2~Crón 20

₁Tä tajyäme p'ante iyhäj ifwalas, wet Moab lhayis lhäy'e Amón lhayis, lhäy'e häp iyhäj tä lhey Meún lhayis, lhamel nekhen tä inuye rey Josafat laka honhat. ₂Wet iche p'ante hin'ol tä iwo silätaye häp Josafat wet yok:

–¡Nifwotaj tä wuj tä nek, tälhe Edom, tälh w'echehi Lewomekitaj Nosoy, lhamel t'uhläk tatay ahilähen! ¡Wet athana lhamel ihi t'at häp lhip tä lhey Fwitsukw'et T'un!

Häp Fwitsukw'et T'un lhey elh Kayla Kahits'ifwik.

₃Tä Josafat iläte hin'ol tä iwo siläta, wuj tä noway. Wet nech'e t'ukwe häp Lhawuk, wet ifwenho Judá lhayis tä is chik nilhokej lhamel lhaichuyhathen. _4-5Wet lhaihutwek Judá lhayis, lhäy'e iyhäj tä tälhehen nilhokej honhates tä ihi Judá. Nilhokej lhamel lhaip'ajtitwek tä ihi Lhawuk Lewukwe ka'alho tä nech'ayek tä ihi Jerusalén, häp tä t'ukwe Lhawuk lech'otyaj. Wet Josafat takasthi tä lhamel tatache ₆wet yok:

–Iwuk tä olhamel otetsel laka Dios, ahäpe Dios tä pule lhele. Am tä aniyatej nilhokej n'oniyatyajay tä i'pe honhat, akwey wuj tä takhajay. Lekalhi nilhokej m'ak tä lhenlhi, wet newache elh chik tum ahilä chik fwetaj tatay ahilä. ₇Dios tä olhamel oalaka Dios, am tä lhokoschephä p'ante wichi tä lew'etes honhatna tä aka wichi Israel lhayis nekche p'ante. Tsi lhachaje p'ante akalay'i Abraham leles wet yämlek tiyäj'attsiy. ₈Wet tä lhamel yen lew'eta honhatna, lhamel yenlhi amho Awukwe tä Amajchet. Wet yop'antekwe, ₉“Chik näm n'oyehen olhamel owit'äyhyaj, chik n'oka'tshayaj, wok n'ot'inhayaj, wok nehläs, häp tä olhamel ohohiyela tä Awukwena tatache tsi häp tä olhamel ohanej tä lhechufwi Awukwena. Wet olhamel olhakli chik häpe, olhamel ot'alhiyeja ame häp am hach'otyaj, wet letach'ahuhla n'oyehen wet lefwayhthila n'ohen.”

₁₀“Athana lhek yahinlä Amón lhayis lhäy'e Moab lhayis, lhäy'e häp wichi tä lew'etes chenhas tä lhey Seír. Häpe wichi tä len'äyejo p'ante Israel lhayis chik nekho lhamel laka honhates häp ifwalas tä Israel lhayis tälhe p'ante honhat tä Egipto, mat lhamel yikch'oye, ilänhihent'a. ₁₁Athana tä lhamel nitichunache m'ak tä ochätilis iwoye p'ante, wet nek at n'oyehen tä t'uhläk yokos n'ohlähen häp aka honhat tä am tä lew'en p'ante n'ohohen häpkhilek olhamel tä olewuhuy. ₁₂Dios tä olhamel oalaka Dios, ¿hä letasnhit'ala häp lhamel? Tsi häp tä olhamel okhajyhayaj ihihit'a, olhamel tek otumhilahlä chik ottayhlä häp sip'äl tä wujpey tä nek n'oyehen tä tatay n'ohlähen. Olhamel ohanhiyejt'a m'ak tä owoye, häp tä tamenej tä olhamel oyahin hach'oye.”

