Lhawuk yachajo tä lhain'ältej Salomón
1Tä wak'alh Lhawuk Lewukwe tä Salomón yenlhi, lhäy'e rey lewukwe tä lham lew'et, wet lhäy'e nilhokej m'ak tä t'uhläk yenlhi, 2nech'e äp yachajo tä Lhawuk lhain'ältej, tet iwoye täjp'ante ichun tä lhain'ältej tä ihi Gabaón. 3Wet yok:
–Otch'ahut ame tä lewo alhyaja lhäy'e tä alep'altsen n'oye. Otiyej okäpfwayaj häp Owukwe tä lhenlhi, wet nech'e häpe t'at ot'amajchet wet lajit lepesa tä ow'et t'at. Olham ot'uhiyela nilhokej ifwalas wet oyikhit'alach'oye. 4Wet am is chik leten ajcha David wet lewoye m'ak tä is alhoho. Wet is chik imälhewek tä is ahusek wet lewoye olhämtes wet lhen achumyaja nilhokej ochufwenyajay. 5Chik mälhyejtso m'ak tä lewoye, wet ot'uhiyela aniyatyaj. Oyämla kalelhäj tä lajit lepesa tä am lhäy'e ales aniyatej Israel lhayis, mälhyej olhämette ofwenho ajcha David tä oyok, “Lajit lepesa tä äspej t'at tä häpe Israel lhayis laka rey.”
6“Isit'a chik am lhäy'e ales lelehla n'oyej, nemhit letetshan olhämtes lhäy'e ochufwenyajay tä ow'ente amhohen, häp tä lhen awuhuya dios lhayis iyhäj wet len'okwiyej. 7Chik mälhyejtso m'ak tä lewoye, wet osohiyeja Israel lhayis häp honhat tä ow'enhohte lhamel. Nemla ihi tä ottache Owukwe tä oyennaj ot'amajcheta, owom, wet nilhokhiyeja wichi tä i'pe honhat tä iläkwlhi häp Israel lhayis. 8Hupna ts'ilakhilat lhipey tä ikatsi, tsi owasthihila. Wet nilhokhiyeja wichi chik nekhila lhipche inuhthila lhamhohen wet yafwuthichehena lepästey tä iläkwlhi. Yohlak, ¿Chipte tä Israel laka Dios iwoynejatsi häp huptsi lhäy'e honhatna? 9Wet lhamel elh yohlak, Häp tä lhamel yikch'oye Lewuk Dios tä itonphä p'ante lhamel lechätilis tä itälhtho honhat tä Egipto. Wet nech'e lhamel ihänlhi dios lhayis iyhäj, lhamel yen lewuhuya wet n'okwiyej. Häp tä tamenej tä lham itiyej wuj m'ak tä ni'isa lhamel.”
Salomón yen t'awayhata Hiram häp veinte honhates tä nitäkwpej hupuy tä ihiche
10Ihi veinte nekchämis tä Salomón yenlhi Lhawuk Lewukwe lhäy'e rey lewukwe tä lham lew'et. 11Häp Hiram tä Tiro laka rey pajche ichene Salomón häp hal'äy tä pänhichetek lhäy'e tä pino, lhäy'e nilhokej oro tä Salomón iwatlä tä yenlhi hupuytso. Häp tä tamenej tä Salomón hiw'enho veinte honhates tä nitäkwpej hupuy tä ihiche tä ihi Galilea. 12Tä Hiram itamakehen honhatestso, wuj tä nhumina. 13Wet yok:
–Yaelh, ¿atsi m'ak tä häpe honhates tä lew'en n'oho?
Häp tä tamenej tä yen lheya honhattso Kabul, tä yok, Lajit Lahaya. Wet lhey t'at pajtha nämena. 14Tä nilhok p'ante oro tä Hiram pajche ichene Salomón, ihi p'ante cuatro mil kilos.
