Josías iwaklhat m'ayhay yämlek wichi iwo lakäjyaja'pe Pascua
1Rey Josías iwo p'ante lakäjyaja'pe Pascua tä ihi Jerusalén tä iwujyen Lhawuk. Häp wel'a tä ichun wet ifwala catorce tä õ'länhen tson'ataj les yämlek wichi iwo lakäjyaja. 2Häte Josías itihi sacerdotes lechumet wet inityenej chik lhamel iwoye lechumet tä ihi Lhawuk Lew'et. 3Wet Josías tahuyej Leví lhayis, häp lhamel tä ichufwenhen p'ante Israel lhayis lhäy'e tä lhayen t'amajchetayej Lhawuk. Wet ifwenho lhamel tä yok:
–Tiyayhi Arca tä Õt'amajchet häp hup tä Israel laka rey Salomón tä David lhäs yenhoplhi p'ante Lhawuk. Nemla letilhäjaylhi tä lethatpe afwapol. Athana ch'otaye Lhawuk Dios lechumet lhäy'e Israel tä laka wichi. 4Awaklhathen, iyhäjpej tä lhalepuhfwas, aw'entejchehen, mälhyej tä Israel laka rey David lelesaynek ne'tep'antek õ'woye, lhäy'e lhäs Salomón lelesaynek. 5Kasthi õn'okhayajw'et tä alew'entejchehen tä aletumtej iyhäj Israel lhayis, mälhyej tä lhamel lhaiw'entejchehen tä iyej lepuhfwas. 6Häte länay tson'ataj les häpkhilek õyenlhi Pascua, wet a'en t'amajchetesa yämlek lewaklhatej apuhfwas m'ak tä lhamel iwatlä, yämlek lhamel iwoye Lhawuk lhämet tä hiw'enho p'ante Moisés.
7Wet Josías hiw'enho wichi häp iyhäj lham leläy yämlek lhamel iwo lakäjyaja'pe Pascua. Hiw'enho treinta mil (30.000) tson'ataj les lhäy'e kayla les, wet tres mil w'asetaj les. 8Hätej rey lech'otfwas lhamel hiw'enho lew'ayhat wichi, häte hiw'enho sacerdotes lhäy'e Leví lhayis. Wet Hilcías, Zacarías lhäy'e Jehiel, häpe lhamel tä itetshan Dios Lew'et, wet lhamel yachaje sacerdotes dos mil seiscientos (2.600) tson'ataj les lhäy'e kayla les, wet trescientos w'asetaj les, yämlek lhamel iwo lakäjyaja'pe Pascua. 9Häte Conanías, lhäy'e lepuhfwas Semaías lhäy'e Natanael, lhäy'e Hasabías, Jehiel, lhäy'e Jozabad, tä Leví lhayis kaniyatey, lhamel yachaje Leví lhayis cinco mil tson'ataj les lhäy'e kayla les, wet quinientos w'asetaj les, yämlek lhamel ilänhen tä yen lew'ayhatayejpe Pascua.
Wichi iwo lakäjyaja tä itichunche Pascua
10Mälhyejtso p'ante tä lhamel lhaiwaklhatejen Pascua. Wet sacerdotes ihi lechumetw'et tä ichufwi Lhawuk Lew'et tä lhamel ichumthä, lhäy'e Leví lhayis tä lhamel lhaikanejchä tä lhaitumtej lechumyaj tä lhamel iwoye, mälhyej tä rey ne'tek lhamel iwoye lhämet. 11Wet Leví lhayis ilänhen tshätäy wet ilanche t'ähes, wet sacerdotes ichuma lew'oyis wet itsäype altar. 12Wet nech'e Leví lhayis hiw'enhathen lhipey tshätäy tä õ'wunhomche, wet hiw'enhomche wichi yämlek lhamel yen Lhawuk lew'ayhata, mälhyej tä Ley p'ante tälhe Moisés ne'tek õ'woye. 13Wet lhamel hip'ohen tshätäy tä lhamel iwo lakäjyaja'pe Pascua, mälhyej tä Dios lhämtes yäme. Wet lew'ayhtes iyhäj tä yen t'amajcheta tä lhamel ipen, ithathomche towhay lhäy'e õpenekhis iyhäj. Tä wak'alh, wet lhamel ikelit tä hiw'enhomche wichi. 14Tä ileyej, iwaklhat m'ak tä lhamel tuj, lhäy'e sacerdotes. Tsi sacerdotes tä lhamel tälhe letes Aarón lhamel naj letamseka, tsi yäk honatsiyej tä hiw'enho Lhawuk häp tshätäy lhäy'e tä iwunhomche t'alhäs. Häp tä tumenej tä Leví lhayis iwaklhat m'ak tä lhamel w'enhayejen, lhäy'e sacerdotes.
