1~Rey 4

₁Rey Salomón niyatej p'ante nilhokej Israel lhayis. ₂Häp tähesna lech'otfwas tä ihi leniyatyaj:

Azarías, Sadoc lhäs, häpe sacerdote.

₃Sisa leles, Elihoref lhäy'e Ahías, häp tä n'olesaynekwos.

Josafat, Ahilud lhäs, häp tä silätwo tä ifwenhopej rey häp m'ayhay tä iche.

₄Benaías, Joyada lhäs, häp tä niyatej imälhewek sip'äl.

Sadoc lhäy'e Abiatar häp tä sacerdotes.

₅Azarías, Natán lhäs, häp tä gobernadores laka niyat.

Zabud, Natán lhäs, häp tä sacerdote wet äp häpe rey lech'otfwa tä lhamya.

₆Ahisar häp tä niyatej rey lew'et.

Wet Adoniram, Abda lhäs, häp tä niyatej nilhokej n'okawos tä õ'chumyene lechumet tä äytajche.

₇Wet rey Salomón hiw'en p'ante doce gobernadores tä imälhewek Israel lhayis. Nekchäm tefwaji gobernadoresna elh w'enhayejpej tefwaji iwel'a tä ichene lhäk häp rey lhäy'e lew'et lheley. ₈Häp tähesna lheyis:

Hur lhäs niyatej häp chenhas tä ihi honhat tä lewuk wichi tä tälhe letes Efraín.

₉Decar lhäs niyatej Makás, M'awow'et, Fwala Wukwe, Elón, wet Bet-hanán.

₁₀Hesed lhäs niyatej Arubot, lhäy'e hupuy tä lhey N'olafwek, wet nilhokej honhat tä Hefer.

₁₁Abinadab lhäs niyatej nilhokej honhat tä lhey Dor. Lech'efwa lhey Tafat, Salomón lhäse.

₁₂Ahilud lhäs Baana niyatej Taanak, Meguido, lhäy'e nilhokej honhates tä Bet-seán tä iwhäye Saretán, häp Jezreel lhip tä tumej tapinhiye, tälhe Bet-seán pajtha Abel-mehola, pajtha äp iw'echehi Jokmeam.

₁₃Geber lhäs niyatej Ramot tä ihi Galaad, lhäy'e Manasés lhäs Jaír laka hupuyhas tä ihi Galaad, lhäy'e honhat tä Argob tä ihi Basán, wet sesenta hupuy tä wus tä ihi, lelafwey tuntey wet lepe p'otes tä bronce.

₁₄Ahinadab, Ido lhäs, niyatej Mahanaim.

₁₅Ahimaas tä lech'efwa häp Basemat, rey Salomón lhäse, häp tä niyatej honhat tä lewuk wichi tä tälhe letes Neftalí.

₁₆Baana, Husay lhäs, niyatej Alot lhäy'e honhat tä lewuk wichi tä tälhe letes Aser.

₁₇Josafat, Parúa lhäs, niyatej honhat tä lewuk wichi tä tälhe letes Isacar.

₁₈Simey, Ela lhäs, niyatej honhat tä lewuk wichi tä tälhe letes Benjamín.

₁₉Geber, Uri lhäs, niyatej honhat tä lewuk wichi tä tälhe letes Gad, häp rey Sehón, Amorreo lhayis kaniyat kahonhat p'ante, lhäy'e Basán kaniyat Og. Lham Geber tä tefwajej'atni tä niyatej honhatna.

₂₀Judá lheley lhäy'e Israel lhayis matche tä wujpey lhamel, tet iwoye holotajpej iwhäye tewok. Lhamel t'ekhen, iyä wet letamsekis ihi. ₂₁Wet rey Salomón äp lham tä niyatej niyatey tä ihi honhatil iyhäj, tälhe tewokitaj tä Éufrates pajtha nichäte Filisteo lhayis kahonhat, wet äp pajtha nichäte lepes honhat tä Egipto. Lhamel nämhenpej, tiskanpe impuestos, tsi lhamel laka niyat t'at Salomón nilhokej ifwalas tä iläy.

₂₂Wuj n'olhäk tä Salomón iwatlä ifwala tefwaji, w'awulhej sesenta asnolis lelhuy harina, wet treinta asnolis lelhuy harina tä matche tä is, ₂₃wet diez tolo lhayis tä yätajen, lhäy'e veinte iyhäj tä yätajejen häp hup, wet cien tson'atas, lhäy'e ch'iwase lhayis, lhäy'e itshätäy tä lhey gacelas, lhäy'e tson'a lhayis, wet afwenchey tä yätajen.

₂₄Salomón niyatej nilhokej tewokitaj tä Éufrates lhip tä ifwala y'uyhi, tälhe honhat tä lhey N'olhijtshanw'et pajtha Gaza. Niyatej nilhokej reyes tä ihi honhat lhipeyna, wet letamsekis ihi lhamel lhäy'e nilhokej honhatil tä iwhäye. ₂₅Nilhokej ifwalas tä iläy Salomón, Judá lheley lhäy'e Israel lhayis lhamel letamsekis ihiche. Elh tefwaji itchufwi laka uva lhile tä lechumet, lhäy'e laka higo lhile, tälhe Dan tä ihi lhip tä tafwojnhiye pajtha nichäte Beerseba tä ihi lhip tä tapinhiye. ₂₆Wet Salomón hiw'en p'ante cuatro mil lew'utey yel'atas lehis, häp lew'utey tä laka kaletas leläy, wet doce mil sip'äl tä lechumet tä iche'pe yel'atas.

₂₇Nilhokej gobernadores tä oyämetso, lhamel t'uye rey Salomón lhäy'e nilhokej wichi tä tachufwiyej tä t'ekhen. Elhpej tä nichäte iwel'a tä lham tä ichene lhäk häp Salomón, ichene t'at häpkhilek lhäk nittäya. ₂₈Wet y'isejpej cebada lhäy'e hup tä õhw'enho yel'atas tä iton kaletas, lhäy'e yel'atas iyhäj, wet ihänepej honhat chik õne'tek ihäne.

₂₉Dios hiw'enho Salomón lehanyaj, ihan honhatej wet lajit lepesa tä atäfwnhatsaj, tet iwoye holotajpej iwhäye tewok. Ihanej iwoyneja tä hiw'enhat m'ak tä is lhäy'e m'ak tä ni'isa. ₃₀Lehanyaj inu'pe nilhokej wichi tä ihan honhatejen tä ihi honhatil tä ifwala inuhiphä lhäy'e tä ihi Egipto. ₃₁Tej wichi chik matche chik ihan honhatejen, tha kamaj Salomón inu'pe. Lehanyaj inu'pe Etán, Zera lhäs, Hemán, Calcol, lhäy'e Darda, Mahol leles, wet letoyaj y'ajpe nilhokej honhatil tä iwhäye laka honhat.

₃₂Ilesayen p'ante tres mil proverbios wet mil cinco poemas. ₃₃Ihanej tä yen lhämeta m'ak tä häpe hal'äy, tälhe pino tä ihi Líbano pajtha y'aje hal'ä tälhes tä tälhche hup lhipey. Äpte yämepej itshätäy, afwenchey, w'ahat, lhäy'e itshätäy tä lhaitonchehen honhat. ₃₄Nilhokej honhatil tä Salomón letoyaj nichäte, reyes ichene hin'ol yämthilek itamakpe Salomón lehanyaj.