₁₃Wet nilhokej Judá lhayis takasthen tä ihi tä Lhawuk tatache, hin'ol, atsinhay, n'atfwas, lhäy'e iyhäj tä matche tä lelemsas. ₁₄Tä lhaihutwek lhamel, wet Lhawuk laka Espíritu nichätpe häp hin'o tä lhey Jahaziel. Lham häpe Leví lhayis elh tä lajcha häpe Zacarías, wet lechätilis häpehen p'ante Benaías, Jeiel, Matanías, lhäy'e Asaf. ₁₅Wet Jahaziel yok:

–Ch'ahuyay n'oye, amel tä ahäpehen Judá lhayis, lhäy'e häp amel tä ahäpehen Jerusalén lheley, lhäy'e häp am, Josafat, tä ahäpe olhamel oka rey. Lhawuk yok, “Yej noway wet yej nuhat amhohen häp sip'äl tä wujpey tä nek amehen. Tsi häp tä amenhit'alak lewo aka'tshayajayej lhamel, mat Dios tä iwohla laka'tshayajayej lhamel. ₁₆Chik fwala mähena, hoyela honhat lhip tä ihi tä lhamel tatache. Lhamel nekhihena chenhas kawayhi tä ihi Sis, wet amel lechuthiyeja lhamel chik ihi lepes honhat tä w'awulhchä tä tatayhlä häp honhat tä ts'anis tä lhey Jeruel. ₁₇Häp wichi tä nekhen tä tatay ahilähen, amenhit'alak letatayhlä. Awaklhathena, ehichela lhipey tä aka niyatey iti amhiche. Amel lew'enayhla häp m'ak tä olham tä Awuk Dios owohiyela tä ofwayhat amejen atayhfwas. Nilhokej amel tä ahäpehen Jerusalén lheley lhäy'e nilhokej häp amel tä ahäpehen Judá lhayis, yej noway wet yej nuhat amhohen. Mähena chik fwala, hoyela honhat lhip tä ihi tä lhamel tatache, tsi oihla amejen.”

₁₈Tä Josafat iläte täja, wet nech'e t'upeyhchä pajtha letacho tiji honhat. Wet Judá lhayis lhäy'e häp Jerusalén lheley, nech'e äpte lhamel t'upechehchä wet n'okwiyej Lhawuk. ₁₉Wet Leví lhayis tä tälhe letes Coat lhäy'e iyhäj tä tälhe letes Coré, lhamel nechephä wet ifwitsenej lechoslis tä n'okwiyej Lhawuk tä Israel laka Dios.

₂₀Wet tä nech'e fwamlafwaj lhamel nechephä wet yikhen tä tataye häp honhat tä ts'anis tä iwhäye Tekoa. Wet tä Josafat hiw'en lhamel tä yikhen, wet takasit wet yok:

–Ch'ahuyay n'oye, amel tä ahäpeyay Jerusalén lheley, lhäy'e häp amel tä ahäpehen Judá lhayis. Is chik amel let'ekhaye Lhawuk Dios, wet häpkhilek lelät amehen tä atkhajayhen. Wet äpte ekhaye lham laka profetas, häpkhilek lekalhi atayhfwas.

₂₁Wet rey lhäy'e wichi lhamel yämwethä lhamhohen. Wet tä rey iläte lhamel letichunhayaj, nech'e t'äne häp hin'ol tä ihanej tä ichoywethä tä lhamel lew'uyis häpe n'ot'amajchetes. Wet lhamel yikhen, nekho t'at tä sip'äl tatache, wet lhamel ichoyejwethä tä n'okwiyej Lhawuk wet yok:

₂₂Häpet tä lhamel ichoywethä tä n'okwiyej Lhawuk, wet lham hiw'enho häp letayhfwas tä nemhit ihanej m'ak tä iwoye. Wet nech'e lhamel t'at tä tachum, Amón lhayis lhäy'e Moab lhayis, lhäy'e häp wichi tä lew'et chenhas tä lhey Seír, tä lhamel nekhen tä fwetaj inuye häp Israel lhayis. Mat älhyet nittayahlä, lhamel t'at tä lhailänhen. ₂₃Wet Amón lhayis lhäy'e Moab lhayis lhamel tatayhlä häp iyhäj tä tälhe chenhas tä Seír, wet lhamel tifwej iyhäj tä ilänhen. Wet tä nofwej häp iyhäjtso, wet nech'e lhamel t'at tä lhailänhen pajtha lhaitifwej.

