2~Crón 14

₁Tä Abiam y'il p'ante tä nech'e ihoye lechätilis, wet õtjänlä, õ'tihi David laka Hupuy. Wet lhäs tä lhey Asa häp tä icheyäjo lajcha leniyatyajw'et. Wet diez nekchämis tä iwo tesa leniyatyaj wichi letamsek ihi.

₂Wet Asa is alhoho m'ak tä iwoye, wet Lhawuk tä laka Dios akäjejlhi. ₃Inachuhen altares tä Israel lhayis ihoyepej tä n'okwiyej dios lhayis tä w'enha lhamejen. Äpte inachuhen len'okhayajw'etes tä i'pe chenhas, wet iwasthiche nilhokej tuntey tä lhamel yen t'amajchetesa, wet ifwajomche hal'äy tä Asera lepeykas tä lhamel yen laka dios tsinhaya. ₄Äpte inityenej Judá lhayis chik lhamel t'ukwe Lhawuk tä letetsel laka Dios wet iwoye nilhokej lhämtes. ₅Wet iwasthiche nilhokej n'on'okhayajw'etes tä ni'isahen tä ihiche honhatil tä hupuy ihiche tä ihi Judá, lhäy'e häp altares. Wet wichi wuj tä letamsekis ihi ifwalas tä Asa ihi leniyatyaj. ₆Wet Asa iwo kotsayej tä letamsek ihi honhat tä newache n'oka'tshayaj, tsi häp tä Lhawuk tä hiw'enho letamsek. Wet yenchelhi honhatil tä takhajayhen tä hupuy ihiche tä ihi Judá. ₇Wet tahuyej wichi wet yok:

–N'enchelhi häp honhatilna häpkhilek takhajayhen. Wet n'enchelhi lelafwey tä tuntey wet n'atiche'pe hupuy tä atoschephä tä sip'äl ihiche tä iyahinpe honhat, lhäy'e n'olafwey lepe p'otes, lhäy'e lechinhas tä y'atihiche. N'awo kotsayej tä kamaj n'amel tä n'alewuhuy honhatna. Tsi häp tä n'amel y'at'ukwe Lhawuk Dios, wet lham tä hiw'en n'amhohen lhatamsek, wet nemhit lhatayhfwas n'aiyhäj tä ilhawhäyehen.

Wet lhamel yenchelhi p'ante häp honhatiltso, wet matche, t'aytshi tä takhajayhen.

₈Asa hiw'en trescientos mil (300.000) sip'äl tä Judá lhayis. Wet wak'alh nilhokej takwelheley tä lehunis lhäy'e n'oka'tshayajchal tä hip'oyej letapehen. Äpte hiw'en doscientos ochenta mil (280.000) sip'äl tä tälhehen wichi tä tälhe letes Benjamín. Lhamel ichäj lelutses tä hal'äy lhäy'e n'oka'tshayajchal tä hip'oyej letapehen. Wet nilhokej lhamel tä häpe sip'äl tä takhajayhen p'ante.

₉Wet hin'o tä lhey Zera tä Etiopía lhele tatayp'antehlä lhamel, wet ichäj lhamche un millón sip'äl wet trescientos kaletas tä n'oka'tshayajchal. Wet lhamel nekhen pajtha nichäte lhip tä lhey Maresa. ₁₀Wet Asa lhäy'e laka nifwotas yikhen tä yistejlä häp letayhfwas, wet itshupyene chenhas kawayhi tä ihi honhat tä lhey Sefata tä iwhäye häp Maresa. Häp tä t'uhläk ihi tä iwo laka'tshayaja. ₁₁Wet Asa t'äne häp Lhawuk tä laka Dios häpkhilek tach'ote, wet yok:

–Iwuk, newache elh chik häte iwoye häp am tä lehanej lewoyneja chik letach'ote elh tä nitkhajaya, chik elh tä takhajay tatayhlä tä iwo laka'tshayaja. Ch'ot n'oyehen, Iwuk tä olhamel oka Dios, tsi olhamel ot'ekha ame. Häp tä tamenej tä olhamel onekhen tä ot'ekhaye häp ey tä in'oyejen wet olhamel ottayhlä häp nifwotaj tä wujna. Ahäpe Owuk tä olhamel oka Dios. Is chik alen'älit tä newache elh chik ikalh amhi chik fwetaj tatay ahilä.

₁₂Wet Asa lhäy'e Judá lhayis Lhawuk tach'otehen häp lhamel wet ikalhi häp Etiopía lheley, wet lhamel noway wet yikhen. ₁₃Wet Asa lhäy'e laka sip'äl lhamel takähännhej Etiopía lheley pajtha nichäte lhip tä lhey Gerar, wet ilänhen lhamel pajtha nofwej. Niwohit elh chik imälhehi häp Etiopía lheley, matche tä nofwej, tsi Lhawuk t'at lhäy'e laka nifwotaj tä itäyhthen lhamel. Wet Judá lhayis tachuma lakäywet tä wuj wet ilhokon tä ichäje lhamel laka honhat tä lew'et. ₁₄Wet äpte lhamel ikalhi nilhokej honhatil tä tott'aho häp Gerar, tsi nech'e wichi tä ihi wuj tä itiyej lenowayhyaj häp Lhawuk. Wet Judá lhayis tachuma lakäywet tä wuj. ₁₅Wet äpte lhamel inuye wichi tä i'pe alhos tä hit'ekyenwethä leläy, wet isoyej wuj tson'atas lhäy'e camellos wet ichäj. Tä ileyej laka'tshayaj, wet yäple häp Jerusalén.