2~Crón 28

₁Acaz hiw'en veinte nekchämis tä iwo tesa leniyatyaj, wet dieciséis nekchämis tä ihi Jerusalén tä iwoye niyat lechumet. Mat iwohiyet'a m'ak tä is wet Lhawuk y'ulhanej lakeyis, tsi tek iten m'ak tä lechäti David iwoye p'ante. ₂Ihänlhi t'at m'ak tä Israel laka reyes iwoye, wet yenlhi chinaj tä yen lecheyälisa tä häpe Ba'al lhayis. ₃Iwunej incienso tä ihi honhat lhip tä lhey Ben-hinom, wet iten lakeyis tä lhäy'e lhip tä ni'isachehen tä wichi tä w'enha lhamej iwoye, häp lhamel tä Lhawuk pajche yokoschephä p'ante tä ihi honhat tä Israel lhayis nekche. Tsi Acaz y'aje leles tä iwunhomche tä yen lew'ayhata häp laka dios tä w'enha lhamej. ₄Wet ithatlä tshätäy tä ilänhen lhäy'e tä iwunej incienso tä ihi õn'okhayajw'etes tä i'pe chenhas lhäy'e tä ichufwi hal'äy lehupelis.

_5-6Häpe täjtso tä tumenej tä Lhawuk Dios hich'ote Aram laka rey yämlek ikalhi Acaz wet yen kwenkaya wujpe laka wichi wet ichäje Damasco. Häte Lhawuk hich'ote Israel laka rey tä lhey Peka tä Remalías lhäs, wet lham ikalhi Acaz wet ilänhen wujpe laka wichi. Ifwala weihalha tä ilänhen ciento veinte mil (120.000) hin'ol tä ihi Judá. Ilhokej lhamel häpe hin'ol tä t'otle t'unhen wet khajayhen. Mat tä Judá lheley ileyej Lhawuk tä lhamel letetsel laka Dios, wet häp tä tumenej tä lham itiyej lewit'äy. ₇Wet hin'o tä lhey Zicri tä häpe õka'tshayajwo tä khajay tä tälhehen wichi tä tälhe letes Efraín, lham ilän rey lhäs Maasías, lhäy'e Azricam tä häpe niyat tä ihi rey lew'et, lhäy'e Elcana tä häpe rey leniyatfwa. ₈Wuj lewit'äy tä Israel lhayis itiyej lepuhfwas Judá lhayis, y'aje tä yen kwenkaya doscientos mil (200.000) atsinhay lhäy'e nä'tshas wet ichäje Samaria, lhäy'e wujpe m'ayhay tä ichumahen.

₉Wet iche p'ante hin'o tä ihi Samaria tä Dios laka profeta tä lhey Oded. Wet ichutlä sip'älis tä tiyäjo Samaria, wet ifwenho lhamel tä yok:

–Häp Lhawuk tä atetsel laka Dios tawäkwäye naji Judá lhayis. Häp tä tumenej tä hich'otnaj amehen yämlek lekalhi lhamel. Mat Dios ihanej awäkw tä letiyej lhamel tä lelänhen. ₁₀Wet athana amel lewatayhläk lhenay akwenkaya aiyhäj tä Judá lheley lhäy'e tä Jerusalén lheley, hin'ol lhäy'e atsinhay. Mat amel häte lewoyay asukyaja tä letayhlä Lhawuk Dios. ₁₁Lhek ch'ahuyay n'oye, nachajay apuhfwas tä lhenay akwenkaya, tsi Lhawuk wuj tä tawäkwäy amehen.

₁₂Wet nech'e Azarías tä Johanán lhäs, lhäy'e Berequías tä Mesilemot lhäs, lhäy'e Ezequías tä Salum lhäs, lhäy'e Amasa tä Hadlay lhäs, tä häpehen wichi tä niyatej iyhäj tä tälhe letes Efraín, lhamel lhaitihlä p'ante iyhäj tä pilthä tä iwo laka'tshayaja. ₁₃Wet lhamel ifwenho tä yok:

–Yej chäjay kana akwenkay. Tsi pajche tä n'amel lhates ihihlä Lhawuk wet wuj tä tawäkwäy n'amehen tä n'ahäpehen Israel lhayis. Wet athana amel lewatayhläk let'isej lhip lhasukyajay lhäy'e lhates.

