Rey Ezequías iwo chenekaye Isaías tä t'uhläk y'alhyene Lhawuk
1Täjp'ante rey Ezequías iläte täjtso, hich'esajche lew'uy wet hiw'uyhi wesaj tä yelaj, letetnek tä lefwitajayaj ihi, wet ihochufwi Lhawuk Lew'et. 2Wet t'äne Eliaquim, häp lakawo tä niyatej lew'et, lhäy'e Sebna tä õlesaynekwo, lhäy'e sacerdotes tä thänhäy, tä ilhokej lhamel hiw'uyhi wesaj tä yelaj, lhamel letetnek tä lefwitajayaj ihi. Wet ichene lhamel profeta Isaías tä Amoz lhäs, 3wet lhamel ifwenho rey Ezequías lhämet tä yok:
–Fwalana olhamel olhakli ihi lhäy'e tä on'äfwlhi ihi. Häpe fwala tä lhawit'äy ihi tä äytaj, tä hätet iwoye atsinha tä ataj iwohi lhäsa tä naj lakhajyhayaja. 4Elak Lhawuk Dios tä n'ilataj pajche iläte lhämtes tä Asiria laka rey niyatfwa iwoye tä iläkwlhi, wet elak Lhawuk itihiyeja letasnhayaj häp lhämtestso tä iläte. Tä mälhyejtso, alhyene häp lhaka wichi tä iläyhen tä imälhehi.
5Tä Isaías iläte rey lhämet tä ichene, 6wet ichulho lakachenhay tä yok:
–Fwenho amel awuk Ezequías häp Lhawuk lhämet tä yok, “Yej lenowaye Asiria laka rey kawos lhämtes tä ni'isachehen tä itayhat n'oye tä iläkwlhin'o. 7Wet lhek yahinya, olham tek owohla letamseka, olhaklithiyejlhila m'ak chik ihanch'oye yämlek yäple laka honhat, wet chik ichät kanhi, õ'länla.”
Rey Senaquerib yachajo tä ichene lhämet tä äytajche Ezequías
8Wet Asiria laka rey niyatfwa ihanej tä lewuk rey yikch'oye Lakis. Tä mälhyejtso, leniyatfwa yikch'oye Jerusalén wet ilhoke lewuk rey tä iwo laka'tshayaja tä itayhlä wichi tä ihi honhat tä lhey Pelaj. 9Wet Asiria laka rey ilätch'oye tä Etiopía laka rey tä lhey Tirhaca ihoye yämlek iwo laka'tshayaja tä itayhlä lham. Wet yachajo tä Asiria laka rey ichene lesilätwos häp Judá laka rey Ezequías. Wet ifwenhomche lhamel tä yok:
10–Fwenho Ezequías tä lhok, “Aka dios tä am lechaye ifwen amho tä yok, Jerusalén tek ichäthohla Asiria laka rey lakwey. Mat yej wahin amej chik ikan amej aka dios. 11Am lehanej m'ak tä Asiria laka reyes iwoye tä iwasthiche ilhokej honhates tä lhamel tiyäjo. ¿Hät am lefwitaj lefwayhla? 12Häp dios lhayis tä ihi honhates iyhäj, ¿hä ifwayhthen p'ante hupuy tä Asiria laka rey lechätilis iwasthiche? ¿Häp honhates tä Gozán, Harán, Resef, lhäy'e p'ante wichi tä ihi Bet-edén tä lhamel yen lew'eta hupuy tä lhey Telasar? 13¿Chi tä ihi Hamat laka rey, lhäy'e Arpad laka rey, lhäy'e Sefarvaim laka rey, lhäy'e Hena laka rey, lhäy'e Iva laka rey? ¡Oyok, nemhit ichehen lhamel, nofwej!”
Ezequías iwo let'alhyaja
14Wet rey Ezequías ichuma carta tä silätwos hiw'enho, wet iyahyen. Wet ihoye Lhawuk Lew'et, wet hich'enhi carta, itihi tä Lhawuk itayche. 15Wet iwo let'alhyaja tä t'alhe Lhawuk wet yok:
–Iwuk tä ahäpe Israel laka Dios tä aniyatyaj i'pe m'ayhay tä lhefwis ihi, ts'ilak am tä Alewuk ilhokej õniyatyajay tä i'pe honhat. Am tä lhenlhi pule lhäy'e honhat. 16Lhek tetshan, Iwuk, wet ch'ahuye. Fwoyenchehen atey, Iwuk, wet yahin. Ch'ahuye Senaquerib lhämtes tä ichen n'oye tä itayhat ame tä iläkwlhi Dios tä n'ilataj.
17“Iwuk, matche tä Asiria laka reyes iwasthiche ilhokej honhates, 18wet lhamel hip'ohen laka dios lhayis, ithatho itäj, tsi matche tä häpkhihent'a dios lhayis, mat häpe m'ayhay tä hin'o tä lakwey lhenek, hal'ä wok tunte. Häp tä tumenej tä lhamel iwasthiche. 19Athana Iwuk Dios, olhaip'altsen ame, fwayhat n'oyejen Asirio lhayis lakhajyhayaj, yämlek ilhokej wichi tä i'pe honhat ihanej tä ts'ilak am, Iwuk, tä ahäpe Dios.”
