2~Crón 17

₁Asa lhäs Josafat häp tä icheyäjo lajcha leniyatyajw'et, wet häp hin'o tä lhaikhajyenpe Israel. ₂Itihiche sip'äl häp nilhokej honhates tä takhajayhen tä hupuy ihiche tä ihi Judá, wet äp itihiche sip'äl iyhäj tä t'uye iyhäj lhipey tä ihi Judá lhäy'e häp honhates tä ihiche lhip tä lewuk wichi tä tälhe letes Efraín tä lajcha Asa ikalhiche p'ante wet lhayen lewukwa.

₃Wet Lhawuk iyej häp Josafat, tsi häp tä iten lechäti David lakey tä ichun p'ante tä ihänlhi häp Lhawuk. Wet tek ihänlhi Ba'al lhayis lepeykas tä w'enhache lhamejen, ₄mat ihänlhi häp Dios tä lechäti laka Dios. Iwoye nilhokej lhämtes wet itenhit'a m'ak tä Israel lhayis iwoye tä ni'isa. ₅Häp tä tamenej tä Lhawuk ikhajyen häp Josafat leniyatyaj. Wet nilhokej Judá lhayis tä iwo t'awayhata, pajtha wuj p'ante häp lakäywet tä hiw'en lhäy'e häp len'ohyaj tä wuj tä ihi. ₆Wet wuj tä akäjejlhi tä inukwehen Lhawuk len'äyhäy, wet inachuhen p'ante häp n'on'okhayajw'etes tä i'pe chenhas tä ihi Judá, wet lhäy'e häp hal'äy tä Asera lepeykas tä wichi yen laka dios tsinhaya.

₇Wet tä ihi leniyatyaj tres nekchämis, wet ichen leniyatfwas tä lheyis Ben-hail, Abdías, Zacarías, Natanael, wet Micaías, häp tä lhamel ichufwen häp Judá lhayis tä ihiche lew'etes. ₈Wet hip'ajtej Leví lhayis tä lheyis Semaías, Netanías, Zebadías, Asael, Semiramot, Jonatán, Adonías, Tobías, wet Tobadonías. Wet sacerdotes tä yikche häp lhamel Elisama lhäy'e häp Joram. ₉Õ'chenchufwi häp lhamel n'olesaynekhi tä Lhawuk lhämtes ihi, häpkhilek lhamel ichufwenejen häp wichi tä Judá lheley. Wet lhamel ilunche nilhokej honhates tä Judá lhayis lew'etes wet ichufwenejen häp wichi tä ihiche.

₁₀Wet nilhokej n'oniyatyajay tä ihiche honhates tä iwhäye Judá, lhamel wuj tä nowaye häp Lhawuk wet nemhit ikalhi chik tatayhlä Josafat. ₁₁Wet iche Filisteo lhayis tä ihäne t'awayhtes häp Josafat, lhäy'e plata tä lhamel tiskanpe m'ak tä Josafat t'alhe'pe. Wet Árabe lhayis ihäne siete mil setecientos (7.700) tson'atas tä hin'ol, wet kayla lhayis tä hin'ol kamaj äp tettso siete mil setecientos (7.700).

₁₂Wet Josafat matche t'at tä t'aylhatshi häp len'ohyaj. Wet yenchelhi hupuy tä hin'ol tä takhajayhen tä õy'uhyene honhat ihiche, lhäy'e häp honhates tä hupuy tä sip'äl lewukwey ihiche. ₁₃Wet wuj m'ak tä lham tä lewuk tä hiw'en tä ihiche honhates tä Judá lhayis lew'etes.

Wet äpte Josafat hiw'en sip'äl tä takhajayhen tä ihi häp Jerusalén, ₁₄mälhyej iyhäjpej tä lhalepuhfwas:

Häp Judá lhayis kasip'äl kaniyat häpe p'ante Adna, wet lhäy'e häp trescientos mil (300.000) hin'ol tä takhajayhen. ₁₅Wet sip'äl kaniyat elh häpe Johanán, wet äp lhäy'e doscientos ochenta mil (280.000) laka sip'äl. ₁₆Wet äpte iche häp hin'o elh tä lhey Amasías, Zicri tä lhäs. Lham t'at tä letichunhayaj tä t'uhläk tach'ote häp Lhawuk, wet hiw'en doscientos mil (200.000) sip'äl tä takhajayhen.

₁₇Wet häp wichi tä tälhe letes Benjamín, lhamel laka sip'äl kaniyat häpe p'ante Eliada. Hiw'en doscientos mil (200.000) laka sip'äl tä lelutses hal'äy lhäy'e n'oka'tshayajchal tä hip'oyej letapehen. ₁₈Wet sip'äl kaniyat elh häp tä lhey Jozabad, hiw'en ciento ochenta mil (180.000) laka sip'äl tä wak'alhen t'at chik iwo laka'tshayaja.

₁₉Häp p'ante tähestso häp sip'äl tä tach'ote rey Josafat. Äpte iche iyhäj tä rey itihiche honhates tä Judá lheley lew'etes häpkhilek takhajayhen.