₂₄Wet tä Judá lhayis nichäte honhat lhip tä n'äle ts'anis, wet iyahne häp wichi tä lhamel letayhfwas tä wujpey. Hiw'ene tä lhamel y'inhen, lep'itseyhay ichet katsi, niwohit elhaj chik tafway, nofwej t'at häp lhamel. ₂₅Wet tä Josafat nichäte letayhfwas p'itseyhay, wet laka wichi tachuma lhamel lakäywet tä wuj. Ihutwek itshätäy tä wuj tä nilhoka, lhäy'e häp n'oka'tshayajchal, wet lakhäy, wet lhäy'e m'ayhay iyhäj tä laha ihi, wet lhamel lhayen lewuhuya. Matche tä wuj p'ante häp n'okäywet tä lhamel nilhoka, pajtha nemhit ihanej iwoyneja chik ilhokon tä ichäj. Kamaj wuj tä imälhehchä, mat lhamel imälhteji t'at tä ichäj, tsi ihi tres ifwalas tä lhamel ihutchewek. ₂₆Wet tä nichäte cuatro ifwalas, wet lhamel lhaihutwek tä ihi honhat tä w'awulhchä tä lhey Beraka. Wet lhamel iwunit Lhawuk. Wet häp tä nech'e honhattso lhey t'at Beraka, häp n'olhämet tä yok, Owunit. Pajtha ifwalana tä lhey t'at.

₂₇Wet tä tajyäme täjtso, wet nilhokej Judá lhayis lhäy'e häp Jerusalén lheley, lhamel yikhen, yikche Josafat tä yäple Jerusalén. Lhamel akäswethä, tsi häp tä Lhawuk tä hiw'enho lhamel lakäjyaj tä lham ikalhi t'at laka wichi letayhfwas. ₂₈Wet tä lhamel nichäte Jerusalén, lhamel ihoye häp Lhawuk Lewukwe wet ichäj arpas lhäy'e trompetas.

₂₉Wet wichi tä ihiche honhatil iyhäj ihanej tä Lhawuk Dios lham tä tatayhlä häp Israel lhayis letayhfwas. Wet lhamel nech'e wuj tä nowaye häp Lhawuk. ₃₀Häp tä mälhyej p'antetso, tä Josafat ihi leniyatyaj letamsek ihi, tsi Lhawuk tä hiw'enho letamsek. Wet nemhit Israel lhayis letayhfwas iyhäj tä iwhäye lhamel.

₃₁Josafat häpe t'at häp Judá laka rey p'ante. Hiw'en treinta y cinco nekchämis tä iwo tesa leniyatyaj, wet veinticinco nekchämis tä ihi Jerusalén tä iwoye niyat lechumet. Wet lako lhey Azuba, Siljí tä lhäse. ₃₂Wet Josafat is alhoho m'ak tä iwoye, ilehichet'a m'ak tä is tä lajcha Asa iwoye p'ante, wet Lhawuk akäjejlhi. ₃₃Mat tach'anlhaye t'at tä tek õ'wasthiche n'on'okhayajw'etes tä ihi chenhas, häp tä wichi kamaj tek lhay'amkatej p'ante chik ihänlhi häp Lhawuk tä lhamel letetsel laka Dios.

₃₄Wet m'ayhay iyhäj tä Josafat iwoye, tälhe tä iwo tesa leniyatyaj pajtha äp lepes leniyatyaj, ihi t'at häp Jehú, Hanani lhäs, lelesaynek tä ihi lehi tä lhey “Reyes tä ihi Israel.”

₃₅Tä paj p'ante, wet Josafat lhaithate häp Ocozías, Israel lhayis laka rey tä ni'isa m'ak tä iwoye. ₃₆Wet Josafat lhäy'e Ocozías lhamel tach'otejwek tä yenchelhi häp barcos tä wustas tä ihi honhat tä lhey Esión-geber. ₃₇Wet häp tä Eliezer tä lajcha häp Dodavahu tä lew'et Maresa, ifwenho Josafat häp Dios lhämet wet yok:

–Lhawuk iwasthihichela barcos tä lhenchelhi, häp tä lech'otyen ame häp Ocozías.

Wet matche, wasiche p'ante barcos, wet lhamel yikhihent'a.