Profeta tä tälhe Judá iyete p'ante häp rey Jeroboam
1Häpet tä Jeroboam takasitwhäye p'ante häp altar tä ihi Betel tä iwun incienso, wet näm häp Lhawuk Dios lakawo tä ichen tä tälhe Judá. 2Wet Lhawuk tä isukunej chik yäm äytajche lechos chik t'änpe altar tä tatayhlä, wet yok:
–Altar, altar, Lhawuk yok, “Ihichela häp rey David leles tä lepes lheley elh, wet lheyla häp Josías. Wet ilänhihena häp sacerdotes wet itihla atape. Häpe t'at lhamel tä iwun incienso tä i'atape, lhamel tä õyen lewosa n'on'okhayajw'etes tä ihi chenhas. Wet Josías itihla atape nulis tä wichi lhiley chik iwunhomche.”
3Häp ifwalatso Dios lakawo iwo tetnekayej altar wet yok:
–Häp täja letetnek Lhawuk lhämet tä tatayhlä häp altar. Yok, “Altar wasihila wet mok'otaj tä i'pe w'et lhahilatpe honhat.”
4Tä rey Jeroboam iläte Dios lakawo lhämet tä itiyej lewit'äyhyaj häp altar, tawäkwäylhi. Ineyhatphä takwey tä i'pe altar wet yok:
–¡Tsokaylhi!
Mat rey takwey tä ineyhatphä nemhit ikalho chik inachajchä. Nemhit iwoye chik hiw'ahhatlhi, nech'e t'unche. 5Häpet tä mälhyejtso, wet wasi altar, mok'otaj w'et lhatpetso. Hätet iwoye tä Dios lakawo iwo tetnekayej tä yäme Lhawuk lhämet tä yok, “Wasihila häp altar.”
6Wet rey tahuyej Dios lakawo wet yok:
–Olhaip'altsen ame, ap'altsene Awuk Dios, ot'uhläk yachajo tä is otkwey.
Wet Dios lakawo iwoye, lhaip'altsene Lhawuk. Wet Lhawuk iwoye lakawo t'alhyaj, wet yachajo tä is häp rey takwey. 7Wet rey tahuyej Dios lakawo wet yok:
–Nek n'okwe tä oyäple ow'et. Let'ekla wet äp owohla awayhata.
8Dios lakawo nichulho rey wet yok:
–Tejin'ek lechowej akäywet tä ihi aniyatyajw'et, tha oyikhit'a amche. Otufwit'ala pan, nits'ilakhiyat inät chik oyähiyeja tä oihi honhatna. 9Tsi häp tä Lhawuk lhämet tä ifwelnaj n'oho yok, “Yej tufwa pan, yej yäyeja inät wet äp yej tapilche n'äyij tä lenukwe tä lhek athana. Nekchela elh n'äyij chik letapil.”
10Tä yäpil Dios lakawo, nemhit yäpilche n'äyij tä inukwe tä ihoye Betel. Inukwe n'äyij elh.
Profeta tä thaläkw tä lew'et Betel tamenej Dios lakawo elh tä lewit'äy ihi
11Häp ifwalastso wet iche profeta tä thaläkw tä ihi Betel. Wet leles tälhe n'on'okhayajw'et wet ifwenho lajcha nilhokej m'ak tä Dios lakawo tä tälhe Judá iwoye tä ihi Betel. Äpte ifwenho lajcha häp m'ak tä Dios lakawo ifwenho häp rey. 12Wet lajcha tay'ätshane lhamel wet yok:
–¿Atsin'e n'äyij tä inukwe?
Wet leles ifwenho n'äyij tä Dios lakawo inukwe tä yäpil. 13Wet lham yäme leles wet yok:
–Enlhi häp ow'ute asno, thatpe lehowetes.
Wet lhamel yenlhi lajcha w'ute, ithatpe häp lehowetes. Wet tä wak'alh, profeta inu'pe lew'ute wet yik, 14ihän Dios lakawo tä Judá lhele. Wet ifwis, tatayphä t'at ichufwi hal'ä. Wet tay'ätshane, yok:
–¿Hä ahäpe profeta tä tälhe Judá?
Wet nichulho wet yok:
–Eh, ohäpe.
15Wet profeta tä thaläkw yok:
–Mäh nek n'okwe, n'ahoye ow'et, nat'ekhen.
16Mat Dios lakawo tä tälhe Judá yok:
–Okalhihit'a chik oyik amche, okalhihit'a chik ohochufwi awukwe, wet okalhihit'a chik otchufwi amej tä let'ek, lhäy'e tä isit'a chik oyäyej inät tä oihi honhatna. 17Tsi häp tä Lhawuk lhämet tä ifwelnaj n'oho wet yok, “Yej tufwa pan, yej yäyeja inät, wet äp yej tapilche n'äyij tä lenukwe athana tä lehoye Betel. Chik letapil kana, nekchela elh n'äyij.”
