1Tä nichäte p'ante treinta y seis nekchämis tä Asa ihi leniyatyaj, wet Baasa, Israel laka rey, tatayhlä Judá, ikhajyen häp hupuy tä Ramá häpkhilek newache elh chik inuphä wet äp newache elh chik näm chik tach'ote Asa. 2Wet Asa tachuma oro lhäy'e plata tä ichufwi Lhawuk Lewukwe, lhäy'e tä ichufwi häp lham lewukwe. Wet ichene Ben-hadad, Aram laka rey tä lew'et Damasco, wet lhämet yok:
3–Am lhäy'e olham is chik n'alhalepuhfwas t'at ifwalana. N'aten lhajchalis m'ak tä is tä iwoyejte lhamehen. Ochen ame oro lhäy'e plata. Is chik leleyej tä lhen apuhfwaya häp Baasa, Israel laka rey, häpkhilek ileyej tä tatay n'ohlä.
4Wet Ben-hadad iwoye elh lhämet, wet ichen laka sip'äl, ne'tek inuye Israel lhayis laka honhat lhipey tä hupuy ihiche. Wet ikalhi Ijón, Dan, lhäy'e N'och'atkanyajw'et, lhäy'e nilhokej hupuy tä sip'äl lew'etes tä ihi honhat tä lewuk wichi tä tälhe letes p'ante Neftalí. 5Tä Baasa ihanej, ileyej lechumet tä fwetaj ikhajyen häp Ramá. 6Wet nech'e rey Asa t'äne nilhokej Judá lhayis, wet lhamel talhunej tuntey lhäy'e hal'äy tä ihi Ramá tä Baasa fwetaj ikhajyenej Ramá. Wet häp tä rey Asa ikhajyenej hupuy tä Geba lhäy'e Mispa.
7Häp lewhäytso profeta tä lhey Hanani ihoye häp rey Asa wet yok:
–Nemhit let'ekhaye Lhawuk Dios, let'ekhaye Aram laka rey. Chik let'ekhahiye Lhawuk, lekalhihin'e Aram laka rey kanifwotaj. 8Lhek tichunche ifwalas tä pajche tä Etiopía lheley lhäy'e Libia lheley wuj tä lhaikhajyenhen yämthilek inuhte amehen. Matche tä wuj laka nifwotas, wujtaj'atpey sip'äl tä iche'pe yel'atas lhäy'e häp kaletas tä n'oka'tshayajchal. Mat tä let'ekhayehte Lhawuk, wet lham tach'ot ame yämthilek lekalhi lhamel.9Tsi Lhawuk tatey itetshanpej häp m'ak tä i'pe honhat, wet hiw'enhopej lakhajyhayaj häp wichi tä matche tä t'ekhaye häp lham. Athana tha matche tä alhen at ch'isukwa. M'ak tä lewoye'tha, tälhe athana tä lajit lepesa n'oka'tshayaj tä ihla amej.
10Wet tä Asa iläte häp profeta lhämtes, matche tä nichuwete wet ithatho n'op'onthi. Wet äpte iche p'ante wichi iyhäj tä lham iwoyeje lakey tä ni'isa.
11Häp m'ayhay tä Asa iwoye, tälhe tä iwo tesa leniyatyaj pajtha äp lepes leniyatyaj, ihi t'at n'olesaynekhi tä lhey “Reyes tä ihi Judá lhäy'e Israel.” 12Tä Asa hiw'en treinta y nueve nekchämis tä ihi leniyatyaj, wet t'inhayaj nichäte, wuj tä ni'isa, ihiche lepach'ol. Mat t'uhikwet'a lechesyaj tä tälhe Lhawuk, tajlhama tä fwetaj t'ukwe lechesyaj tä tälhe kachawos. 13Wet y'il p'ante tä nech'e ihoye lechätilis tä lham hiw'en cuarenta y un nekchämis tä ihi leniyatyaj. 14Wet õ'häne p'ante lep'itsek häp n'op'itsekw'et tä lham pajche iwaklhat lhamho tä ihi David laka Hupuy. Wet õ'ti'pe n'omäwet tä ichufwi n'op'itsekw'ettso tä tapoyej m'ak tä lenij akäjchehen tä wichi tä wuj tä ihanejen tä iwaklhat. Tä tajyäme täja, wet õ'lhänhi itäj tä wuj tä õyen tetnekayej len'ohyaj.
