Roboam iwäkwyhayen Israel lhayis
1Roboam yistejlä Israel lhayis tä ihoye Sikem häpkhilek õyen häpeya rey. 2Wet Jeroboam, Nabat lhäs, kamaj ihi t'at Egipto, tsi ihoye p'ante tä nowaye häp Salomón. Wet lham ihanch'oye tä Roboam ihoye Sikem. 3Wet Israel lhayis iwo chenekaye, wet tä näm, nilhokej lhamel yikche tä ihoye Roboam. Wet lhamel yämhoplhi Roboam wet yok:
4–Äytajche m'ak tä ajcha Salomón iwoyejnaj n'oyehen. Athana tä am tä aniyat, äm tawäjäy olhamel ochumet lhäy'e olhuk tä choyhat tä ajcha ilhuhyennaj n'oyejen. Häpkhilek olhamel lajit whäya tä oayen oka niyata.
5Roboam nichulho wet yok:
–N'aleyej ayej tä y'alhaihutwek. Mähen, tapila n'oye chik tres ifwalas.
Wet wichi iwoye, lhamel yikch'oye. 6Wet rey Roboam tay'ätshane hin'ol tä thänhäy tä lajcha Salomón lech'otfwas p'ante, wet yok:
–¿Atsi m'ak tä owoye häpkhilek onchulho wichi tä tay'ätshan n'oye?
7Lhamel nichulho wet yok:
–Chik ahäpe elh tä t'uhläk is m'ak tä iwoyeje wichi ifwalana, is chik lewoye m'ak tä t'alhej ame, häpkhilek lajit whäya tä lhamel ayen häpeya laka niyat.
8Mat Roboam iwohiyet'a wichi tä thänhäy lhämet tä ifwenho, mat tay'ätshane iyhäj tä lew'awlhafwas tä lech'otfwas. 9Wet yok:
–¿Atsi m'ak tä amel lefwel n'oho, häpkhilek onchulho häp wichi tä t'alh n'oye chik nemhit oyäm choyhat häp lhamel lechumet lhäy'e lelhuk tä choyhat tä ojcha ilhuhyenejen häp lhamel?
10Wet häp lew'awlhafwas yok:
–Tä wichina t'alhej ame chik lhäm tawäjäy lhamel lelhuk tä choyhat naji tä ajcha ilhuhyenej häp lhamel, chulhola lhamel, olak, “Chik ojcha ni'isa n'aji, olham hich'atej tä n'am lha'isyenla. 11Chik yämn'aj choyhat amel alhuk, olham nemla koyhyaj tä olhuhyen amejen m'ak tä matche tä choyhat. Chik itasinn'aj amejen häp letasnhat, wet olham otasnhila amejen otasnhat tä lechinaj ihi lepes.”
12Taj tä tres ifwalas, wet Jeroboam lhäy'e nilhokej Israel lhayis lhamel yachajo p'ante tä ihoye rey Roboam. Tsi lhamel iwoye rey lhämet tä yok, “Amel tapila n'oye chik tres ifwalas.” 13Wet rey yäm äytajche lhämet tä nichulhejo wichi, tsi nemhit iwoye hin'ol tä thänhäy lhämet tä ifwenho. 14Itenche t'at lew'awlhafwas lhämet tä yok:
–Chik ojcha yämn'aj choyhat häp amel alhuk, wet olham nemla koyhyaj tä olhuhyen amejen m'ak tä matche tä choyhat. Wet chik ojcha itasinn'aj amejen letasnhat, wet olham otasnhila amejen otasnhat tä lechinaj ihi lepes.
15M'ak tä tamenej tä rey nitch'ahuyaye häp wichi, häp tä Lhawuk t'at tä letichunhayaj. Tsi t'uhläk imatitche lhämet p'ante yämyenejlhi profeta Ahías tä lew'et Silo tä ifwenho Jeroboam, Nabat lhäs.
16Tä Israel lhayis hiw'en häp rey tä niwoyaye m'ak tä lhamel t'alheje, lhamel nichulho wet yok:
–¡Roboam tä ahäpe David cheyäs, is chik am tä let'uye haw'et lheley! ¡Olhamel nemhit olhay'aje David niyatyaj, häp Isaí lhäs! ¡Nech'e matchep'a tä nemhit olhamel oelhp'a! ¡Mäh n'ekhen, Israel lhayis, n'äple lhaw'etes!