18Mat profeta tä thaläkw inityenlhi t'at elh chik iwoye lhämet, wet yok:
–Äpte olham ohäpe profeta, ohätet lewoye. Ángel tä ifwel n'oho Lhawuk lhämet tä is chik ochäj ame häp ow'et häpkhilek let'ek wet leyäyej inät.
Profeta tä thaläkw ifwech'enlhi häp elh, mathichet'a chik ángel lhämet. 19Wet Dios lakawo tä tälhe Judá yikche elh tä yäple lew'et. Wet tä yäme elh w'et, t'ek wet iyäyej inät.
T'owalhaj ilän Dios lakawo tä tälhe Judá
20Tä lhamel t'ekhen, wet Lhawuk tahuyej profeta tä thaläkw tä ichäje lew'et häp Dios lakawo tä Judá lhele. 21Wet profeta tä thaläkw t'än, yok:
–Häp täja Lhawuk lhämet. Yäme tä lewohiyet'a lhämet tä ifweln'aj amho. 22Letapinhen häpkhilek let'ek wet leyäyej inät tä lhehi honhat tä nhumina chik lhehi tä let'ek. Tä mälhyejtso m'ak tä lewoye, wet chik let'il hap'itsek ihiyejt'ala atetsel lep'itseyhayw'et.
23Tä Dios lakawo tä tälhe Judá ileyej tä t'ek lhäy'e tä iyäyej inät, wet profeta tä thaläkw yenlhi lew'ute asno, ithatpe lehowetes, häp tä t'uhläk elh i'pe tä yik. 24Wet yik Judá lhele, yäple lew'et. Mat tä nichät kanhi, t'owalhaj nichutej wet ilän. Lep'itsek ihi t'at n'äyij, wet asno lhäy'e t'owalhaj lhamel takasthen t'at, iyej t'at lep'itsek. 25Wet iche wichi tä nekche n'äyij wet hiw'en lep'itsek, ihi t'at n'äyij, wet t'owalhaj kamaj iyej t'at. Tä lhamel nichäte hupuy tä profeta tä thaläkw ihi, wet ifwenho wichi m'ak tä lhamel hiw'en tä ihi n'äyij. 26Wet profeta tä thaläkw tä lham tä inachajen p'ante elhtso, tä iläte lhämet tä wichi yämejlhi, yok:
–¡Häpe t'at Dios lakawo mathi, tsi iwohiyet'a mathi Lhawuk lhämet! Häp tä tamenej tä Lhawuk ichutyenej t'owalhaj wet ilän, iwo lhipeya. Tsi Lhawuk lhämet mathi tä tehlattso m'ak chik ihiyeja.
27Wet lham yäme leles wet yok:
–Enlhi häp ow'ute asno, thatpe lehowetes.
Wet leles iwoye lhämet, lhamel yenlhi lajcha w'ute, ithatpe lehowetes. 28Wet yik profeta tä thaläkw, t'ukwe elh p'itsek. Wet nilhoke, ihi t'at n'äyij, asno itwhäye, lhäy'e t'owalhaj. Wet t'owalhaj äp nitufwiya t'at elh p'itsek, wet äp nilänhiya t'at häp asno. 29Wet profeta tä thaläkw tachuma Dios lakawo tä Judá lhele lep'itsek, wet ithatpe asno wet yik. Ichäje häp honhat tä lew'et ihi wet tajänlä, wet wuj tä lelhakli ihi wet lhafwyhayaj ihi. 30Itihi elh p'itsek lham lep'itsekhi tä iwaklhat lhamho ifwala chik ileyej honhat. Wet lham lhäy'e leles iwo lechosayej elh tä y'äyen, tafwchehchä, yok:
–¡Matche tä lewit'äy ihip'a opuhfwa!
31Tä profeta tä thaläkw ileyej tä tajänlä elh, wet tahuyej leles wet yok:
–Chik äp olham chik äp oy'il, tilat n'ohi op'itsekhine otihi Dios lakawo lep'itsek, häpkhilek olhiley iyej t'at häp lham lhiley. 32Tsi häp tä akalelhäj tä mathichela Lhawuk lhämet tä ichute häpkhilek yen lhämeta tä Lhawuk tatayhlä häp altar tä ihi Betel lhäy'e häp n'on'okhayajw'etes tä ihi chenhas tä ihiche honhates tä ihi Samaria.
Jeroboam tujlhache t'at lakeyis tä ni'isa tä iwoye
33Tej tä mälhyejtso m'ak tä iche, tha Jeroboam kamaj tujlhache t'at lakeyis tä ni'isa tä iwoye. Kamaj yenchelhi t'at sacerdotes tä tälhe wichi elh chik häpe, häpkhilek yen lewosa n'on'okhayajw'etes tä ihi chenhas. Hin'o chik häpe tä ihuminchek lhayen häpeya sacerdote, wet Jeroboam yene t'at sacerdote wet yen lewoya n'on'okhayajw'et. 34Häp täja Jeroboam lech'isukyaj tä tamenej tä leles iwo lech'isukyaja, lhäy'e lechetsos. Wet tä ilepese, lhamel nofwej.
