Niyat tsinha tä tälhe Sabá ihoye p'ante Salomón
1Häp niyat tsinha tä laka honhat lhey Sabá iläte Salomón letoyaj tä Lhawuk hiw'enho tä ihan honhatej. Wet häp tä yik tä ihoye Jerusalén yämthilek yelhte wet yäm athachehen lhämtes tä tay'ätshane Salomón. 2Wet wuj lakawos tä nekche wet wuj lelhuy lew'utey camellos. Tilhäj m'ak tä lenij akäjche, wet oro äpte wuj tä tilhäj, lhäy'e häp tuntey tä laha ihi. Tä nichäte Salomón, tay'ätshaneje nilhokej m'ak tä pajche iwaklhat tä ihi letichunhayaj. 3Wet Salomón nichulho nilhokej m'ak tä tay'ätshane, niwohiyat m'ak chik nichulhaho. 4Wet niyat tsinha nech'e nitäfwelej Salomón tä matche tä ihan honhatej. Wet äpte hiw'en lewukwe tä isilataj tä lham lhenek, 5lhäy'e lhäk tä is wet akäj, lhäy'e lech'otfwas lew'etes, lhäy'e lakawos lhäy'e lew'uyis tä taw'uyhiche, lhäy'e lakawos tä yenhoplhi lhät tä iyäyej, lhäy'e tä õ'wunhomche itshätäy tä õyen n'okhayajayej Lhawuk tä ihi Lew'et. Wet niyat tsinha wuj tä t'iseltej, 6wet yäme rey tä yok:
–Oläte t'at tä oihi oka honhat tä wichi yen lhämeta m'ayhay tä lhenchelhi lhäy'e tä lehan honhatej. Matlhat matchep'a. 7Chik n'am hohi kana, okachuhin'e, chik ka'olhamhiyan'e chik ow'en m'ak tä wichi yen lhämtesa. Mat is tä onek naji wet ow'en tä matlhat matchep'a. Nits'ilakhiyat chik lechowej m'ak tä olätepej tä õyen lhämeta tä lehan honhatej, lhäy'e m'ak tä akäywet tä lew'en, matche t'at tä wuj. 8¡Lakäjyaj ihi hach'efwas! ¡Lakäjyaj ihi akawos tä i'amej ifwalapej! Lhamel iläte t'at ämtes tä lhämejlhi ahanyajay. 9Lewujyaj ihi Awuk Dios tä hin'älit tä akäjlhi amej wet ayen niyatayej Israel lhayis. Häp lham lehumnhayaj tä lajit lepesa tä itiyej Israel lhayis, wet ayen häpeya rey häpkhilek lewoyeje m'ak tä is alhoho lhäy'e m'ak tä t'uhawetej häp lhamel.
10Wet niyat tsinha yen t'awayhata rey cuatro mil kilos oro, wet äpte yäm wuj tuntey tä laha ihi tä hiw'enho, lhäy'e m'ak tä lenij akäjche. Ihichet'a p'ante Israel lhayis t'awayhat chik häte iwoye m'ak tä niyat tsinhatso yen t'awayhata häp Salomón.
11Wet äpte rey Hiram laka barcos tilhäj oro tä tälhe Ofir. Wet y'isej hal'äy tä lhey sándalo, wet yäm wuj tä talhunej, lhäy'e tuntey tä laha ihi. 12Hal'äy tä sándalo rey ne'tek lakawos itihipej lhip tä häpe Lhawuk Lewukwe lhäy'e lham lewukwe. Wet äpte ne'tek õyenejlhi n'ofwolis, õyenhoplhi hin'ol tä ihanej tä y'ajiche música. Ihichet'ak õhw'en hal'äytso chik näme Israel lhayis lew'etes, wet tälhe t'at lewhäytso tä õkniw'ena.
13Wet rey Salomón nech'e lham tä hiw'enho niyat tsinha nilhokej häp m'ak tä t'alheje, hip'ajtej m'ak tä yen t'awayhata atsinha. Tä tajyäme täja, wet yik atsinha, lhäy'e lakawos, yäple laka honhat tä lew'et.
Salomón lakäywet tä wuj, lhäy'e letoyaj
14Nekchämpej õ'chene veintidós mil (22.000) kilos oro häp Salomón, 15lhäy'e m'ak tä tälhe hin'ol tä ifwellhi m'ayhay, lhäy'e nilhokej reyes tä ihi Arabia wet niyatey tä ihi Israel.
