Häpet Dios leles tä n'okwenkay
1Häp iyhäj tä n'okwenkay, is tä matche tä nena w'et m'ayeka lewuhuy, häpkhilek nehit katsik itiyej lhämet häp Dios lhäy'e lhachufwenyaj wet yok, “Isit'a.” 2Wet häp lhamel tä lewuhuy häpehen Dios leles, isit'a chik letichunhayaj yok, “Wujit'a tä onowaye tsi opuhfwa t'at.” Mat is chik nem koyhyaj tä tach'ote, tsi lewuhuyna tä lhamel iwoyeje lechumtes, häpehen Dios leles wet lhamel ihumnhen.
N'okäywet tä matche
En ämeta wet chufwenej wichi täja. 3Elh chik häpe chik ichufwenej m'ak tä w'enha lhamej tä niwetayej Lhawuk Jesucristo lhämtes tä isen lhäy'e lechufwenyaj tä tälhe lhat'ekhahyaj, 4häpe t'at elh tä lhaichäjlhi wet niwohit m'ak chik ihanej. Hätet iwoyek t'inhayaj tä ilän, tsi ihumin tä nichulhlhihlä iyhäj wet iwopej ka'tshayaja'pe n'olhämtes lhäy'e m'ak tä n'olhämtes yäme. Häp tä tamenej tä iche n'ot'äytenyaj, lhäy'e tä wichi tach'anlhahit'a lhamehen, iyet lhamehen, ikachu lhamehen, 5wet lepes ihichet'a tä tataywek. Häp tä lakey iyhäj tä lehusey nem is alhoho, nemhit ihanej m'ak tä matche, fwetaj chik iwo t'ekhahyaja, ikalhi lakäywet tä wuj.
6Oyok, matche t'at täjtso, wuj m'ak tä hin'o ikalheji t'ekhahyaj, mat tajlhame chik n'ayhtayejen m'ak tä iyej. 7Tsi niwohit m'ak tä y'achäj honhatena, wet chik y'aleyej honhat, niwohit m'ak chik y'achäjila n'amchehen. 8Chik y'aw'en m'ak tä y'atuj lhäy'e lhaw'uy, naya t'at, lhatamsekis ihi. 9Mat häp lhamel tä t'uhläk ikalhi wuj kolhki, tumhit'ahlä n'olhelhtshayaj wet nichätho niyäkw tä häpe lenech'ethayajay tä ni'isachehen t'akanyaj. Tähestso ikänchi lhamel, wet ithatho lewit'äyhyaj wet tatäy. 10Tsi nilhokej m'ak tä ni'isachehen lefwetes, häpe t'at n'ohumnhayaj tä õ'tiyej kolhki. Wet häp iyhäj tä t'akänyaj itiyej kolhki, lhamel nistakej t'ekhahyaj, wet hätet iwoye tä itshänejwethä ch'uthanil lehusey, wet wuj leteläythayajay tä iyej lhamel.
“Tujlhache lhat'ekhahyaj, yej leyej, akhajyen tä lewo aka'tshayaja”
11-12Mat am tä ahäpe Dios lakawo, atontehlä nilhokej tähestso. Äm is alhoho ahusek yämlek i'amej ha'isyaj, wo ekhahyaja, ti amej ahumnhayaj wet tek afwitsaj. Tujlhache lhat'ekhahyaj, yej leyej, akhajyen tä lewo aka'tshayaja. Tsoklhi haw'atshancheyaj tä t'un, tsi tä Dios t'änte ame, lhohtekwe, “Jesucristo häpe t'at Lhawuk”, tä lhehihte tä wujpe wichi itayche.
13Athana, ihi tä Dios itayche, häp lham tä hiw'enho lew'atshancheyaj nilhokej m'ayhay, lhäy'e tä Cristo Jesús itayche, lham tä lhamtej yämte kalelhäj lhämet tä ihi p'ante tä Poncio Pilato itayche, ofwel amho, oyok, 14Woyepej m'ak tä one'tek lewoye, amajej wet tujlhache häpkhilek nehit katsik ifwon ame, wet yej leyej pajla'tha näm Lhawuk Jesucristo. 15Chik nichäte lewhäy, Dios hin'älthila häp lham. Tsi Dios häpe t'at Niyat tä Lhamya wet lewujyaj ihi, ihichet'a elh. Häpe N'owujtaj tä Lhamya wet äp N'owuk tä Matche. 16Ts'ilak lham tä n'ilataj, wet ihi isi tä nehit katsik ikalhi chik lhaitott'ayne. Niwohit elh tä hiw'en, tsi nehit katsik ihanej iwoyneje yämlek hiw'enpe. ¡Is chik Leniyatyaj lhäy'e lakhajyhayaj iyej t'at yämlek tiyäj'attsiy! Amén.
17One'tek lefwenho lhamel tä hiw'en m'ayek tä ihonhatena, isit'ak lhaichäjlhi wet isit'ak isiyeja lakäywet, tsi n'okäywet t'unhit'a. Mat nityenej lhamel yämlek leniwhayaj itiyej Dios, tä hiw'en n'amhohen nilhokej m'ayhay tä lhäy'e lhip tä wuj yämlek lhakäjyaj in'amejen. 18Häte fwenho, is chik iwoye m'ak tä is, häpkhilek lakäywet tä matche häpe t'at lechumtes tä isen tä iwoye, wet ihumin tä hiw'enho wet tisi elh häp m'ak tä iyej. 19Chik iwoye täjtso, yenlhi lhamhohen lefwetes lakäywet tä tatay alhoho, wet isakanhiyeja lew'atshancheyaj tä matche.
M'ak tä ilepese tä Pablo ne'tek Timoteo iwoye
20Timoteo, amajej m'ak tä Dios t'ekhayej ame. Yej tach'ahuye n'olhämtes tä lew'et honhat, tsi wohit'a m'ak chik tälhe, wok häp m'ayhay tä ni'isa tä wichi yen häpeya “n'ohanyaj”. 21Tsi iyhäj tä yen häneka n'ohanyaj tä oyämetso, lhamel nistakej t'at t'ekhahyaj.
Is chik Lhawuk lep'altsenyaj i'amejen.
