1~Rey 15

₁Ihi p'ante dieciocho nekchämis tä Jeroboam, Nabat lhäs, niyatej Israel, wet Abiam nech'e iwo tesa tä lhayen niyata tä ihi Judá. ₂Wet tres nekchämis tä ihi Jerusalén tä iwoye niyat lechumet. Wet lako lhey p'ante Maaca, Absalón tä lhäse. ₃Wet Abiam iten nilhokej lajcha lech'isukyajay tä iwoye. Tek hits'ilkat Lhawuk tä n'okwiyej. Tek häte iwoye lechäti David tä ts'ilak Lhawuk tä yen häpeya laka Dios. ₄Mat Lhawuk kamaj nitichunche David, ihuminhit'a chik tatäy leniyatyaj tä ihi Jerusalén, is chik tet iwoye n'ochäkw tä kamaj y'uho. Tsi tä itihi Abiam lhäs häp leniyatyaj, häp tä ikhajyen Jerusalén. ₅Tsi David iwoye p'ante m'ak tä is alhoho wet Lhawuk akäjejlhi. Ilehiyejt'a Lhawuk lhämtes nilhokej ifwalas tä kamaj iläy. Tajlhama t'at m'ak tä iwoyeje Urías, Het lhele, häp tä ni'isa.

_6-7Roboam, tä kamaj iläy, lham lhäy'e Jeroboam lhamel iwoye t'at laka'tshayaj tä iti lhamejen. Wet Abiam tä icheyäjo lajcha lew'et kamaj tatay'atlä häp Jeroboam. Wet m'ayhay iyhäj tä Abiam iwoye ihi t'at n'olesaynekhi tä lhey “Reyes tä ihi Judá.” ₈Wet Abiam y'il p'ante tä nech'e ihoye lechätilis, wet tä õtjänlä, õ'tihi David laka Hupuy. Wet lhäs tä lhey Asa häp tä icheyäjo lajcha leniyatyajw'et.

₉Ihi p'ante veinte nekchämis tä Jeroboam niyatej Israel, wet Asa nech'e iwo tesa tä lhayen niyata tä ihi Judá. ₁₀Wet cuarenta nekchämis tä ihi Jerusalén tä iwoye niyat lechumet. Wet lakatela lhey p'ante Maaca, Absalón tä lhäse.

₁₁Wet Asa is alhoho m'ak tä iwoye, hätet iwoye häp lechäti David, wet Lhawuk akäjejlhi. ₁₂Yokoschephä häp wichi tä iwo lakain'oyajahi n'on'okhayajw'etes tä fwitaj ikäjyenlhi laka dios lhayis. Wet iwom nilhokej n'ocheyälis tä lajcha lhäy'e lechätilis yenchelhi p'ante. ₁₃Äpte isoyej lakatela Maaca len'ohyaj tä häpe niyat tsinha, tsi häp tä ne'tep'antek õyenhoplhi häp dios tsinha Asera lepeyak. Wet Asa iwasthi p'ante n'ocheyätso, ihäne tewok lhäsaj tä lhey Cedrón wet hip'o. ₁₄Wet tej tä Asa tach'anlhaye t'at tä tek õ'wasthiche n'on'okhayajw'etes tä ihi chenhas, tha akalelhäj tä hits'ilkat Lhawuk tä n'okwiyej nilhokej ifwalas tä iläy. ₁₅Wet itichufwi Lhawuk Lewukwe häp oro lhäy'e plata, lhäy'e nilhokej m'ayhay tä lajcha yen p'ante t'amajchetesayej Lhawuk, lhäy'e m'ayhay tä lham yen t'amajchetesayej Lhawuk.

₁₆Asa lhäy'e Baasa, Israel lhayis laka rey, lhamel ilehiyejt'a laka'tshayajay tä iti lhamejen. ₁₇Tä Baasa tatayhlä häp Judá, ikhajyen häp hupuy tä Ramá häpkhilek newache elh chik inuphä wet äp newache elh chik näm chik tach'ote Asa. ₁₈Wet Asa tachuma nilhokej oro lhäy'e plata tä ichufwi Lhawuk Lewukwe, lhäy'e tä ichufwi häp lham lewukwe. Wet ichenchufwi lakawos häpkhilek ihäne Ben-hadad, Aram laka rey, Tabrimón lhäs tä Hezión lecheyäs tä lew'et Damasco. Äpte häp täja lhämet tä ichene, yok:

₁₉–Am lhäy'e olham is chik n'alhalepuhfwas t'at ifwalana. N'aten lhajchalis m'ak tä is tä iwoyejte lhamehen. Ochen ame awayhat oro lhäy'e plata. Is chik leleyej tä lhen apuhfwaya häp Baasa, Israel lhayis laka rey, häpkhilek ileyej tä tatay n'ohlä.

