2~Crón 18

₁Rey Josafat hiw'en p'ante wuj lakhäy wet äpte wuj len'ohyaj tä ihi. Wet nech'e yen elha häp rey Acab tä Israel kaniyat, tsi häp tä itiyej lhäs häp Acab lhäse. ₂Tä tajyäme iyhäj nekchämis, wet Josafat yik tä ihoye häp Samaria, isikaye Acab. Wet Acab yäm wuj tson'atas lhäy'e w'asetas tä ilänhen, tsi iwo lakäjyaja tä Josafat näm lhäy'e iyhäj tä nekche. Wet t'äne Josafat chik tach'ote tä inuye häp honhat tä hupuy ihi tä lhey Ramot tä ihi Galaad. ₃Yok:

–¿Hä lenekla n'okwe chik onuye Ramot?

Josafat nichulho wet yok:

–Olham lhäy'e oka sip'äl olhamel olhaip'ajtit amej lhäy'e aka nifwotaj. Oyikhilat amchehen tä lewo aka'tshayaja. ₄Mat is chik y'achunkat tä n'at'ukwe chik häpe Lhawuk lenech'ethayaj m'ak tä y'awoye.

₅Rey Acab t'äne cuatrocientos profetas, wet tay'ätshane, yok:

–¿Hä is chik olhamel onuye Ramot tä ihi Galaad, wok n'am nuye?

Lhamel nichulho wet yok:

–Nuye, tayhlä. Dios tach'otla ame yämthilek lekalhi.

₆Mat Josafat tay'ätshane Acab wet yok:

–¿Hä newache elh profeta chik ichena häpkhilek n'aisej chik y'aty'ätshane Lhawuk?

₇Acab nichulho Josafat wet yok:

–Kamaj iche tefwaji profeta tä n'aisej chik y'aty'ätshane häp Lhawuk. Häpe Micaías, Imla lhäs. Mat matche tä on'äyiho, tsi chik oty'ätshane, ts'ilak owit'äyhyaj tä ifwel n'oho. Ohanhiyejt'a chik ifwel n'oho m'ak tä is.

Josafat yok:

–¡Kha, yej woynejatso ämet!

₈Wet Acab t'äne häp lech'otfwa wet yok:

–Ukwe Micaías, Imla lhäs. Is chik yokwet näm.

₉Wet Israel lhayis laka rey Acab lhäy'e Judá laka rey Josafat, lhamel taw'uyhiche lakhäy tä leniyatyaj w'uyis, tatayhichephä t'at leniyatyajw'etes tä ihi plaza tä ihi Samaria lepe. Wet nilhokej profetas tä iwo profeta lhämeta tä ihi tä lhamel tatache. ₁₀Wet Sedequías, Kenaana lhäs, yenlhi lech'ul tä lechinhas, wet t'än, yok:

–Lhawuk lhämet yok, “N'och'ulna ilänhihena Aram lhayis pajla'tha nofwej.”

₁₁Wet nilhokej profetas lhamel lhämet häpe t'at tä inityenej rey, yok:

–Nuye Ramot tä ihi Galaad, lekalhihila, Lhawuk tach'otla ame.

₁₂Wet hin'o tä õ'chen tä t'ukwe Micaías, yäme wet yok:

–Lhek yahinya, nilhokej häp profetas lhämet tefwaj'atni. Ihichet'a elh chik w'enha lhamej lhämet tä ifwenho rey tä ikalhihila letayhfwas. ¡Huwa ämlhi, is chik ämet hätet iwoye lhamel lhämet! Fwenho t'at häp rey tä ikalhihila t'at letayhfwas.

₁₃Micaías nichulho wet yok:

–Lhawuk ihanej tä matche olhämet, tä oyenla lhämeta lham tä oka Dios lhämet tä isukun n'oyej chik oyen lhämeta.

₁₄Wet Micaías ihoye rey, wet rey tay'ätshane, yok:

–Micaías, ¿hä is chik olhamel onuye häp Ramot tä ihi Galaad, wok n'am nuye?

Micaías nichulho wet yok:

–Nuye t'at, lekalhihila. Dios tach'otla ame.

₁₅Mat rey yok:

–¿Chihtefwas lewhäyes tä onityen amej chik kafwela n'oho m'ak tä kamatache chik tälhe Lhawuk?

₁₆Micaías yok:

–Lhawuk ipäyen n'oye tä nilhokej Israel lhayis kanifwotas w'et ifwtsat'atpehen häp chenhas, hätet iwoye tson'ataspej laj lewoya. Wet Lhawuk yok, “Äp lewuk ihihit'a. Is chik elhpej letamsek ihi, yäple t'at lew'et.”

₁₇Tä Acab iläte Micaías lhämet, wet yäme häp Josafat wet yok:

–¿Hä kahäpeya tä ofwelmat amho? Profetatsi ihanhiyejt'a chik ifwel n'oho m'ak tä is. Tajlhama owit'äyhyaj tä ifwel n'oho.

