1Mat kalelhäj tä Dios laka Espíritu yäme tä ifwalas tä ilepese, ihichela iyhäj tä ilehiyeja lechayaj, wet ihänhilhila espíritu lhayis tä häpe ahät lhayis tä kantses lhäy'e lechufwenyajay tä tälhe. 2Häp ahät lhayistso iwohla kotsayej hin'ol tä itihi t'akanyaj lhämtes tä iwoye. Hin'oltso lehusey hätet iwoye m'ak chik yetselhä. 3Lhamel n'äyejo Dios leles chik tawhayeyhen, wet yäme tä fwetaj elhpej n'olhäk ni'isa chik õtuj. Mat Dios yenlhi m'ayhayna yämthilek n'amel tä y'achaye lham wet y'antäfwelej m'ak tä matche, y'atuj wet y'awo graciasayej. 4Tsi nilhokej m'ak tä Dios lhenhay isen t'at, wet isit'a chik y'at'ulhan. Mat is chik y'atchumlä wet y'awo graciasayej Dios, 5tsi Dios lhämet lhäy'e lhat'alhyaj, häp tä hi'isyen.
Jesucristo lakawo tä is
6Chik lechufwenej m'ayhay tä oyämetso lhapuhfwas, ahäpkhila Cristo Jesús lakawo tä is. Lhenhipeja ahusek lhäka n'olhämtes tä häpe lhachayaj, lhäy'e n'ochufwenyaj tä is alhoho tä pajche letujlhache yäk nämena. 7Yej alet'aje p'alhalis tä lew'et honhatna tä thänhäy yämepej, mat akhajyenpej yämthilek lhäy'epej lhip ha'isyaj. 8Chik y'alhaikhajyenwethä, lhat'isanis isej t'at, mat chik y'akhajyen lhahusey yämthilek lhäy'epej lhip lha'isyaj, häp tä matche tä laha ihi. Tsi ts'ilakhit'a tä y'ehi lhaw'atshancheyajna tä n'aisej, mat häte n'aisiyeja wet y'anchäte lhaw'atshancheyaj tä tatay alhoho. 9Matche n'olhämet tä oyämene, wet t'uhawetej chik nilhokej wichi t'ekhache. 10Tsi täjtso häp tä tamenej tä y'en lhachumeta wet y'awo ilhäkleyhyaja'pe, tsi pajche tä y'atiyeji lhaniwhayaj häp Dios tä n'ilataj. Häp lhaka Diosna häpe t'at nilhokej wichi Lefwayhthi, wet lhamel tä itiyej lechayaj, häp tä matche tä isej lefwayhyaj.
11M'ayhaytso häp tä fwenho wichi wet chufwenejen lhamel. 12Amaj amej häpkhilek nehit katsik ikachu ame tä ahäpe elh tä mamse, mat häpkhilek lhamel tä Dios leles iten m'ak tä lewoye tä lhämlhi, lhäy'e akeyes tä isen, lhäy'e ahumnhayaj, lhäy'e achayaj, wet newache m'ak tä ni'isa chik lewoye. 13Wet tä kamaj n'am chät ame, a'amkatej tä leyahyenpej Dios lhämtes tä ihi Lehi yämthilek leles iläte. Nityenej wet chufwenejen lhamel. 14Amajej Dios lakäpfwayajnaj hiw'en amho täjnaj yämyenwethä lakawos wet ifwel amho, wet lham leles tä lhamenya itinaj atape takweyey.
15Mälhetwek ahusek tä letetshan tähestso, häpkhilek nilhokej wichi hiw'en tä lhäy'epej lhip tä lekalhi. 16Amaj amej, wet äm kalelhäj tä achufwenyaj yiwethi m'ak tä Dios lhämet yäme. Yej leyej m'ak tä lewoye, tujlhache. Chik lewoye tähestso, alefwayhthila, lhäy'e wichi tä tach'ahu ame.