15Häte iche õchoswos tä lechäti p'ante Asaf tä lhamel ihi lechumetw'et, mälhyej tä rey David p'ante ne'tek õchoswos iwoye, lhäy'e Asaf, Hemán, lhäy'e Jedutún, häpe profeta tä hich'ote p'ante rey. Wet iche lepewos tä ihi lepelis tä lhamel t'uye, wet ihichet'a elh chik yikch'oye lechumet tä t'uye lepe, tsi lepuhfwas Leví lhayis tä iwaklhatho iyhäj häp tshätäy tä õ'länhen.
16Mälhyej p'antetso tä õ'kanchä ilhokej Lhawuk lechumet ifwalatso, yämlek wichi iwo lakäjyaja'pe Pascua lhäy'e tä ilänhen tshätäy tä õ'wunhomche tä õ'ti'pe Lhawuk laka altar, mälhyej tä rey Josías lhämet tä ne'tek õ'woye. 17Wet häp tä Israel lhayis tä iche katsi lhamel iwo lakäjyaja'pe Pascua, lhäy'e tä iwo lakäjyaja siete ifwalas tä lhamel tuj pan tä levadura newayej. 18Tek w'enej chik iche p'ante chik wichi tä ihi Israel itichunche Pascua mälhyej tä yenlhina, tälhe p'ante lewhäy tä profeta Samuel ihi. Wet ihichet'a p'ante rey elh tä ihi Israel tä yenlhi Pascua tä mälhyej tä rey Josías yenlhi, tä lhäy'e sacerdotes, lhäy'e Leví lhayis, lhäy'e ilhokej Judá lhayis lhäy'e Israel lhayis tä iyej iyhäj, lhäy'e wichi tä lew'et Jerusalén. 19Wet ihi dieciocho nekchämis tä Josías ihi p'ante leniyatyaj tä lhamel iwo lakäjyaja'pe Pascua.
Josías y'il
20Häp tä tiyäme p'ante ilhokej m'ayhaytso, lhäy'e tä Josías pajche yenlhi Lhawuk Lew'et, häpe tä Egipto laka rey tä lhey Necao ihoye tewokitaj Éufrates yämlek iwo laka'tshayaja tä ihi Karkemis. Häpe tä Josías yik tä yistejlä, 21mat Necao ichene lesilätwos yämlek ifwenho tä yok:
–¡M'ak y'ajit'a ame, Judá kaniyat! ¿Atsi m'ak tä tumenej tä leho n'oye? Athana ohohit'a ame yämlek otay ahilä, mat ohoye honhat elh tä owo ka'tshayajaye. Dios ne'tek okeltshi. Tä mälhyejtso, leyej tä letayhlä Dios lhämet yämlek naj awit'äya. Tsi Dios in'oyej wet hich'ot n'oye.
22Mat Josías ilehiyejt'a, kamaj tujlhache tä iwatläk itayhlä Necao, wet tek hich'ahulhi tä iwo lepeyeka tä lhämtes tälhe Dios. Häp mälhyejtso p'ante tä Josías itayhlä tä ihi honhat tä lhey Meguido. 23Wet hin'ol tä õch'ähilwos lhamel tiyäjej lech'ähi rey Josías. Wet rey tahuyej lakawos tä yok:
–¡Chumay n'oye, wuj tä owit'äy ihi, olätsek ihi!
24Häp lakawos ichuma tä ihi lakaletaj tä laka'tshayajhi, wet lhamel ithatho lakaletaj elh wet ichäje Jerusalén, wet ihi p'ante tä y'il. Wet tä õjänch'oye, õ'tihi lechätilis tseyekw'et. Wet ilhokej Judá lheley lhäy'e Jerusalén lheley tä lhamel tafwchehchä tä itichunche p'ante Josías tä y'il. 25Wet profeta Jeremías yenlhi lelesaynek tä itichunche Josías tä y'il. Wet ilhokej hin'ol tä õchoswos lhäy'e atsinhay tä õchoswos, tä lhamel iten letenkay lhamel y'äyen Josías, wet mälhyejtso tä ihi Israel yäk nämena. Wet õlesaynhaytso ihi t'at õtenekhis.
26-27Wet m'ayhay iyhäj tä Josías iwoye, tälhe tä iwo tesa leniyatyaj yäk häp lepes leniyatyaj, lhäy'e lechumyaj tä is tä iwoye tä hin'älit tä wuj tä ihumin Lhawuk wet iwoye lhämtes tä ihi lehi, - ilhokej tähestso ihi õlesaynekhi tä lhey “Reyes tä ihi Israel lhäy'e Judá.”