₂₀Wet Ben-hadad iwoye elh lhämet, wet ichen laka sip'äl, ne'tek inuye Israel lhayis laka honhat lhipey tä hupuy ihiche. Wet ikalhi Ijón, Dan, lhäy'e N'och'atkanyajw'et, lhäy'e nilhokej honhat tä tumej Kineret, wet nilhokej honhatil tä wichi tä tälhe letes Neftalí laka honhat. ₂₁Tä Baasa ihanej, ileche tä fwitaj ikhajyen häp Ramá wet yäple häp Tirsa. ₂₂Wet nech'e rey Asa t'äne nilhokej Judá lhayis, nemhit ihuminche chik imälhehchä elh lhamel. Wet lhamel talhunej tuntey lhäy'e hal'äy tä ihi Ramá tä Baasa fwitaj ikhajyenej Ramá. Wet häp tä rey Asa ikhajyenej hupuy tä Geba tä ihi wichi tä tälhe letes Benjamín laka honhat, lhäy'e hupuy tä Mispa.

₂₃Häp tä mälhyejtso m'ak tä Asa iwoye p'ante. Wet m'ayhay iyhäj tä iwoye, lhäy'e tä t'otle t'un, lhäy'e lhenhay tä yenchelhi honhates tä nitäkw hupuy tä ihiche, lhamel ihi t'at n'olesaynekhi tä lhey “Reyes tä ihi Judá.” Tä hich'ut p'ante, wet lepach'ol tä t'inhayaj ihi. ₂₄Wet y'il p'ante tä nech'e ihoye lechätilis, wet tä õtjänlä, õ'tiyej lhamel lep'itseyhay tä ihi David laka Hupuy. Wet lhäs tä lhey Josafat häp tä icheyäjo lajcha leniyatyajw'et.

₂₅Ihi p'ante täkwfwas nekchämis tä Asa niyatej Judá, wet Nadab tä Jeroboam lhäs nech'e iwo tesa tä lhayen niyata tä ihi Israel. Wet täkwfwas nekchämis tä iwoye niyat lechumet. ₂₆Mat isit'a m'ak tä iwoye wet Lhawuk y'ulhanej lakeyistso, häp tä iten lajcha lech'isukyaj tä iwoye. Tsi lajcha lham tä iwetahat p'ante Israel lhayis wet tamenej tä lhamel iwo lech'isukyaja. ₂₇Wet Baasa, Ahías lhäs, tä tälhe wichi tä tälhe letes Isacar, lham iwo chowejayej Nadab häpkhilek isakanej. Wet ilän p'ante tä ihi hupuy tä lhey Gibetón, Filisteo lhayis kahonhat tä Nadab lhäy'e nilhokej Israel lhayis kasip'äl tatayhlä.

₂₈Baasa ilän p'ante häp Nadab tä Judá laka rey Asa ihi tres nekchämis häp leniyatyaj. Wet nech'e lham tä icheyäjo häp elh leniyatyajw'et. ₂₉Häpet tä iwo tesa tä häpe rey, ilänhen nilhokej häp Jeroboam lepuhfwas. Tifwej wichi tä Jeroboam iyhäj, niwohiyat elhaj chik imälhehi. Tsi nech'e lhaimatitche Lhawuk lhämet p'ante lakawo Ahías tä Silo lhele yen lhämeta. ₃₀Häp täja häp laha Jeroboam lech'isukyaj tä iwoye p'ante, wet lhäy'e tä äp lham tä tamenej Israel lhayis tä iwo lech'isukyaja. Matche tä iwäkwyhayen p'ante Lhawuk tä Israel lhayis laka Dios.

₃₁Wet m'ayhay iyhäj tä Nadab iwoye ihi t'at n'olesaynekhi tä lhey “Reyes tä ihi Israel.”

₃₂Wet Asa lhäy'e Baasa, Israel lhayis laka rey, lhamel tujlhache t'at tä tataywek.

₃₃Ihi p'ante tres nekchämis tä Asa niyatej Judá, wet Baasa, Ahías lhäs, nech'e iwo tesa tä lhayen niyata tä ihi Israel. Wet lew'et Tirsa wet veinticuatro nekchämis tä niyatej Israel. ₃₄Mat isit'a m'ak tä iwoye wet Lhawuk y'ulhanej lakeyistso. Tsi iten Jeroboam lech'isukyaj tä iwoye tä iwetahat p'ante Israel lhayis wet tamenej tä lhamel iwo lech'isukyaja.