2~Crón 19

₁Josafat, Judá laka rey, letamsek ihi t'at tä tälhe n'oka'tshayaj, wet yäple lew'et tä ihi Jerusalén. ₂Wet profeta Jehú, Hanani lhäs, yik tä yistejlä. Wet tä hiw'en, wet yok:

–¿Chipte tä letach'ote Acab, häp hin'o tä ni'isa, wet alhen t'unfwaya wichi tä tatayhlä häp Lhawuk? Wet m'ak tä lewoyena tamen amej tä Lhawuk nichuwet ame. ₃Tha häp tä iche achumtes tä isen tä lewoye, mälhyej tä lewasthiche hal'äy tä Asera lepeykas tä wichi yen laka dios tsinhaya tä ihi honhat tä Judá. Wet ahäpe hin'o tä iwoye Dios lhämtes.

₄Josafat ihi t'at häp Jerusalén mat yen lakeya tä isikaye wichi tä ihi lham laka honhat, tälhe häp Beerseba tä ihi lhip tä tapinhiye pajtha nichäte häp chenhas tä tafwojhiye tä ihi honhat tä lewuk wichi tä tälhe letes Efraín. Wet Josafat inityenej wichi chik yäple Lhawuk tä lhamel letetsel laka Dios. ₅Wet lham itihiche n'okalelhthayajwos nilhokej häp hupuy tä takhajayhen tä Judá lhayis lew'etes. ₆Wet yäme häp n'okalelhthayajwos wet yok:

–Lhek tetshan häp m'ak tä amel lewohiyela. Tsi häpkhit'a hin'ol lechumet tä lhenhilhila, mat häpe Lhawuk lechumet, wet lham it amejen chik lewoyaye akalelhthayaj. ₇Is chik amel lenowaye häp Lhawuk wet tetshanpej m'ak tä lewoyaye. Tsi Lhawuk tek iteläytej n'okalelhthayaj tä ni'isa alhoho, lhäy'e tä kaw'awlhatahchä wichi tä letetshan, wok letach'ote elh tä atis.

₈Wet äpte Josafat itihi Leví lhayis lhäy'e sacerdotes häp Jerusalén, lhäy'e iyhäj Israel lhayis tä niyatej lew'et lheley lhäy'e lepuhfwas. Wet ne'tek lhamel iwopej lakalelhthayaja, mälhyej tä Lhawuk lhämet ne'tek õ'woye, wet äp ne'tek itetshan iyhäj tä inokwajwethä lhamejen. Häp Leví lhayistso, lhäy'e sacerdotes, lhäy'e hin'oltso tä niyatej lew'et lheley lhäy'e lepuhfwas, lhamel ihi t'at Jerusalén tä yenlhi lechumettso. ₉Wet Josafat tahuyej häp lhamel wet yok:

–Is chik amel lenowaye häp Lhawuk, wet yej leyej, wet tiyej len'ohyaj. ₁₀Wet chik nämhen aiyhäj tä haw'etfwas tä tälhe honhates tä yen lew'etesa, chik t'uhläk amel letetshan n'olänek wok kan'oläneka, wok iwatläk lewoyay akalelhthayaja, mälhyej tä Lhawuk lhämtes ne'tek õ'woye, is chik lefwenho lhamel m'ak tä is chik iwoye yämthilek newache lakey tä ni'isa tä lhamel tatayejlä häp Lhawuk, häpkhilek Lhawuk nichuweta amehen wet nichuwetaye lhamel. Chik mälhyejtso, häpkhilek laj atesa. ₁₁Amarías, häp Sacerdote tä Lhamya, lhamlak niyat amejen tä letetshan m'ak tä ihi Lhawuk lechumet. Wet Zebadías, Ismael lhäs tä niyatej Judá lhayis, lhamlak niyat amejen tä letetshan m'ak tä ihi oniyatyaj. Wet Leví lhayis häp tä amel hach'otfwas t'at. ¡Akhajyenhen, chumwethä! Is chik Lhawuk iyej iyhäj tä is alhoho lechumyaj tä iwoye.