₁₄Wet sip'älis ileyejthä õkwenkay, lhäy'e m'ayhay tä pajche ichumahen, wet yachaje niyatey lhäy'e wichi. ₁₅Wet hin'ol tä õ'wo lheyisa tä lhamel tä itetshan wichi tä õyen kwenkaya. Wet lhamel ichumahen m'ayhay tä õyachaj, wet itonchephä lakhäy yämlek iwo lew'uya iyhäj tä ts'ilakchehen, häte iwo lenisähisa iyhäj. Wet hiw'enhomche lhäk lhäy'e lhät wet iwo chaya lelätshay. Wet ithatpe asnolis ilhokej lhamel tä nikhajayahen, iyhäj tä niwoyaye tä yikhen, wet ichäjen yäk ichäte Jericó, hupuy tä õyen lheya Fwitsukwat, wet lhamel hin'äyej lepuhfwas. Häp lhamel häm yäple Samaria.

₁₆Häpe p'ante lewhäytso tä rey Acaz iwo chenekaye Asiria lhayis laka rey yämlek t'alheje lech'otyaj. ₁₇Tsi yachajo tä Edom lhayis inuye Judá wet ichäjen wichi iyhäj tä yen kwenkaya. ₁₈Hätej Filisteo lhayis lhamel tiyäjo hupuy tä iwhäye chenhas, lhäy'e tä ihi Judá lhip tä tapinhiye, wet lhamel ichumahen m'ayhay tä ihiche. Häp lhayen lewuka Fwala Wukwe, lhäy'e Ajalón, lhäy'e N'olafwey, wet häte N'olafwek lhäy'e wichi lew'etes tä tott'ahomche, lhäy'e Timna lhäy'e wichi lew'etes tä tott'ahomche, lhäy'e Gimzo lhäy'e wichi lew'etes tä tott'ahomche. Wet lhamel yen lew'etesa. ₁₉Häp Lhawuk y'ayhatchä Judá lhayis, häp rey Acaz tä tumenej. Tsi häpe lham tä hich'anlhaye m'ak tä ni'isa tä ihi p'ante Judá, wet lham häte lhäy'e lhip m'ak tä ni'isa tä iwoye tä itayhlä Lhawuk.

₂₀Wet Tiglat-pileser tä Asirio lhayis laka rey ihoye p'ante Acaz yämlek itayhlä. Tek hich'ote, ts'ilak tä ilhaklitlhi. ₂₁Wet Acaz ichumahen m'ayhay tä laha ihi tä ichufwi Lhawuk Lew'et, lhäy'e tä ihi rey lew'et lhäy'e leniyatfwas lew'etes, wet hiw'enho Asiria laka rey. Mat tanej tä mälhyejtso, tek ikalheji lech'otyaj.

₂₂Wet tanej tä Acaz ihi lelhakli, kamaj tujlhache tä iwoye m'ak tä ni'isa tä itayhlä Lhawuk. Mälhyej p'antetso rey Acaz. ₂₃Häp hiw'enho lew'ayhat häp Aram lhayis laka dios lhayis, häp lhamel tä pajchenaj ikalhi häp lham. Tsi letichunhayaj yok, “Tä dios lhayisna hich'ote niyatey tä Aram lhayis, häte elak hich'ot n'oye chik ow'enho lew'ayhat.” Mat häpe lhamel tä tumenej tä lewit'äy ihi, lhäy'e ilhokej Judá.

₂₄Wet Acaz ihutwek m'ayhay tä ihi Dios Lew'et wet iwasthiche. Häte hip'ohiche Lhawuk Lew'et lepelis wet ne'tek õyenhoplhi altares tä õn'okhayajw'etes tä ni'isahen tä õ'tihiche ilhokej letselhäs tä ihi Jerusalén. ₂₅Häte yenthä õn'okhayajw'etes tä ni'isahen tä itihiche lhipey tä toschephä tä ihi ilhokej hupuy tä ihi Judá. Iwoynejetso yämlek õ'wunej incienso tä õyen n'okhayajayej dios lhayis iyhäj tä w'enha lhamej. Mälhyejtso p'ante m'ak tä iwoye tä iwäkwyhayen häp Lhawuk tä letetsel laka Dios.

₂₆Wet m'ayhay iyhäj tä Acaz iwoye, tälhe tä iwo tesa leniyatyaj yäk lepes leniyatyaj, ihi t'at õlesaynekhi tä lhey “Reyes tä ihi Judá lhäy'e Israel.” ₂₇Wet y'il tä nech'e ihoye lechätilis, wet õjänch'oye tä õ'tihi Jerusalén, mat tek õ'chäje reyes tseyekw'et. Wet lhäs tä lhey Ezequías häp tä icheyäjo lajcha leniyatyajw'et.