.

₉Mat lhek tetshan, che iche elh tä fwetaj ihi isi, mat n'äyiho häp lepuhfwa, kamaj ihi t'at honataj. ₁₀Mat elh tä ihumin lepuhfwa, häp tä ihi isi, wet ihichet'a m'ak che ihanej che ichätyenho lesukyaj. ₁₁Mat häp elh tä n'äyiho lepuhfwa, ihi t'at honataj wet ilunhilhi, wet ihanhiyejt'a honhat tä tataye, tsi honataj hip'o'pe tatelhoy wet yen asnama.

₁₂Nä'tshas, ochen amehen olhämet tsi Dios pajche itäyhthen asukyajay häp tä isej Jesucristo. ₁₃Häte ochene olhämet häp amel tä alajchalis, tsi letäfwelayej t'at häp Elh tä iche tälhe tä nech'enyaya. Häte ochene olhämet häp amel tä amamses, tsi lekalhayhi t'at ahättaj.

₁₄Nä'tshas, ochen amehen olhämet tsi letäfwelayej häp Lhajcha. Häte ochene olhämet häp amel tä alajchalis, tsi letäfwelayej t'at häp Elh tä iche tälhe tä nech'enyaya. Häte ochene olhämet häp amel tä amamses, tsi atkhajayhen wet Dios lhämet ihiche ahusey, wet lekalhayhi t'at ahättaj.

₁₅Wet ofwel amhohen nilhokej amel, oyok, Yej huminay honhatna lhäy'e lakeyes tä ihi. Elh che ihumin honhatna, ihuminhit'a häp Lhajcha. ₁₆Tsi nilhokej lakeyes tä ihonhatena tälhe t'at honhat, tälhiyet'a Lhajcha. Wet lakeyestso häpehen hin'ol lenech'ethayajay tä ni'isachehen, lhäy'e tä ikäne m'ak tä iyahin, lhäy'e tä lhaichäjejwethä m'ak tä häpe lhäy'e m'ak tä iyejen. ₁₇Mat yik t'at tä noj honhatna, lhäy'e n'onech'ethayajay tä ni'isachehen tä tälhe, mat häp elh tä iwoye Dios lenech'ethayaj iläy yämlek tiyäj'attsiy.

₁₈Ilesas, athana häpe t'at lewhäy tä lepes. Pajche letoyenaych'oye häp elh tä nek tä häpe Cristo Letayhfwa. Wet matche, n'äl t'at athana wujpe häp Cristo letayhfwas. Häp tä tamenej tä y'ahanej tä y'anchäte t'at lepes lewhäy. ₁₉Häp hin'oltso tälhte n'amehen, mat kalelhäj tä häpkhit'a n'amel. Tsi che häpkhi n'amel, ihin'et n'amejen. Mat tä yik lhach'oyehen, n'äl tä w'enha lhamej.

₂₀Mat häpet amel, Jesucristo pajche itsäy atapehen Espíritu tä T'amajchet, wet nilhokej amel atäfwnhayaj i'amejen. ₂₁Wet tä ochen amehen olhämetna, häpkhit'a tä katäfwelayej m'ak tä matche, mat tä letäfwelayej, häp tä tamenej tä ochen amehen. Wet lehanayej tä m'ak tä kamatache tälhihot'a m'ak tä matche. ₂₂Tä mälhyejtso, ¿atsi tä häpe tä w'et yämlhi? Oyok, häpe t'at elh che häpe tä fwetaj Jesús kahäpeya N'ofwayhthi tä Dios Chenek. Häp elh tä mälhyejtso häp tä Cristo letayhfwa, tsi tek imatitche tä iche Dios Lhäs lhäy'e Dios Lhajcha. ₂₃Wet elh che häpe che nimattache tä iche Dios Lhäs, Dios Lhajcha ihiyejt'a. Mat elh che imatitche tä iche Dios Lhäs, Dios Lhajcha iyej t'at.

₂₄Tä mälhyejtso, amajayejiche ahusey häp Dios lhämet tä lelätaye tälhe tä lewoyay tesa p'ante. Wet che matche tä ihiche ahusey m'ak tä lelätaye p'ante, häpkhilek lep'akayej t'at Dios Lhäs lhäy'e Dios Lhajcha. ₂₅Wet häp täja m'ak tä Jesucristo ifwel tä hiw'enla n'amhohen, häpe lhaw'atshancheyaj tä t'un.

₂₆Ochen amehen olhämetna tä ofwel amhohen häp iyhäj tä t'uhläk ikan amejen. ₂₇Mat i'amejen häp Espíritu tä T'amajchet tä Jesucristo pajche hiw'en amhohen. Wet tek lewatayhlä iyhäj n'ochufwenyajwos tä mälhyejentso, ts'ilak lham tä aisej tsi ichufwen amejen nilhokej m'ayhay. Wet m'ak tä yen lechufwenyaja häpe t'at m'ak tä matche, häpkhit'a m'ak tä kamatache. Tä mälhyejtso, ap'ajtayej t'at Jesucristo, mälhyej tä Espíritu tä T'amajchet ichufwen amejen.

₂₈Ilesas, oyachajo tä oyok, Ap'ajtayej Jesucristo, häpkhilek lhanowayhyaj lhäy'e lhan'äfwlhi newa n'amejen wet tek y'alhaitontehlä che lham n'äl che tapil alhoho. ₂₉Amel lehanayej tä Jesucristo häpe Elh tä is alhoho. Wet häte lehanayej tä elh che häpe tä iwoye m'ak tä is alhoho, häpe t'at Dios leles elh.