16Wet rey Salomón ne'tek õyenchelhi doscientos n'oka'tshayajchal tä wus tä õ'tumtejlä n'och'ähal, elh tefwajpejni hiw'en seis kilos oro. 17Wet äp ne'tek õyenlhi trescientos tä niwusa, elh tefwajpejni inu'pe lhimphaj un kilo y medio oro. Wet itichufwi lewukwech'o tä yen lheya “Tayhi tä Líbano”.
18Äpte ne'tek õyenlhi leniyatyajw'et tä wuj häpkhilek tatayhiphä. Õyenejlhi elefante tsotey wet õhp'oyejpe oro tä matche tä is. 19Atofwphä leniyatyajw'et, hiw'en seis n'ot'äsawetes, wet lechäyiw'et tä tumphä õ'tsufwyenho. Wet n'okatow'etes iyejen häp lhipey, lhäy'e t'owalhas peykas tä takasthenwhäye. 20Doce t'owalhas peykas tä iyej leniyatyajw'etna, wet n'ot'äsawetes tä ihi seis täkwfwaspej tä iyejen lhipey. Ihichet'a n'oniyatyajw'et chik mälhyejtso chik ihi honhat chik häpe chik õyenlhi p'ante.
21Nilhokej p'ante rey lhäthis oro t'at, lhäy'e nilhokej lhäkhis tä ichufwi lewukwech'o tä lhey “Tayhi tä Líbano”. Wet ihichet'a p'ante elh chik plata, tsi häp tä ifwalas tä Salomón iche p'ante, wujit'ak õ'wo haya häp plata. 22Lhäy'e tä rey laka barcos tä wus pajpejtha tres nekchämis nech'e tä nämhenpej. Wet rey Hiram laka barcos häp tä nekchepej lhamel. Tilhäj oro, plata, elefante tsotey, hatän'i lhayis, lhäy'e afwentas.
23Rey Salomón inu'pe p'ante nilhokej reyes tä i'pe honhat, lakäywet tä hiw'en lhäy'e tä ihan honhatej. 24Wet nilhokej p'ante wichi tä i'pe honhat t'uhläk hiw'enpe Salomón. Lhamel t'uhläk iläte tä yämejlhi lehanyaj tä laka Dios hiw'enho p'ante. 25Wet elhpej tä ihoye ichäje t'awayhat, nekchämpej nekchämpej. Hiw'enho n'olhenhay tä plata lhäy'e tä oro, lew'uyis, n'oka'tshayajchal, lhäy'e m'ak tä lenij akäjche, lhäy'e yel'atas, wet mola lhayis.
Salomón laka kaletas lhäy'e yel'atas tä ichäj
26Salomón iti lhamej p'ante kaletas tä n'oka'tshayajchal lhäy'e sip'äl tä yen lew'uteya yel'atas. Ihi p'ante mil cuatrocientos (1.400) kaletas wet doce mil (12.000) sip'äl tä yen lew'uteya yel'atas. Wet kaletas ihiche lew'etes tä ihiche honhates tä wus, lhäy'e tä iyej rey tä ihi Jerusalén. 27Wet tä Salomón ihi leniyatyaj, lhäy'e lhip tä wuj häp plata tä ihi Jerusalén, hätet iwoye tuntey, itaj'atpe honhat. Wet äpte pänhichetek äp wuj, hätet iwoye higo lhiley tä tayhlheley tä ihi honhat tä w'awulhchä tä iwhäye lewomekitaj. 28Wet yel'atas tä Salomón lew'utey tälhe p'ante häp Egipto lhäy'e Cilicia. Rey lech'otfwas tä ifwelwethä lakhäy, häp tä lhamel ichäjen p'ante häp yel'atas tä ihi Egipto lhäy'e Cilicia. 29Kaletas tä n'oka'tshayajchal tä Egipto lheley lhenhay, laha seiscientos chinaj t'äj, wet yel'atas laha ciento cincuenta. Häp tä Het lhayis laka reyes lhäy'e Aram lhayis laka reyes, lhamel ichute Salomón lech'otfwas chik ichäjo häp yel'atastso.
