1Jotam hiw'en p'ante veinticinco nekchämis tä iwo tesa leniyatyaj, wet dieciséis nekchämis tä ihi Jerusalén tä iwoye niyat lechumet. Wet lako atsinha tä lhey Jerusa tä Sadoc lhäse. 2Wet Jotam is m'ak tä iwoye, mälhyej tä lajcha Uzías iwoye, wet Lhawuk käjejlhi. Wet itenhit'a lajcha lesukyaj tä iwoye tä ihochufwi p'ante Lhawuk Lew'et tä fwitaj iwunej incienso. Mat wichi lhamel tujlhache tä iwoye m'ak tä ni'isa.
3Wet Jotam yenlhi lepe tä tumej tafwojhiye tä ihi Lhawuk Lew'et. Häte yenlhi hupuy tä Jerusalén lefwamhat tä khajayhen tä ihi lhip tä lhey Ofel. 4Wet yenthä hupuy tä ihi chenhas tä ihi Judá, wet itihi tayhi häp hupuy tä hin'ol tä khajayhen ihiche tä t'uye honhat, lhäy'e let'äsawetes tä toschephä. 5Häte iwo laka'tshayaja tä itayhlä Amón lhayis laka niyat lhäy'e laka nifwotas, wet ikalhi p'ante lhamel. Wet ihi nekchämtso tä Amón lhayis tiskanpe m'ak tä Jotam t'alhe'pe tä häpe tres mil trescientos (3.300) kilos häp plata, wet wuj trigo, w'awulho diez mil asnolis lelhuyes, lhäy'e cebada, häte w'awulho diez mil asnolis lelhuyes. Häte lhamel hiw'enho p'ante yäk ichäte tres nekchämis. 6Wet Jotam lakhajyhayaj ihi p'ante tsi hich'ahuyepej Lhawuk lhämtes wet is m'ak tä iwoye.
7Wet m'ayhay iyhäj tä Jotam iwoye, lhäy'e lechumyaj, lhäy'e laka'tshayajay tä iwoye, ihi t'at õlesaynekhi tä lhey “Reyes tä ihi Israel lhäy'e Judá.” 8Hiw'en veinticinco nekchämis tä iwo tesa leniyatyaj, wet dieciséis nekchämis tä ihi Jerusalén tä iwoye niyat lechumet. 9Wet Jotam y'il wet ihoye lechätilis, wet tä õjänch'oye õ'tihi David laka Hupuy. Wet lhäs tä lhey Acaz häp tä icheyäjo lajcha leniyatyajw'et.
