2~Crón 10

₁Roboam yistejlä Israel lhayis tä ihoye Sikem häpkhilek õyen häpeya rey. ₂Tä Jeroboam, Nabat lhäs, ihanch'oye täjtso, wet yäple Israel tä tälhe Egipto. M'ak tä tamenej tä ihi p'ante Egipto, häp tä nowaye Salomón. ₃Wet Israel lhayis iwo chenekaye, wet tä näm, nilhokej lhamel yikche tä ihoye Roboam. Wet lhamel yämhoplhi Roboam wet yok:

₄–Äytajche m'ak tä ajcha Salomón iwoyejnaj n'oyehen. Athana tä am tä aniyat, äm tawäjäy olhamel ochumet lhäy'e olhuk tä choyhat tä ajcha ilhuhyennaj n'oyejen. Häpkhilek olhamel lajit whäya tä oayen oka niyata.

₅Roboam nichulho wet yok:

–N'aleyej ayej tä y'alhaihutwek. Mähen, tapila n'oye chik tres ifwalas.

Wet wichi iwoye, lhamel yikch'oye. ₆Wet rey Roboam tay'ätshane hin'ol tä thänhäy tä lajcha Salomón lech'otfwas p'ante, wet yok:

–¿Atsi m'ak tä owoye häpkhilek onchulho wichi tä tay'ätshan n'oye?

₇Lhamel nichulho wet yok:

–Chik ahäpe elh tä t'uhläk is m'ak tä iwoyeje wichi, is chik lewoye m'ak tä t'alhej ame, häpkhilek lajit whäya tä lhamel ayen häpeya laka niyat.

₈Mat Roboam iwohiyet'a wichi tä thänhäy lhämet tä ifwenho, mat tay'ätshane iyhäj tä lew'awlhafwas tä lech'otfwas. ₉Wet yok:

–¿Atsi m'ak tä amel lefwel n'oho, häpkhilek onchulho häp wichi tä t'alh n'oye chik nemhit oyäm choyhat häp lhamel lechumet lhäy'e lelhuk tä choyhat tä ojcha ilhuhyenejen häp lhamel?

₁₀Wet häp lew'awlhafwas yok:

–Tä wichina t'alhej ame chik lhäm tawäjäy lhamel lelhuk tä choyhat naji tä ajcha ilhuhyenej häp lhamel, chulhola lhamel, olak, “Chik ojcha ni'isa n'aji, olham hich'atej tä n'am lha'isyenla. ₁₁Chik yämn'aj choyhat amel alhuk, olham nemla koyhyaj tä olhuhyen amejen m'ak tä matche tä choyhat. Chik itasinn'aj amejen häp letasnhat, wet olham otasnhila amejen otasnhat tä lechinaj ihi lepes.”

₁₂Taj tä tres ifwalas, wet Jeroboam lhäy'e nilhokej Israel lhayis lhamel yachajo p'ante tä ihoye rey Roboam. Tsi lhamel iwoye rey lhämet tä yok, “Amel tapila n'oye chik tres ifwalas.” ₁₃Wet rey yäm äytajche lhämet tä nichulhejo wichi, tsi nemhit iwoye hin'ol tä thänhäy lhämet tä ifwenho. ₁₄Itenche t'at lew'awlhafwas lhämet tä yok:

–Chik ojcha yämn'aj choyhat häp amel alhuk, wet olham nemla koyhyaj tä olhuhyen amejen m'ak tä matche tä choyhat. Wet chik ojcha itasinn'aj amejen letasnhat, wet olham otasnhila amejen otasnhat tä lechinaj ihi lepes.

₁₅M'ak tä tamenej tä rey nitch'ahuyaye häp wichi, häp tä Lhawuk t'at tä letichunhayaj. Tsi t'uhläk imatitche lhämet p'ante yämyenejlhi profeta Ahías tä lew'et Silo tä ifwenho Jeroboam, Nabat lhäs.

₁₆Tä Israel lhayis hiw'en häp rey tä niwoyaye m'ak tä lhamel t'alheje, lhamel nichulho wet yok:

–¡Roboam tä ahäpe David cheyäs, is chik am tä let'uye haw'et lheley! ¡Olhamel nemhit olhay'aje David niyatyaj, häp Isaí lhäs! ¡Nech'e matchep'a tä nemhit olhamel oelhp'a! ¡Mäh n'ekhen, Israel lhayis, n'äple lhaw'etes!

Wet Israel lhayis yikhen, yäpnhomche lhamel lew'etes. ₁₇Mat lhamel tä ihi Judá häp tä yen laka niyata Roboam. ₁₈Wet Roboam ichen Adoniram häpkhilek ichumyenwethä Israel lhayis. Mat lhamel ilän Adoniram, ithatejlhi häp tuntey. Wet tä Roboam iläte tä tetso, wet yokwet inuho laka kaletaj wet ihoye Jerusalén. ₁₉Häp tä mälhyej p'antetso tä Israel lhayis nech'e tatayhlä häp David leniyatyaj, pajtha ifwalasna.