Isaías iwo siläta tä rey Senaquerib lewit'äy ihihla
20Wet Isaías tä Amoz lhäs ichene lhämet rey Ezequías tä yok:
–Lhawuk, Israel laka Dios, lhämet yok, “Olham oläte hat'alhyaj tä lewoyene tä lhämeje Asiria laka rey Senaquerib. 21Wet athana olham tä ohäpe Awuk Dios oyok,
“Senaquerib, Jerusalén hätet iwoye
atsinha lhutsha tä ischeylhi amej.
Ilanlhi lhetek tä ailäkwlhi tä lhekch'oye.
22¿Atsi tä häpe tä leläkwlhi wet lekachuye?
¿Atsi tä häpe tä letayhte ämtes tä äytaji
wet alechäjlhi tä leyahin?
¡Letayhlä Israel laka Dios tä T'amajchet!
23Häpe tä lechene asilätwos
tä leläkwlhin'o tä lhok,
Oho'pe chenhas tä lhäy'e lhip
tä toschephä tä ihi Líbano
tä oyikche wujpe okaletas tä oka'tshayajchal.
Wet tä ochät kaphä,
oyisthen pänhichetek tä nem koyhyaj tä toschephä,
lhäy'e pino lhayis tä matche tä isis,
yäk ochäte lhip tä lhäy'e lhip tä tofwe,
lhäy'e tayhi tä hätet iwoye honhat tä õlafwek ihi.
24Ohoye honhates tä w'enha lhamej wet otij chowej.
Oyenlhi opek wet oyäyej waj tä tälho.
Wet ilhokej tewok lhayis tä ihi Egipto
tä oy'uytho opach'ol yäk y'imche.
25“¿Mat hät kahanayej tä olham
tä ohäpe Dios tä matche
tä otichunhayaj tä lewoye m'ayhayna?
Wet athana oyäm matche.
Häp tä tumenej tä am lewasthiche hupuy tä khajayhen
wet lhene õskonkay tä wus.
26Wet wichi tä ihi hupuy noj lakhajyhayaj,
wet wuj tä lhamel nowayhen wet n'äfwenhen,
hätet iwoye hon'al tä i'pe honhat
lhäy'e hupitas tä w'atshan,
mälhyej hon'al tä lhaichihelit tä tälhpe owukwe
wet ihwok tä chayohi hip'ohen yäk tamchäyhen.
27Olham Dios ohanej ilhokej m'ak tä lewoye.
Ohanej ihi lhip tä lehoye, lhäy'e tä lhehi haw'et.
Olham ohanej tä am lewäkwäy n'oye.
28Wet tä ohanej tä afwitsaj wet alechäjlhi,
wet otihihla chinaj anhus, owohla lheleya,
wet owohla t'aka ayhi,
wet oyachajila amche han'äyijnaj letälhche.”
29Wet Isaías ifwenho rey Ezequías tä yok:
“Häpe täjna letetnek m'ayhay tä ihichela:
Tä nekchämna lhäy'e chik nekchäm elh
tä amel letufwayhla m'ak tä inuphä tä tälhpe honhat.
Mat chik ichäte tres nekchämis,
nech'e iwohiyela chik amel letutcheyhen
wet lelanhihla yachuyaj lhay,
wet lethatlahchä uva lhiley
wet letufwayhla lhay.
30Häp wichi tä imälhehi Judá tä iläyhen,
lhamel hätehlat iwoye hal'äy tä w'atshan,
wet iwohla lefwettsila'pe honhat
wet iwohla lhaya.
31Tsi ihichela wichi tä ihi Jerusalén tä tefwayhen,
lhäy'e tä ihi chenaj tä Sión.
Lhawuk tä lajit letumfwaya lhaikhajyenla
wet iwohiyela tähestso.
32“Häpe täjtso Lhawuk lhämet
tä yämeje Asiria laka rey tä yok,
Iwohiyet'a chik tiyäjo hupuy tä Jerusalén.
Iwohiyet'a chik tiyäj hätefwajni lech'ähi.
Iwohiyet'a chik itihlä laka'tshayajp'ot tä itayhlä Jerusalén,
wet iwohiyet'a chik yenlhi let'äsawet yämlek isakane.
33Wet yäpnhichela t'at
len'äyijnaj tälhche tä yikhila,
tek tiyäjohla häp hupuyna.
Olham tä ohäpe Awuk Dios tä olhämet täja.
34Olham ot'uhiyela hupuyna wet ofwayhthila,
häp m'ak tä olham owoye
lhäy'e ohumnhayaj tä otiyej okawo David.”
Rey Senaquerib lewit'äy
35Wet honatsitso Lhawuk laka ángel ihoye lhip tä Asirio lhayis lhaihuthiwek wet ilänhen ciento ochenta y cinco mil (185.000). Wet tä ifwala inuphä, letseyhay i'pe honhat. 36Wet Asiria laka rey Senaquerib yik, ineyhatphä lew'et wet yäple laka honhat tä lhey Nínive. 37Wet iche p'ante ifwala tä Senaquerib ihi len'okhayajw'et tä n'okwiyej laka dios tä lhey Nisroc. Wet leles Adramelec lhäy'e Sareser lhamel ihoye wet ilän lajcha. Wet lhamel yikhen, inukwe alhoho tä ihoye honhat tä Ararat. Wet Senaquerib lhäs tä lhey Esarhadón tä icheyäjo lajcha leniyatyajw'et.