Salomón lhenhay iyhäj
15Salomón iwo p'ante lechumyenhaya tä yenlhi Lhawuk Lewukwe lhäy'e rey lewukwe tä lham lew'et, lhäy'e honhat tä w'awulhchä tä õ'potpe wet õyäm atofwphä, lhäy'e Jerusalén lelafwek tä tuntey, lhäy'e honhates tä lheyis Hasor, Meguido, wet Gezer, tä wujpe hupuy tä ihiche. 16Häp Egipto laka rey pajche inuye p'ante Gezer wet ikalhi. Iwunhomche hupuy wet ilänhen Canaán lhayis tä yen lew'eta. Wet yachaje p'ante lhäse, Salomón lech'efwa, häp tä yen lewukwa. 17Wet häp tä Salomón ne'tek õ'nech'aynhi nilhokej hupuy tä wasiche p'ante, lhäy'e Bet-horón lhip tä tumchä, 18lhäy'e Ba'alat, lhäy'e Tamar tä ihi ts'anis tä ihi Judá. 19Äpte ne'tek õyenlhi honhates tä sip'äl lewukwey ihi, lhäy'e honhates iyhäj tä itihi laka kaletas tä laka'tshayajchal, lhäy'e honhates iyhäj tä itihi laka sip'äl tä yen lew'uteya yel'atas, lhäy'e nilhokej m'ak tä pajche lham t'uhläk yenchelhi tä ihi Jerusalén, lhäy'e Líbano, lhäy'e nilhokej honhatil tä lham tä lewuk.
20Iche wichi tä imälhehi honhat tä Israel tä kahäpeya Israel lhayis. Häpehen Amorreo lhayis, Het lhayis, Ferez lhayis, Hiv lhayis, lhäy'e Jebús lhayis. 21Wet tä Israel lhayis nikalhahi p'ante chik tifwej, tej tä nem ichehen lhamel thayej, leles kamaj imälhehi t'at honhatna, wet lelesna tä Salomón ichumyenwethä, yäm äytajche lhamel lechumet pajtha ifwalasna. 22Mat ihichet'a Israel lhayis elh chik Salomón ichumyenlhi chik mälhyej chik yen kweneka. Tsi lhamel häpehen t'at sip'äl, lhäy'e tä laka niyatey, lhamel tä yikchufwi kaletas tä n'oka'tshayajchal wet lhamel tä iche'pe yel'atas tä n'oka'tshayajchal. 23Wet hin'ol tä Salomón yen lewosa tä itetshan n'ochumtes, ihi p'ante quinientos cincuenta (550).
24Wet Salomón lech'efwa, Egipto kaniyat lhäse, yikch'oye David laka Hupuy wet t'aye niyat tsinha lewukwe, tsi häp tä lech'efwa yenhoplhi. Wet häp tä Salomón yenlhi honhat tä w'awulhchä tä õ'potpe wet õyäm atofwphä.
25Nekchämpej Salomón tres veces tä yen n'okhayajayej Lhawuk häp itshätäy tä õ'wunhomche lhäy'e iyhäj tä õ'länhen wet õhw'enho Lhawuk yämthilek lha'isyene. Häp itshätäytso õ'ti'pe altar tä Salomón ne'tek õyenhoplhi Lhawuk. Wet äp Salomón iwun incienso tä ihi tä Lhawuk tatache. Häp tä mälhyej p'antetso tä wak'alh häp Lhawuk Lewukwe.
Salomón laka barcos
26Wet rey Salomón ne'tek õyenlhi barcos tä ihi Esión-geber tä iwhäye Lewomekchät lhip tä lhey Elat tä ihi honhat tä Edom. 27Wet Hiram ichen laka barcos lewos tä wuj tä ihan honhatejen tä nitäfwelpe inät tä lewomekitaj. Lhamel tach'ote Salomón laka barcos lewos. 28Wet lhamel ihoye honhat tä Ofir, wet tachuma catorce mil (14.000) kilos häp oro wet ichäje Salomón.
