2~Rey 14

₁Ihi p'ante täkwfwas nekchämis tä Joacaz lhäs Joás niyatej Israel, wet Amasías tä Joás elh tä lhäs nech'e iwo tesa tä lhayen niyata tä ihi Judá. ₂Hiw'en p'ante veinticinco nekchämis tä iwo tesa leniyatyaj, wet veintinueve nekchämis tä ihi Jerusalén tä iwoye niyat lechumet. Wet lako atsinha tä lhey Joadán tä lew'et p'ante Jerusalén. ₃Wet Amasías is alhoho m'ak tä iwoye wet Lhawuk käjejlhi, tsi iwoye ilhokej m'ak tä lajcha Joás iwoye. Mat tek iten lechäti David lechumyaj p'ante. ₄Tek õ'wasthiche õn'okhayajw'etes tä i'pe chenhas, wet wichi ilehiyejt'a tä ihoye lhipeytso yämlek iwunej incienso wet ilän tshätäy tä yen n'okhayajayej dios lhayis tä w'enha lhamej.

₅Wet täjp'ante rey Amasías lhaikanchä tä ihi leniyatyaj, wet ilänhen ilhokej leniyatfwas tä lhamel ilän p'ante lajcha tä häpe rey. ₆Mat nilänahen lajcha lhikoyis leles, tsi Lhawuk lhämet tä ihi Lehi tä Moisés laka Ley yop'antek, “Chik hin'o lhäs iwoye m'ak tä ni'isa, yej menyenej lajcha yämlek lelän. Wet chik lajcha wok lako iwoye m'ak tä ni'isa, yej menyenej lhäs yämlek lelän. Mat häp elh tä iwoye m'ak tä ni'isa, lham t'at tä letes ihi wet õ'län.”

₇Wet Amasías lham p'ante tä ilänhen diez mil Edom lheley tä ihi honhat tä w'awulhchä tä lhey Nisoyw'et. Wet häte ikalhi p'ante hupuy tä lhey Sela wet iwo lheya Jokteel. Wet mälhyejtso lhey yäk athana.

₈Wet Amasías ithate lesilät häp Israel laka rey Joás tä Joacaz lhäs wet Jehú tä lecheyäs. Wet ifwenho tä yok:

–Ho n'oye, n'alew'enhenla.

₉Mat Joás ichene lhämet tä itech'aynej täja tä yok:

–Häp ch'uthanil tä ihi Líbano ichene lhämet pänhichetek tä ihi Líbano wet yok, “W'enho äse häp olhäs yämlek yen ch'efwaya.” Mat iche p'ante tshäwet tä fwitsaj tä ihi Líbano wet t'äsche ch'uthaniltso. ₁₀Matche, Amasías, kalelhäj tä lekalhi n'aji Edom wet alechäjlhi. Is t'at, akäjlhi t'at, mat mälhehi haw'et, yej lhekch'oye. ¿Wet chäte tä aley'uytho m'ak tä ni'isa tä tumenla amej wet tumenhiyeja Judá, n'isla amej?

₁₁Mat rey Amasías tek hich'ahuye p'ante. Wet Joás tä Israel laka rey yik tä ihoye Amasías wet lhamel itaywek tä ihi honhat lhip tä lhey Fwala Wukwe tä ihi Judá kahonhat. ₁₂Wet Israel kanifwotas ikalhi Judá lhayis, wet lhamel elh weihalhapej yikhen, yäple lew'etes. ₁₃Wet Joás yen kweneka Amasías tä ihi Fwala Wukwe. Wet ihoye Jerusalén wet iwasthi lefwamhat lhip, w'awulho ciento ochenta metros, tälhe Efraín lepe yäk ichäte lepe elh tä ihi letselhä. ₁₄Wet ichuma ilhokej oro lhäy'e plata, lhäy'e ilhokej m'ayhay tä ichufwi Lhawuk Lew'et, lhäy'e m'ayhay tä laha ihi tä ichufwi rey lew'et. Wet ithatlä wichi tä yen lakwenkaya, wet tä ileyej yäple Samaria.