Wet Israel lhayis yikhen, yäpnhomche lhamel lew'etes. 17Mat lhamel tä ihi Judá häp tä yen laka niyata Roboam. 18Wet Roboam ichen Adoniram häpkhilek ichumyenwethä Israel lhayis. Mat lhamel ilän Adoniram, ithatejlhi häp tuntey. Wet tä Roboam iläte tä tetso, wet yokwet inuho laka kaletaj wet ihoye Jerusalén. 19Häp tä mälhyej p'antetso tä Israel lhayis nech'e tatayhlä häp David leniyatyaj, pajtha ifwalasna.
Lhaich'esaj n'oniyatyaj
20Tä Israel lhayis ihanej tä Jeroboam tapile laka honhat, lhamel t'äne wet itihi tä wichi tä wuj tä lhaihutwek tatache. Wet lhamel yen häpeya rey häpkhilek niyatej nilhokej Israel. Niwohiyat elh wichi chik t'ifwtiyej David leniyatyaj, tajlhama Judá lhayis.
21Tä Roboam nichäte Jerusalén, t'äne nilhokej häp sip'äl tä tälhe Judá lhayis lhäy'e häp Benjamín lhayis, ciento ochenta mil (180.000) hin'ol tä wuj tä ihanej tä iwo laka'tshayaja, wet ihutwek häpkhilek tatayhlä häp Israel lhayis. Tsi t'uhläk inachaj lhame leniyatyaj. 22Mat Dios yämhoplhi häp lakawo Semaías, yok:
23–Fwenho Roboam, Salomón lhäs, Judá laka rey, lhäy'e nilhokej Judá lhayis, lhäy'e häp Benjamín lhayis, lhäy'e iyhäj wichi: 24Olham on'äyejo, isit'ak tatayhlä häp lepuhfwas Israel lhayis. Is chik lhamel yäpnhomche lew'etes, tsi olham t'at tä onech'ethayaj tä lhaich'esaj naji n'oniyatyaj.
Tä lhamel iläte Lhawuk lhämet tä õ'fwenho, wet lhamel yäpnhomche lew'etes, mälhyej m'ak tä Lhawuk ihuminche.
Jeroboam yenhoplhi Israel lhayis n'ocheyälis
25Jeroboam inech'aynhi häp hupuy tä lhey Sikem tä ihi chenhas tä ihi honhat tä lewuk wichi tä tälhe letes Efraín, wet häp tä yen lew'eta. Tä tajyäme täja, wet äp inech'aynhi hupuy tä lhey Penuel. 26Mat Jeroboam letichunhayaj ihi, yok, “¿Atsihila m'ak chik owoye chik David niyatyaj yachajo tä nephä? 27Tsi chik wichina ihohiyela häp Lhawuk Lewukwe tä ihi Jerusalén tä lhamel ichäj Lhawuk t'awayhtes, elat lhamel hiw'en letichunhayaj tä is chik lhamel yäple häp Roboam, Judá laka rey. Wet lhamel ilänlan'o wet nech'e äp yenla lewukwa häp Roboam.”
28Wet Jeroboam wuj tä yen tichunhayaja täjtso, wet häp tä yenlhi täkwfwas w'asetas les peykas tä oro. Wet yämhoplhi wichi wet yok:
–¡Israel lhayis, naya t'at tä amel lefwute häp Jerusalén! ¡Häp täji aka dios lhayis tä itonphä p'ante amel tä lhehi honhat tä Egipto!
29Wet itihi elh Betel wet elh itihi Dan. 30Wet häp täja m'ak tä tamenej tä Israel lhayis iwo lech'isukyaja tä lhamel ihoye Betel lhäy'e Dan wet lhamel n'okwiyej n'ocheyälisna. 31Äpte yenchelhi n'on'okhayajw'etes tä i'pe chenhas, wet yen sacerdotesa hin'ol tä tälhe wichi tä kahäpeya Leví lhayis. 32Wet äp yen lakäjyaja iw'ela tä ocho wet ifwala tä quince, itech'aynej t'at häp n'okäjyaj tä ihi Judá. Wet lham ichäj itshätäy wet õ'länhen wet õ'ti'pe altar tä ihi Betel, wet häp tä yen n'okhayajayej w'asetas les peykas tä oro tä lham tä yenchelhi. Wet yenchelhi lecheyälis laka sacerdotes wet itihi Betel, wet ne'tek lhamel yenlhi lechumet tä ihi n'on'okhayajw'etes tä lham yenchelhi tä i'pe chenhas. 33Häp tä mälhyej p'antetso, iw'ela tä ocho wet ifwala tä quince Jeroboam ihoye altar tä lhenek häpkhilek iwun incienso tä n'okwiyej w'asetas les peykas tä oro tä lham lhenhay. Jeroboam lham t'at tä yen lakäjyaja häp iwel'atso, fwitaj yenhoplhipa Israel lhayis lakäjyaj tä iwo len'okhayajayej häp lecheyälis.
