Eliseo hich'ote p'ante atsinha tesa
1Iche p'ante atsinha tä tesa, profetas elh tä lech'efwa. Wet ilhak'alhi p'ante, wet ihoye Eliseo wet ifwenho tä yok:
–Iwuk, y'il naji och'efwa, wet am lehanej tä lham häpenaj elh tä ihumin Lhawuk wet iwoye lhämtes. Wet athana näm elh tä tufwlhaye, iwatläk ichäjen oles yämlek yen kwenkaya.
2Tä Eliseo iläte, wet y'ätshane tä yok:
–¿Atsi m'ak chik oayene? Fwen n'oho, ¿atsi m'ak tä lew'en tä ihi haw'et?
Wet atsinha ichulho tä yok:
–Iwuk, olham niwohit m'ak chik ow'en tä ihi ow'et. Ts'ilak aceite tä ihi lehifwaj.
3Wet Eliseo ifwenho atsinha tä yok:
–Athana mäh hoye haw'etfwas, alhe chik icheyäjänhat amej lakähis tä naj lheleya. Wet lhokonej tä lechäj ame 4wet hochufwi awukwe, lhäy'e ales. P'ohi lepe wet tsäyhomche aceite lehis, wet tiyejche kanhi tä pokwehen.
5Wet atsinha yikch'oye Eliseo wet lhaip'ohi, lhäy'e leles. Wet leles ihäne lehis wet lham itsäyhomche aceite. 6Wet tä pokwehen lehis, wet tahuyej lhäs elh tä yok:
–Chäj n'oye elh lehi.
Mat lhäs ichulho tä yok:
–Nem iche lehi elh.
Wet nech'e ikasit aceite tä itsäyhchä.
7Wet atsinha nech'e ihoye Dios lakawo Eliseo wet ifwenho. Wet Eliseo yok:
–Mäh fwenlhi aceite wet tiskanpe ates tä ihihlä hin'o tä tufwlha ame. Wet laha lhip tä imälhehi am tä aisiyeja, lhäy'e ales.
Eliseo ifwenho atsinha tä ihi Sunem tä hiw'enla lhäs
8Iche p'ante ifwala tä Eliseo tiyäje hupuy tä lhey Sunem. Wet iche atsinha tä tek w'et atsinha tä lew'et ihi lhiptso, wet wuj tä inityen Eliseo tä iwatläk ichufwiyej tä tufw lhäk. Wet ilhokej häp lewhäy tä Eliseo tiyäjchepej lhiptso, wet imälheyejpej tä t'ek atsinhatso lew'et. 9Wet atsinhatso ifwenho p'ante lech'efwa tä yok:
–Lhek tetshan, olham ohanej hin'o tä ifwut n'amehen tä ichätepej lhaw'et, häpe hin'o tä is alhoho, Dios lakawo. 10Olham ofwitaj is chik n'enlhi lewukwefwaj tä ikaphä yämlek ichufwi. Wet y'atihi lemäwet, lhäy'e mesa, lhäy'e silla, lhäy'e lechäkwhi, yämlek ihi t'at chik nämpej.
11Wet häp tä lhamel yenlhi. Wet iche ifwala tä näm Eliseo wet ihoye lewukwefwajtso yämlek imächufwi. 12Wet ifwenho lakawo tä lhey Giezi tä yok:
–Äne atsinha.
Wet lakawo t'äne atsinha wet atsinha ihoye. 13Wet Eliseo ifwenho Giezi tä yok:
–Fwenho atsinha, ok, “Am wuj tä lech'ot n'oyehen wet let'amaj n'oyejen. Tä mälhyejtso, ¿atsi m'ak tä let'uhläk olhamel owoyej ame? ¿Hä lewatläk olhamel otahuyej rey wok sip'älis kaniyat yämlek lhamel hich'ot ame?”
Wet atsinha ichulho tä yok:
–Kha, olham ois t'at tä oikana tä oiyej oka wichi.
14Wet Eliseo y'ätshane Giezi tä yok:
–Tä mälhyejtso, ¿atsi m'ak chik is chik y'awoyeje atsinha?
Wet Giezi ichulho tä yok:
–Häpe atsinha tä naj lelesa, wet lech'efwa häpe hin'o tä thaläkw.
15Wet Eliseo yok:
–Äne ayej atsinha.