₁₈Wet Micaías y'isej elh lhämet wet yok:

–Ch'ahuye Lhawuk lhämet tä oyen lhämeta. Ow'ene Lhawuk tä tatayhiphä leniyatyajw'et, wet nilhokej pule lheley tä lhaihute. Takasthen tä ihi lhip tä lefwomkat lhäy'e lhip tä lets'amkat. ₁₉Wet Lhawuk tay'ätshane lhamel wet yok, “¿Atsihilak inityenej Acab, Israel laka rey, chik inuye Ramot tä ihi Galaad, häpkhilek y'il?” Lhamel tay'ätshan lhamehen wet yok, “¿Atsi m'ak tä y'awoye?” ₂₀Wet iche tefwaji espíritu tä ihoye Lhawuk wet yok, “Olhamlak okanej.” Wet Lhawuk yok, “¿Atsihila m'ak chik lewoyneja yämthilek lekanej?” ₂₁Lham nichulho wet yok, “Ohohiyela, oyämyenhiyejlhila lhämtes tä kamatachehen nilhokej häp rey laka profetas.” Tä Lhawuk iläte, wet yok, “Is t'at atichunhayaj. Mäh t'at, woynejatso m'ak tä lewoyeje.”

₂₂Wet Micaías yäme rey Acab wet yok:

–Athana wet nech'e lehanej t'at tä Lhawuk itihiche aka profetas lak'as häp espíritu tä lhämtes kamatachehen. Tsi nichäte lewhäy tä Lhawuk hiw'en amho awit'äyhyaj.

₂₃Wet Sedequías, Kenaana lhäs, lhayämte häp Micaías, wet y'ajej takwech'o elh ch'alo wet yok:

–¿Chiwoye chik lefwetaj Lhawuk laka espíritu yikm'at n'och'oye wet häp tä yämlhi amho?

₂₄Micaías nichulho wet yok:

–Lehanhiyeja t'at chik nichäte ifwala tä let'uychufwi hup chik häpe tä leweskatlä atayhfwas.

₂₅Wet Acab tahuyej lakawos wet yok:

–Chumaye Micaías, häne hupuyna laka gobernador Amón lhäy'e olhäs Joás. ₂₆Fwenhola tä olham tä ot'uhläk õ'tihi n'op'onthi, wet is chik ts'ilak t'at pan lhäy'e inät tä õhw'enho ifwalapej pajla'tha otpil, otfwayej otayhfwas.

₂₇Micaías yok:

–Letapinhila t'at, letafwayhiyeja atayhfwas, chik kamatache tä Lhawuk lhämet n'oyej. ¡Mat letapinhit'ala!

₂₈Wet Israel lhayis laka rey Acab lhäy'e Judá laka rey Josafat, lhamel yikhen tä tatayhlä hupuy tä Ramot tä ihi Galaad. ₂₉Wet Acab tahuyej Josafat wet yok:

–Chik otiyäjo n'oka'tshayaj, wet owo lakhäy iyhäja. Wet am häp tä is chik letaw'uyhiche am akhäy tä aniyatyaj lew'uyis.

Wet Acab iwo iyhäja lakhäy wet lhamel tiyäjo n'oka'tshayaj. ₃₀Wet Aram laka rey tahuyej sip'äl kaniyatey tä yikchufwi kaletas tä n'oka'tshayajchal, wet yok:

–Yej yatchen elhaj wichi. Ts'ilak t'at Israel lhayis laka rey tä ukwe, häp tä is chik lelän.

₃₁Häpet tä sip'äl kaniyatey tä yikchufwi kaletas tä n'oka'tshayajchal hiw'ene Josafat, fwetaj häpe Israel lhayis laka rey. Wet lhamel ilunej tä lhaihutej, t'uhläk ilän. Wet Josafat t'änch'oye Lhawuk Dios, wet ifwayhat wet isoyej letayhfwas. ₃₂Tsi tä lhamel hiw'en tä kahäpeya Israel lhayis laka rey, lhamel ileyej tä t'uhläk ilän. ₃₃Wet iche sip'ä tä w'et tafwomej t'at lech'äha, itayhte Israel lhayis kasip'äl, yiwetpe Acab, yiwtho lew'uyis tä laka'tshayajchal lepesey tä tijwek. Wet Acab tahuyej hin'o tä yikchufwi laka kaletaj wet yok:

–Tilhkathi kaletaj, mähat n'och'oye n'oka'tshayaj. Oisit'a, matche tä otfwoyho.

₃₄Ifwalatso matche tä äytajche n'oka'tshayaj. Wet Acab lhaikhajyen t'at, takasthi laka kaletaj, iyahne t'at letayhfwas Aram lhayis pajtha honaj. Wet tä ifwala y'uy, y'il.