₁₅Wet mälhyejtso m'ak tä Joás iwoye p'ante. Wet m'ayhay iyhäj tä iwoye, lhäy'e tä lhaikhajyenej tä itayhlä Amasías, Judá laka rey, ihi t'at õlesaynekhi tä lhey “Reyes tä ihi Israel.” ₁₆Wet y'il p'ante tä nech'e ihoye lechätilis, wet tä õjänch'oye, õ'tiyej Israel laka reyes letseyhay tä ihi Samaria. Wet lhäs Jeroboam häp tä icheyäjo lajcha leniyatyajw'et.

₁₇Wet Amasías tä Joás lhäs tä Judá laka rey, wet quince nekchämis tä iläy p'ante tälhe tä y'il Joás elh tä Joacaz lhäs tä häpe Israel laka rey. ₁₈Wet m'ayhay iyhäj tä iwoye ihi t'at õlesaynekhi tä lhey “Reyes tä ihi Judá.” ₁₉Wet iche hin'ol tä t'uhläk ilän, wet häp tä yikch'oye Jerusalén wet tiyäje Lakis. Mat lhamel ihän yäk ichäte hupuy wet ilän. ₂₀Wet õ'chäj letseyek, õ'thatpe yel'ataj tä õ'häne Jerusalén, wet õjänch'oye tä õ'tiyej lechätilis tseyhay tä ihi David laka Hupuy.

₂₁Wet ilhokej Judá lheley tä lhamel itshupyene Azarías tä lhamel yen laka niyata tä icheyäjo lajcha Amasías lew'et. Wet Azarías hiw'en p'ante dieciséis nekchämis. ₂₂Wet tä tiyäme tä y'il lajcha, wet lham tä yachajo tä yenlhi hupuy tä lhey Elat, wet yachaje Judá lheley.

₂₃Ihi quince nekchämis tä Joás lhäs Amasías niyatej Judá, wet Jeroboam tä Joás elh tä lhäs nech'e iwo tesa tä lhayen niyata tä ihi Israel. Wet cuarenta y un nekchämis tä ihi Samaria tä iwoye niyat lechumet. ₂₄Mat isit'a m'ak tä iwoye wet Lhawuk y'ulhanej lakeyistso. Tsi ilehiyejt'a lheyfwa rey Jeroboam lesukyaj tä Nabat lhäs, häp hin'o p'ante tumenej Israel lhayis iwo lesukyaja.

₂₅Wet Jeroboam yachajo tä ikalhi honhates tä lewuk p'ante Israel, tälhe chenhas kawayhi tä ihi Hamat yäk ichäte Lewomekitaj Nosoy. Wet häp tä yäm matche häp Lhawuk tä Israel laka Dios lhämet p'ante lakawo Jonás tä Amitay lhäs, profeta tä tälhe Gat-hefer, yen lhämeta. ₂₆Tsi Lhawuk hiw'en p'ante tä äytaj Israel lep'altsenyaj. Ilhokej lhamel tä iteläytej wet newache elh chik hich'ote. ₂₇Wet tä Lhawuk niwatahlä chik inofwtej Israel lhayis tä ihonhatena, wet häp tä ifwayhthen lhamel häp tä isej Jeroboam tä Joás lhäs.

₂₈Wet mälhyejtso m'ak tä Jeroboam iwoye p'ante. Wet m'ayhay iyhäj tä iwoye, lhäy'e tä lhaikhajyen tä iwo laka'tshayaja, lhäy'e tä yachaje Israel hupuy lhayis tä Damasco lhäy'e Hamat, ihi t'at õlesaynekhi tä lhey “Reyes tä ihi Israel.” ₂₉Wet y'il p'ante tä nech'e ihoye lechätilis, wet tä õjänch'oye, õtiyej reyes tä pajchehen tä ihi Israel. Wet lhäs Zacarías häp tä icheyäjo p'ante lajcha leniyatyajw'et.