Wet lakawo t'äne atsinha wet atsinha ikasthi lepe. 16Wet Eliseo tahuyej atsinha tä yok:
–Chik nekchäm elh, häp lewhäyna, lew'enla äs, ihihla akweyey.
Wet atsinha ichulho tä yok:
–Kha, iwuk, yej läkwlhin'o. Ahäpe hin'o tä is alhoho tä Dios lakawo.
17Mat mälhyej tä Eliseo ifwenho p'ante atsinha, wet waplu, lhele ihi, wet tä nekchäm elh iwo lhäsa.
Han'äfwaj y'il wet äp yachajo tä iläy
18Wet lhaichihelit p'ante han'äfwaj. Mat iche ifwala tä ihoye lajcha tä iyej lechumyenhay tä õlanyajwos. 19Wet tä iyej lajcha, t'änlhi tä yok:
–¡Äytaj olhetek! ¡Olät olhetek!
Wet lajcha tahuyej elh lakawo tä yok:
–¡Mäh häne lako!
20Wet lakawo ichuma han'äfwaj wet ihäne lako. Wet lako ichuma, iti'pe lakamchetey, ipalak yäk ifwala ikanhi. Wet y'il han'äfwaj. 21Wet atsinha ihäne Dios lakawo Eliseo lewukwefwaj wet imäyenpe lemäwet. Wet inuphä, hip'ohi lepe. 22Wet t'äne lech'efwa wet tahuyej tä yok:
–Oyik, okele hin'o tä Dios lakawo wet opinla. Lhek chen n'okwe lhakawo elh, thatlä asno.
23Wet lech'efwa yok:
–¿Chäte tä lehoye fwalana? Tek häpe fwala tä õt'elakw'et wet häte häpkhit'a iwel'a nech'ayek.
Wet atsinha ichulho tä yok:
–Is t'at, yej lhak'alej, wo atamseka.
24Wet atsinha ifwenho lakawo tä ne'tek iwaklhat häp asno. Wet tahuyej lakawo tä yok:
–Mäh nek n'okwe, nityene asno. Wet yej kasthayen n'okwe n'äyij yämlek olham tä ofwen amho, nech'e lekasthila.
25Wet atsinha yik p'ante yäk ichäte hin'o tä Dios lakawo tä ihi chenaj tä lhey Carmelo. Wet täjp'ante Eliseo hiw'enlä atsinha tä kamaj tojlä, wet tahuyej lakawo Giezi tä yok:
–Lhek yahinyahlä, häpe atsinha tä Sunem lhele. 26Mäh yahinlä, nu alhoho wet ätshane chi tä mälhyej lham, et is t'at, lhäy'e lech'efwa lhäy'e lhäs, et isen t'at.
Wet lakawo ihoye, wet atsinha ifwenho tä lhamel isen t'at. 27Wet häp p'ante tä atsinha ichäte Eliseo tä ihi chenaj, wet itsufwelej lepach'ol. Wet Giezi ihoye atsinha yämlek itiyej kanhi, mat Eliseo tahuyej lakawo tä yok:
–Tej t'attsi, ch'anlhaye, tsi wuj tä lefwitajayaj ihi. Häp Lhawuk iskat n'oho m'ak tä häpe yäk athana, ohanhiyejt'a m'ak tä mälhyej.
28Wet atsinha tahuyej Eliseo tä yok:
–Iwuk, olhamhit'ak ot'alhte ame olhäs. Tä lefwelte n'oho tä ow'enla olhäs, oyok, “Yej läkwlhin'o.”
29Wet Eliseo tahuyej lakawo Giezi tä yok:
–Mäh akhajyenlhi, chuma otsut wet mäh. Chik lechutej elh chik häpe, yej n'okwiyej. Wet chik iche elh tä n'okwi amej, yej chulho. Wet chik lechäte atsinha lew'et, tila'pe otsut han'äfwaj lete'pe.
30Mat atsinha tä han'äfwaj lako tahuyej Eliseo tä yok:
–Owoyeje olhämet häp Lhawuk tä n'ilataj, lhäy'e am tä owoyej ame, oyok, Tek oyikhila hach'oye.
Tä mälhyejtso, Eliseo yikche häp atsinha.
