Abiam niyatej Judá
1Ihi p'ante dieciocho nekchämis tä Jeroboam niyatej Israel, wet Abiam nech'e iwo tesa tä lhayen niyata tä ihi Judá. 2Wet tres nekchämis tä ihi Jerusalén tä iwoye niyat lechumet. Wet lako lhey p'ante Micaías, häp Uriel tä Gabaa lhele lhäse.
Wet Abiam lhäy'e Jeroboam lhamel tataywek p'ante wet yenlhi n'oka'tshayaj. 3Abiam tachuma cuatrocientos mil (400.000) sip'äl tä takhajayhen tä ichene n'oka'tshayaj. Wet Jeroboam tachuma ochocientos mil (800.000) laka sip'äl tä takhajayhen tä itayhatlä elh kasip'äl. 4Wet Abiam iho'pe chenaj tä atofwphä tä lhey Semaraim tä ihi honhat tä lewuk wichi tä tälhe letes Efraín. Wet takasitpe wet t'än, yok:
–¡Jeroboam lhäy'e nilhokej Israel lhayis, ch'ahuyay n'oye! 5¿Hä amel kahanayej tä Lhawuk tä Israel laka Dios yachaje p'ante David lhäy'e leles häp n'oniyatyaj tä ihi Israel, pajla'tha nichäte lepes lheley? Tsi Dios ilehichet'a lhämet tä matche tä iwoyeje p'ante David. 6Wet mat Jeroboam tä lajcha Nabat tä David lhäs Salomón lakawo, lhaikhajyen p'ante wet tatayhlä laka niyat. 7Wet hin'ol tä w'et m'ayhay t'at lhäy'e tä ch'atej tä ni'isahen, lhamel lhaihutej p'ante Jeroboam wet lhamel ikänchi p'ante häp Salomón lhäs Roboam letichunhayaj. Wet tä häpe elh tä kamaj kamatachek thaläkw, wet ilät at lhame tä m'ak iwohiyet'a wet ikalhihit'ak tatayhlä lhamel.
8“Athana wet amel lefwetaj letatayhlä häp Lhawuk leniyatyaj tä iyej David leles, tsi häp tä lew'en tä amel awujpey wet aka dios lhayis ihi tä häpe w'asetaj les peykas tä oro tä Jeroboam lhenhay p'ante. 9Amel lechenchephä Lhawuk laka sacerdotes tä tälhe letes Aarón, lhäy'e häp Leví lhayis, wet lhenchelhi amel aka sacerdotes, tet iwoye wichi tä ihiche iyhäj honhatil tä kahäpeya Lhawuk kawichi. Elh at chik häpe tä näm tä ichäj w'asetaj tä pumfwetaj lhäy'e siete tson'atas tä hin'ol, wet ilänhen lhamel tä lhayen t'amajchetayej dios tä kamatache, amel lhen häpeya sacerdote.
10“Mat olhamel wet oka Dios häpe t'at Dios tä Lhawuk, wet olhamel olehiyejt'a. Wet sacerdotes tä in'oyejen tälhe t'at letes p'ante Aarón, wet lhamel tach'ote t'at Lhawuk lechumet, lhäy'e lech'otfwas tä häpe Leví lhayis. 11Tä nech'e fwala lhäy'e tä honaj lhamel yen n'okhayajayej Lhawuk häp itshätäy tä õ'wunhomche, lhäy'e häp incienso tä lenij akäjche, wet iti'pe mesa tä Dios t'amajchet häp pan wet iwunhen n'ochäkwis häpkhilek y'ohomche tä ihiche lehis tä oro honajpej. Tsi häp tä olhamel owoye nilhokej häp Lhawuk Dios lhämtes tä t'uhläk olhamel owoye, mat amel wet leleyej Lhawuk. 12Is chik amel lehanej tä Dios in'oyejen. Wet ikana laka sacerdotes, wak'alhen lefwolis tä yafwuthichehena tä t'änejn'o amehen chik ottay ahilähen. ¡Israel lhayis, yej tatayhlä Lhawuk tä atetsel laka Dios, tek letumlahlä!”
Judá lhayis lhäy'e Israel lhayis iwo laka'tshayaja
13Wet Jeroboam ichen iyhäj laka sip'äl, t'uhläk tälhche iyhäj w'echehi tä ichowalhe. Mat tä wuj Jeroboam kasip'äl, kamaj wuj iyhäj sip'äl tä imälhehi tä ihi tä Judá kanifwotas tatache. Wet iyhäj tä tälhche Judá lhayis w'echehi, ikelit t'at tä tatayhlä Judá lhayis. 14Tä Judá lhayis iyahinlä letayhfwas, hiw'enlä lhamel tä ihi tä tatache lhäy'e iyhäj letayhfwas tä tälh w'echehi tä inuye. Wet lhamel t'änch'oye häp Lhawuk chik tach'ote lhamel, wet sacerdotes ikelit tä yafwutchehen lefwolis. 15Wet tä Judá lhayis t'änhen tä ihän Abiam tä ihohlä letayhfwas tä inuye, wet Dios ikalhi Jeroboam lhäy'e nilhokej Israel lhayis. 16Wet Israel lhayis lhamel inukwe alhohohlä häp Judá lhayis, tsi Dios lham tä yachaje Judá häp lhamel häpkhilek Judá lhayis ilänhen. 17Wet Abiam lhäy'e laka nifwotas lhamel ilänhen quinientos mil (500.000) Israel lhayis. Matche tä wuj p'ante, häpe t'at sip'äl tä takhajayhen tä õ'länhen. 18Wet ifwalatso lhamel lhaihowatshan'atwethählä häp Judá lhayis. Wet Judá lhayis matche tä lhain'älit tä takhajayhen, tsi häp tä t'ekhaye Lhawuk tä letetsel laka Dios, häp tä tamenej tä tach'ote lhamel.
19Wet Abiam ihänlhi Jeroboam, wet isoyej häp honhates tä hupuy ihiche tä häpe Betel, Jesana, wet Efrón, lhäy'e wichi lew'etes tä tott'ahomche honhatestso. 20Wet Jeroboam nemhit iche p'ante ifwala chik yachajo chik takhajay leniyatyaj häp ifwalas tä kamaj iläy Abiam. Wet tä lepese Lhawuk iwo m'akayej wet y'il Jeroboam. 21Mat Abiam wet nemhit koyhyaj tä takhajay leniyatyaj. Wet tachuma catorce atsinhay tä yen lech'efwasa, wet leles tä ihihlä häp atsinhayna ihi veintidós tä hin'ol wet dieciséis tä atsinhay. 22Wet m'ayhay iyhäj tä Abiam iwoye, lhäy'e lechumyaj tä iwoye, ihi t'at n'olesaynekhi tä yäme profeta Ido lechumet p'ante.
