Joacaz niyatej Israel
1Ihi veintitrés nekchämis tä Joás tä Ocozías lhäs niyatej Judá, wet Joacaz tä Jehú lhäs nech'e iwo tesa tä lhayen niyata tä ihi Israel. Wet diecisiete nekchämis tä ihi Samaria tä iwoye niyat lechumet. 2Mat isit'a m'ak tä iwoye wet Lhawuk y'ulhanej lakeyis. Tsi iten rey Jeroboam lesukyaj tä Nabat lhäs, häp hin'o p'ante tumenej Israel lhayis iwo lesukyaja. Wet Joacaz ilehiyejt'a lakeyistso. 3Häp tä tumenej tä Lhawuk wuj tä itiyej lewäk Israel lhayis, wet pitaj lewhäytso tä yachaje Hazael tä Aram laka rey, lhäy'e lhäs tä lhey Ben-hadad.
4Mat Joacaz iwo let'alhyaja tä t'alhe Lhawuk, wet Lhawuk hich'ahuye let'alhyaj. Tsi hiw'en m'ak tä mälhyej tä Aram laka rey hip'altsenthä Israel lhayis. 5Wet Lhawuk ichene lefwayhthi häp Israel wet lhamel tefwayej Aram lhayis. Wet lhamel yachajo tä letamsekis ihi tä ihiche lew'etes, mälhyej tä pajche. 6Mat lhamel ilehiyejt'a Jeroboam laka wichi lesukyaj tä iwoye tä lham tumenej p'ante Israel lhayis iwo lesukyaja. Kamaj lhamel tujlhache tä iwoye lesukyajay, lhäy'e hal'ä tä lhamel ihoye tä n'okwiyej dios tsinha tä lhey Asera lepeyak kamaj ihi Samaria.
7Wet Joacaz laka nifwotas tä imälhehi, telhame cincuenta sip'älis tä iche'pe yel'atas, lhäy'e diez lakaletas tä laka'tshayajchal, lhäy'e diez mil sip'älis tä t'äschehchä. Tsi Aram laka rey ilänhen iyhäj nifwotas wet iwasthiche kaletas yäk hätet iwoye honhat mok.
8Wet mälhyejtso m'ak tä Joacaz iwoye p'ante. Wet m'ayhay iyhäj tä iwoye, lhäy'e tä lhaikhajyen, ihi t'at õlesaynekhi tä lhey “Reyes tä ihi Israel.” 9Wet y'il p'ante tä nech'e ihoye lechätilis, wet õjänch'oye tä ihi Samaria. Wet lhäs tä lhey Joás häp tä icheyäjo lajcha leniyatyajw'et.
Joás niyatej Israel
10Ihi treinta y siete nekchämis tä Joás niyatej Judá, häp lheyfwa Joás tä Joacaz lhäs nech'e iwo tesa tä lhayen niyata tä ihi Israel. Wet dieciséis nekchämis tä ihi Samaria tä iwoye niyat lechumet. 11Mat isit'a m'ak tä iwoye wet Lhawuk y'ulhanej lakeyis. Tsi iten Jeroboam lesukyaj tä Nabat lhäs, häp hin'o p'ante tumenej Israel lhayis iwo lesukyaja. Wet Joás ilehiyejt'a lakeyistso.
12Wet mälhyejtso m'ak tä iwoye p'ante. Wet m'ayhay iyhäj tä iwoye, lhäy'e tä lhaikhajyenej tä itayhlä Amasías, Judá laka rey, ihi t'at õlesaynekhi tä lhey “Reyes tä ihi Israel.” 13Wet y'il p'ante tä nech'e ihoye lechätilis, wet tä õjänch'oye õ'tiyej Israel laka reyes letseyhay tä ihi Samaria. Wet elh hin'o tä lhey Jeroboam häp tä icheyäjo leniyatyajw'et.
Eliseo lhämet tä ilepese
14Eliseo i'pe lemäwet, tott'ayek y'inhila. Wet Israel laka rey Joás ihoye, wet tafwlhi wet itsufwelej. Wet tahuyej tä yok:
–¡Ijcha, ijcha! ¡Ahäpenaj Israel kanifwotaj tä matche tä khajay!
15Wet Eliseo ichulho rey tä yok:
–Chuma õch'ähiw'ut lhäy'e õch'ähil.
Wet rey ichuma õch'ähiw'ut lhäy'e õch'ähil.
16Wet Eliseo tahuyej rey tä yok:
–Waklhat tä lefwomej õch'ähi.
Mälhyej tä rey iwoye täjtso, wet Eliseo iti'pe lakweyey rey lakweyey. 17Wet Eliseo tahuyej rey tä yok:
–Fwoyenche ventana tä tumej tä ifwala tälhche.
Wet rey ifwoyenche, wet Eliseo tahuyej tä yok:
–¡Athana fwomej õch'ähi!
Wet rey ifwomej õch'ähi, wet Eliseo yok:
–¡Lhawuk lech'ähi tä ifwayhat Israel! ¡Lech'ähi tä itayhlä Aram wet ikalhi! ¡Am tä lenofwthiyeja Aram lhayis tä ihi honhat lhip tä lhey N'olafwek!
18Wet Eliseo yachajo tä tahuyej rey tä yok:
–Chuma õch'ähil.
Wet rey ichuma õch'ähil, wet Eliseo tahuyej tä yok:
–Athana ajeji honhat õch'ähil.
Wet rey tresche lewhäy tä y'ajeji honhat õch'ähil, wet ileyej. 19Wet Dios lakawo Eliseo tawäkwäye rey, wet tahuyej tä yok:
–Chik ichäten'e cinco wok seis lewhäy tä ley'ajeji honhat õch'ähil, wet lekalhihilan'e Aram lhayis yäk nofwej lhamel. Mat athana ts'ilak tresche lewhäy tä lekalhihila lhamel.
Y'il p'ante Eliseo mat letseyek iläyit hin'o
20Wet y'il p'ante Eliseo wet õjänch'oye.
Wet nekchämpej Moab lhayis tä chowalhnhas tä tiyäjopej honhat tä Israel. 21Wet iche p'ante lewhäy tä Israel lhayis ijänch'oye elh tä y'il. Wet nech'e nekhen p'ante chowalhnhas, wet tä Israel lhayis hiw'enlä, wet lhamel ithatche hin'o tä y'il Eliseo letseyekw'et wet lhamel yikhen. Mat hin'o tä y'iltso, tä isitej Eliseo lhiley, wet iläy, wet inephä, ikasit.
Tresche lewhäy tä rey Joás ikalhi Aram lhayis
22Hazael tä Aram laka rey hip'altsenthä p'ante Israel lhayis ilhokej lewhäy tä kamaj iläy rey Joacaz. 23Mat Lhawuk hip'altsene lhamel wet hich'ote, tsi itichunche lhämet tä iwoyeje p'ante Abraham, Isaac, lhäy'e Jacob. Wet itetshan lhamel tä niwatahlä chik ilänhen wok ichenhen lhamel, wet mälhyej'attso lep'altsenyaj yäk fwalasna.
24Wet täjp'ante y'il Aram laka rey Hazael, wet lhäs tä lhey Ben-hadad häp tä icheyäjo lajcha leniyatyajw'et. 25Wet Joás tä Joacaz lhäs yachajo tä ikalhi hupuy lhayis tä Ben-hadad pajche isoyej lajcha Joacaz tä ihi laka'tshayaj. Wet tresche lewhäy tä Joás ikalhi p'ante Ben-hadad, wet mälhyejtso tä yachaj lhame hupuy tä ihi Israel.