31Wet Giezi ichunch'oye lhamel, wet iti'pe han'äfwaj lete'pe Eliseo letsut. Mat han'äfwaj tek iyahinphä, tek tahuy, wet lehusek tek pile, tek ataj iläyhi. Tä mälhyejtso, Giezi yäpilche len'äyij yämlek ichutlä Eliseo, wet ifwenho tä yok:
–Häp han'äfwaj lehusek tek pile.
32Wet Eliseo tiyäjchufwi lew'et wet hiw'en han'äfwaj tä pajche y'il, i'pe lemäwet. 33Wet Eliseo hip'ohi lepe tä iwo let'alhyaja tä t'alhe Lhawuk. Ts'ilak lham lhäy'e han'äfwaj tä lhamel ichufwi lewukwefwaj. 34Wet Eliseo iho'pe han'äfwaj lemäwet wet t'upi'pe han'äfwaj. Hip'ajtit lhamej wet hip'ajtej lhayhi han'äfwaj lhayhi, lhäy'e letey itiyej han'äfwaj letey, lhäy'e lakweyey hip'ajtitpe han'äfwaj lakweyey. Wet itsufwelej han'äfwaj, hip'ajtit lhamej, wet han'äfwaj nech'e leyalh ihi, hip'e. 35Wet Eliseo yikch'oye han'äfwaj wet ilunlhichufwi lewukwefwaj, ihoyepej lhip elh. Wet yachajo tä iho'pe han'äfwaj lemäwet, häp yachajo tä itsufwelej han'äfwaj wet hip'ajtit lhamej. Wet han'äfwaj nech'e inaktsanlhi siete lewhäy, wet nech'e hich'enhiche letey. 36Wet Eliseo t'äne Giezi wet yok:
–Äne atsinha.
Tä atsinha ihoye, Eliseo tahuyej tä yok:
–Chuma äs.
37Wet tä mälhyejtso, atsinha t'upihchä yäk ihi honhat tä ichätwhäye Eliseo lepach'ol. Wet ichuma lhäs wet inuphä.
Eliseo itäyhat õt'ilek tä iyej lepenek
38Tä tiyäme täjtso, Eliseo yäple Gilgal. Wet lewhäytso wuj nehlä tä ihi honhattso. Wet profetas iyej p'ante Eliseo tä lhamel itaychephä, wet Eliseo tahuyej lakawo tä yok:
–Tihi itäj towej tä wuj wet enlhi apenek, katayhomche profetas.
39Wet iche elh lhamel tä yik, t'ukwe m'ak tä i'pe honhat. Wet ilhoke m'ak tä hätet iwoye amyotaj lhay, wet ichuma, ihanej lakhäyhi yäk poyej. Wet tä pil, yisthomche, ithatche towej tä itsäye lepenek, mat ihanhiyejt'a m'ak tä häpe. 40Wet tä y'o lepenek, hiw'enhomche profetas. Mat tä lhamel tufw, t'änhen, wet tahuyej Eliseo tä yok:
–¡Õt'ilek tä iyej õpenekna!
Wet lhamel ileyej tä tufw. 41Wet Eliseo yok:
–Chäj n'oye harina lhip.
Wet tä õ'chäje, itsäye lepenek wet yok:
–Athana w'enhomche wichi yämlek lhamel tufw.
Wet lhamel tufw t'at, wet nem iche m'ak tä ni'isa tä ihi towej.
Eliseo iwoye lakäpfwayaj yäk pan w'awulhpe wichi
42Näm p'ante hin'o tä tälhe hupuy tä lhey Ba'al-salisa tä ichäje Eliseo veinte pan tä tälhe cebada tä ichun tä õ'lanhi, lhäy'e trigo lhoy tä nech'e tä tälho lhile. Wet Eliseo tahuyej lakawo tä yok:
–W'enhomche wichi yämlek lhamel tufw.
43Mat lakawo ichulho tä yok:
–¿Atsi m'ak tä owoyeje m'ak tä niwujana yämlek w'awulhpe cien wichi chik ow'enhomche?
Eliseo yok:
–W'enhomche wichi yämlek lhamel tufw. Tsi Lhawuk lhämet yok, “T'ekhenla wet imälhehihla lhip.”
44Wet mälhyejtso p'ante tä lakawo hiw'enhomche lhäk wichi, wet lhamel tufw wet imälhehi lhip, mälhyej tä Lhawuk lhämet yäme.
