1~Rey 3

₁Rey Salomón nech'e yen elha Egipto kaniyat, häp tä yen ch'efwaya lhäse wet ichäje Jerusalén lhip tä häpe David laka Hupuy. Wet Salomón yenlhi t'at lewukwe tsi kamaj wak'alhit'a, lhäy'e Lhawuk Lewukwe, wet äpte yenlhi n'olafwek tä tuntey tä ilunej Jerusalén. ₂Wet tä kamaj niwak'alha Lhawuk Lewukwe, wichi ihoye n'on'okhayajw'etes tä i'pe chenhas yämthilek ilän itshätäy tä yen n'okhayajayej Lhawuk.

₃Salomón iwoye lajcha David lechufwenyaj wet wuj tä ihumin Lhawuk. Mat kamaj ihoyepej wichi len'okhayajw'etes tä i'pe chenhas wet yen n'okhayajayej Lhawuk häp itshätäy tä õ'länhen lhäy'e incienso tä õ'wun. ₄Wet ihoye Gabaón, häp n'on'okhayajw'et tä lhamya, wet iwunhomche mil itshätäy tä iti'pe altar tä ihi lhiptso.

₅Wet iche honatsi tä tafwilhanlä Lhawuk tä ihi Gabaón. Wet Dios yok:

–Alhej n'oye m'ak chik lewatlä, ow'enla amho.

₆Wet Salomón nichulho wet yok:

–Iwuk, wuj tä lehumin p'ante akawo ojcha David, tsi matche tä t'ifwti amej. Is alhoho m'ak tä iwoye, iwoyepej m'ak tä am lehuminche. Wet letiyej t'at ahumnhayaj tä nittäyana, häp tä äp lew'enho lhäs ifwalana tä tatayphä'pe lham leniyatyajw'et. ₇Iwuk Dios, leti n'ohi athana rey tä akawon'o, ocheyäjo ojcha David lew'et. Wet tä ohäpe mamse, kamaj wuj m'ak tä n'am täfwelej, tsi kamaj ow'enhit'a'pe. ₈Wet oiyej aka wichi tä letatshupiye, häpe wichi tä wujpey, ohanhiyejt'a chik owo t'ufwahtesa. ₉W'en n'oho tä ohusek wuj tä ihan honhatej, häpkhilek ohanej owoyneja chik otetshan aka wichi wet ow'enhat m'ak tä is lhäy'e m'ak tä ni'isa. Tsi ihichet'a hin'o chik ihanej chik itetshan aka wichi, tsi matche tä wujpey.

₁₀Tä Lhawuk iläte Salomón t'alhyajna, wuj tä akäjejlhi. ₁₁Wet yok:

–Let'alhej n'oye chik lehan honhatej. Tek let'alhej n'oye chik pitaj haw'atshancheyaj, wet tek let'alhej n'oye chik lew'en wuj akäywet. Äpte tek let'alhej n'oye chik otäyhat atayhfwas. Mat let'alhej n'oye chik lehanej tä lechumyenlhi aniyatyaj. ₁₂Tä mälhyejtso, ow'en amho m'ak tä let'alhe, ahusek wuj tä ihan honhatej wet atäfwnhatsaj. Wichi tä ichun ahilä lhäy'e iyhäj tä imälheche han'äyij, ifwisit'a ahanyaj. ₁₃Äpte ow'en amho m'ak tä kat'alhayej n'oye. Lew'enla m'ak tä akäywet tä wuj, lhäy'e awujyaj, wet newache niyatey tä i'pe honhat chik tehla lewoye. ₁₄Chik lewoye olham onech'ethayaj, wet lewoye olhämtes lhäy'e ochufwenyajay, mälhyej ajcha David, wet oyämla pitaj haw'atshancheyaj.

₁₅Tä Salomón n'om, hiw'en tä lefwilhek t'at. Wet yik, yäple Jerusalén. Tä nichäte, ihoye Arca tä N'ot'amajchet tä Lhawuk lhämtes ihi, wet ilänhen itshätäy tä yen n'okhayajayej Lhawuk. Iwunhomche iyhäj, wet ilänhen iyhäj yämthilek lha'isyene Lhawuk. Tä tajyäme, yenlhi lakäjyaj wet t'äne nilhokej lech'otfwas yämthilek tachufwiyej tä t'ekhen.

₁₆Iche p'ante ifwala tä nämhen täkwfwas atsinhay tä lakain'oyaj ihi, lhamel ihoye häp rey Salomón. ₁₇Wet elh lhamel yok:

–Ika niyat, olham olhäy'e atsinhana, hup tä oichufwi häp tä äpte lham ichufwi. Wet owonaj olhäsa, wet lham it n'oyej tä oihi ow'et. ₁₈Tä tajyäme tres ifwalas tä owo olhäsa, wet äpte lham iwo lhäsa. Ots'ilkas t'at, oifwas'atchufwi owukwe, ihichet'a elh chik in'oyejen. ₁₉Wet ichenaj honatsi tä lhäs y'il, lham tä imähi lhäs. ₂₀Tä hiw'en tä nahati wuj n'oyej tä omä häp honatsitso, nephä n'aji wet tachuma olhäs wet imäyej. Wet tachuma n'aji lhäs p'itsek wet imäyen n'oyej. ₂₁Tä onephä tä nech'e ifwala, ofwitaj otifwkat, mat ow'en tä y'ilp'a. Tä matche tä ifwala, yachajo tä oyahinlhi, nech'e ontäfwelej tä khit'a olhäs.

₂₂Wet atsinha elh nichulho elh tä iläte, wet yok:

–¡Kha, mathit'a! ¡Olhäs t'at han'äfwaj tä iläy!

Wet nech'e äp elh yok:

–¡Kha, olham tä olhäs! ¡Am tä äs tä y'il!

Wet nech'e tälhe täjtso tä tatayejwek lhämtes, ihi t'at tä rey tatache. ₂₃Wet rey yok:

–Elhna yok, “¡Olhäs häp han'äfwaj tä iläy, äs häp han'äfwaj tä y'il!” Elh nichulho wet yok, “¡Kha, mathit'a! ¡Äs häp tä y'il, olhäs häp tä iläy!”

₂₄Wet nech'e rey tahuyej lakawos wet yok:

–Chäj n'oye n'ofwajnhat.

Wet õ'chäje n'ofwajnhat. ₂₅Wet rey yok:

–¡Huwa, istho lechowej han'äfwaj tä iläy! W'enho atsinhana lhote wet äp w'enho atsinha elh häp lhote.

₂₆Wet atsinha tä lhäs häp han'äfwaj tä iläy wuj tä hip'altsen. Wet lhaip'altsene rey tä yok:

–¡Ika niyat, yej län, w'enho t'at atsinhatsi!

Mat elh atsinha yok:

–¡Isit'ak õhw'en n'oho wet äpte isit'ak õhw'en amho! ¡Is chik õyiset t'at han'äfwaj!

₂₇Rey nichulho wet yok:

–W'enho atsinha tä hip'altsen han'äfwaj. Yej län, häp tä lako.

₂₈Tä Israel lhayis iläte tä rey Salomón nitäfwelej m'ak tä matche lhäy'e m'ak tä kamatache tä onte õ'iskatho, lhamel yok:

–¡Matchep'a tä ihan honhatej!

Tsi nech'e lhamel ihanej tä Dios tä hiw'enho lehanyaj Salomón, häpkhilek ikalelhät m'ak tä is lhäy'e m'ak tä ni'isa.