1~Rey 16

₁Lhawuk tahuyej häp Jehú, Hanani lhäs, häpkhilek ifwenho Baasa tä Lhawuk nech'e tatayhlä. Yok:

₂–Oneyhatphähte tä w'et m'ayek t'at, tet iwoye honhat mokw, wet oyenehte oka wichi Israel lhayis kaniyat. Mat iten häp Jeroboam lakeyis wet iwetahat oka wichi Israel lhayis. Tamenej lhamel iwo lech'isukyaja wet iwäkwyhayen n'oyej m'ak tä ni'isa tä iwoye. ₃Wet häp tä ohämthila, oyämlat nofw, lhäy'e nilhokej lepuhfwas. Otech'aynhiyeja m'ak tä owoyejehte häp Jeroboam lhäy'e lepuhfwas. ₄Iyhäj chik y'inhen tä ihi hupuy, asinhäs tufwihena t'at lep'itseyhay. Wet iyhäj tä newahi wichi chik y'inhen, häp tä tsetwosla t'at chik tufwen.

₅Wet m'ayhay iyhäj tä Baasa iwoye, lhäy'e tä t'otle t'un, ihi t'at n'olesaynekhi tä lhey “Reyes tä ihi Israel.” ₆Wet y'il p'ante tä nech'e ihoye lechätilis, wet õtjänlä, õ'tihi Tirsa. Wet lhäs tä lhey Ela häp tä icheyäjo lajcha leniyatyajw'et.

₇Häp Lhawuk lhämettso tä yämyenejlhi häp profeta Jehú, häpe lakalelhthayaj tä lewäkw tä itiyej häp Baasa lhäy'e nilhokej wichi tä lham iyhäj. Tsi häp tä lechumyaj tä iwoye matche tä ni'isa, wet häp tä Lhawuk y'ulhanej wet lewäkw ihi. Matche tä Baasa lakeyis hätet iwoye Jeroboam lhäy'e wichi tä lham iyhäj, wet äpte tifwej p'ante Jeroboam iyhäj tä ilänhen.

₈Ihi p'ante veintiséis nekchämis tä Asa niyatej Judá, wet Ela, Baasa lhäs, nech'e iwo tesa tä lhayen niyata tä ihi Israel. Wet lew'et Tirsa wet täkwfwas nekchämis tä niyatej Israel. ₉Wet iche laka sip'äl kaniyat tä lhey Zimri, wet lham itetshan lechowej kaletas tä n'oka'tshayajchal tä lewuk Ela. Wet Zimri nitichunejlhi m'ak tä iwohiyejela laka niyat häpkhilek ilän. Wet ifwala elh p'ante tä Ela ihi Tirsa, iyej lech'otfwa tä lhey Arsa lew'et, häp hin'o tä niyatej rey lew'et, wet lham Ela iyäyej hat'es pajtha w'oknaj. ₁₀Wet tä näm Zimri, ilän, wet nech'e lham tä häpe rey. Wet häpe p'ante veintisiete nekchämis tä Asa, Judá laka rey, ihi leniyatyaj.

₁₁Häpet tä Zimri iwo tesa tä häpe rey, yokwet ilänhen wichi tä Baasa iyhäj. Tifwej, niwohiyat elhaj chik imälhehi, lakalay'is äpte nofwej. ₁₂Häp tä mälhyej p'antetso, Zimri yäm at nofwej Baasa iyhäj tä ilänhen. Häpe t'at Lhawuk lhämet p'ante tatayhlä Baasa tä profeta Jehú yen lhämeta, häp tä lhaimatitche. ₁₃Häp täja laha häp Baasa lech'isukyaj tä iwoye p'ante, lhäy'e lhäs Ela lech'isukyaj, tä lhamel iwetahat Israel lhayis wet tamenej lhamel iwo lech'isukyaja, wet iwäkwyhaynej lecheyälis häp Lhawuk tä Israel lhayis laka Dios.

₁₄Wet m'ayhay iyhäj tä Ela iwoye ihi t'at n'olesaynekhi tä lhey “Reyes tä ihi Israel.”

₁₅Ihi p'ante veintisiete nekchämis tä Asa niyatej Judá, wet Zimri nech'e iwo tesa tä lhayen niyata tä ihi Israel. Wet lew'et Tirsa, mat siete ifwalas t'at tä niyatej Israel. Wet lewhäytso Israel lhayis kasip'äl iwo w'etawhäye Filisteo lhayis kahupuy tä lhey Gibetón, tsi häp tä lhamel inuye. ₁₆Wet tä sip'äl ihanch'oye tä Zimri tatayhlä häp rey wet ilän, wet nilhokej lhamel yen häpeya rey häp lhamel laka niyat tä lhey Omri. ₁₇Wet Omri lhäy'e nilhokej Israel lhayis, lhamel ileyej tä fwitaj inuye häp Gibetón, wet inuye Tirsa tä Zimri lew'et.

₁₈Tä Zimri hiw'en tä õ'sakanej hupuy, wet lham tiyäjo hupch'o tä tach'opway tä ihi rey lew'et. Wet iwunho wet tan'isej, y'o. ₁₉Häp täja laha häp lech'isukyaj tä iwoye, tsi iwoye m'ak tä ni'isa wet Lhawuk y'ulhanej lakey. Zimri iten m'ak tä Jeroboam iwoye p'ante tä tamenej p'ante Israel lhayis iwo lech'isukyaja, wet iwäkwyhaynej häp Lhawuk.

₂₀Häp tä mälhyejtso m'ak tä Zimri iwoye p'ante. Wet m'ayhay iyhäj tä iwoye, lhäy'e tä ikanejlhi häp rey Ela tä nichuwete, ihi t'at n'olesaynekhi tä lhey “Reyes tä ihi Israel.”

₂₁Wet Israel lhayis lhaich'esaj p'ante. Iyhäj yikche hin'o tä lhey Tibni, Ginat lhäs, wet t'uhläk häpe rey. Wet iyhäj w'enhayej häp Omri. ₂₂Wet Omri laka wichi ikalhi häp iyhäj tä lhaiw'enhatej Tibni. Wet Tibni y'il, wet Omri nech'e häpe t'at rey.

₂₃Ihi p'ante treinta y un nekchämis tä Asa niyatej Judá, wet häp tä Omri nech'e iwo tesa tä lhayen niyata tä ihi Israel. Wet doce nekchämis tä iwoye niyat lechumet. Ichun Tirsa tä ihi, seis nekchämis, ₂₄wet äp ichäj chenaj tä Samaria, häp hin'o tä lhey Semer laka honhat. Ichäjej sesenta y seis kilos plata, wet yenlhi hupuy tä takhajay wet yen lheya Samaria.

₂₅Wet Omri lech'isukyaj hich'atej tä ni'isa, inu'pe reyes iyhäj tä ichunej leniyatyaj, wet Lhawuk y'ulhanej lakeyistso. ₂₆Iten m'ak tä Jeroboam, Nabat lhäs, iwoye p'ante tä tamenej p'ante Israel lhayis iwo lech'isukyaja, wet iwäkwyhaynej Lhawuk tä Israel lhayis laka Dios häp lecheyälis.

₂₇Häp tä mälhyejtso m'ak tä Omri iwoye p'ante. Wet m'ayhay iyhäj tä iwoye, lhäy'e tä t'otle t'un, ihi t'at n'olesaynekhi tä lhey “Reyes tä ihi Israel.” ₂₈Wet y'il p'ante tä nech'e ihoye lechätilis, wet õtjänlä, õ'tihi Samaria. Wet lhäs tä lhey Acab häp tä icheyäjo lajcha leniyatyajw'et.

₂₉Ihi p'ante treinta y ocho nekchämis tä Asa niyatej Judá, wet Acab, Omri lhäs, nech'e iwo tesa tä lhayen niyata tä ihi Israel. Wet veintidós nekchämis tä ihi Samaria tä iwoye niyat lechumet. ₃₀Mat iwoye m'ak tä ni'isa wet Lhawuk y'ulhanej lakeyis. Inu'pe reyes iyhäj tä ichunej leniyatyaj lech'isukyajay tä iwoye. ₃₁Lham iwoyet m'ak tä iwoye, yenhit'a lhakliya chik inu'pe Jeroboam, Nabat lhäs, lech'isukyajay tä iwoye p'ante. Häp m'ak tä nem koyhyaj tä ni'isa, häp tä iyej Jezabel, Et-ba'al lhäse, Sidón laka rey. Häp tä yen lech'efwaya, wet nemhit hits'ilkat tä n'okwiyej Lhawuk wet hip'ajtejlhi tä n'okwiyej häp Ba'al. ₃₂Wet yenhoplhi altar lhäy'e häp len'okhayajw'et tä itihi Samaria tä n'okwiyej häp Ba'al. ₃₃Äpte yenlhi dios tsinha Asera lepeyak. Matche tä iwäkwyhaynej Lhawuk, Israel lhayis laka Dios, häp lhenhayna, tsi häp tä inu'pe Israel lhayis laka reyes tä ichunej leniyatyaj tä iwo lech'isukyaja.

₃₄Ifwalas tä Acab iche p'ante, wet hin'o tä lhey Hiel tä lew'et Betel inech'aynhi honhat tä Jericó. Wet tä yenlhi lefwetes, wet lhäs tä lechunkatsek tä lhey Abiram ileyej honhat. Wet tä yenlhi lepelis, häp tä lhäs tä nithaläkwa tä lhey Segub, ileyej honhat. Häpe t'at Lhawuk lhämet p'ante yämyenejlhi Josué, Nun lhäs, häp tä nech'e lhaimatitche.