2~Rey 5

₁Iche p'ante hin'o tä lhey Naamán, honhat tä Aram laka rey kasip'älis tä laka niyat. Häpe hin'o tä len'ohyaj ihi wet wuj tä laka rey iwujyen, tsi lham tä tumenej tä Lhawuk hich'otepej Aram lhayis tä ikalhi letayhfwas. Häpe õka'tshayajwo tä khajay, mat t'inhayaj ihi, amostas tä ilän.

₂Wet iche p'ante lewhäy tä Aram lhayis tä yikhenpej, lhamel itayhlä Israel lhayis, wet lhamel ichäj p'ante atsinha lhutshafwaj tä tälhe Israel wet lhamel yen kweneka, wet atsinha tä Naamán lech'efwa tä yen lakawoya. ₃Wet atsinha lhutshafwaj ifwenho p'ante lewuk tsinha tä yok:

–Is chik owuk Naamán ihoye profeta tä ihi Samaria, Israel lhayis kahonhat. Wet lham ichesthila, nofwila amostas.

₄Wet Naamán ihoye p'ante laka rey wet ifwenho m'ak tä atsinha lhutshafwajtso yäme. ₅Wet rey ichulho Naamán tä yok:

–Mäh tä lehoye, wet häte olham othathiyela carta Israel laka rey.

Wet yik Naamán, ichäj treinta mil (30.000) monedas tä plata, lhäy'e seis mil monedas tä oro, wet lhäy'e wesaj lhotay yämlek õyenlhi diez õw'uyis. ₆Wet häte ichäje carta Israel laka rey, wet lhämet tä ihi yok, “Othat ame oka cartana. Is chik lehanej tä ochen ame okawo Naamán yämlek lechestej amostas tä wuj tä ilän.”

₇Wet täjp'ante Israel laka rey iyahyen carta, hich'esajche lew'uy, hin'älit tä lewäk ihi, wet yok:

–¿Atsi m'ak tä iwoye Aram laka rey? ¿Hä fwitaj ohäpe Dios? ¿Hä fwitaj ohanej owoyneje chik oläythen wichi wok oy'inhat? ¿Chäte tä ichen n'oye hin'ona wet t'uhläk ochestej amostas tä ilän? ¡N'äl t'at tä t'ukwe m'ak tä iti n'oyej!

₈Täjp'ante Dios lakawo Eliseo ihanej tä Israel laka rey hich'esajche lew'uy tä lewäk ihi, wet ichene lhämet tä yok:

–¿Chäte tä lech'esajche haw'uy? Athana is chik hin'otso iho n'oye wet ihanhiyeja tä iche profeta tä ihi Israel.

₉Tä mälhyejtso, Naamán ihoye, ihi lakaletaj lhäy'e yel'atas, wet ichäte Eliseo lew'et wet ikasthi lepe. ₁₀Wet Eliseo ichene lakawo, ne'tek ifwenho Naamán tä yok:

–Mäh hoye tewok Jordán wet lelej amche siete lewhäyis tä ley'uyho. Wet nofwila amostas tä ihi hat'isan wet lechesla.

₁₁Tä Naamán iläte, wet lewäk ihi wet yikej lhämet tä yok:

–¡Wet olham oyenek lham tä inuhiphäla tä iyahin ohilä wet ikasthila chik t'änch'oye Lewuk Dios! ¡Wet oyenek itihla'pe lakwey häp olhip tä ot'inhayaj ihi wet ichesat n'oyej amostas! ₁₂¿Wet chäte tä ne'tek ohoye tewok Jordán? ¡Lhek yahinya, tewok lhayis Abana lhäy'e Farfar tä ihi Damasco, lhamel inu'pe ilhokej tewok lhayis tä ihi Israel! ¡Isin'ek ohoye tewok lhayistso wet olej lhamche yämlek nojphä ot'inhayaj!

Wet Naamán yikch'oye lhiptso wet wuj tä lewäk ihi. ₁₃Mat lakawos ihoye wet tahuyej tä yok:

–Owuk, chik profeta ne'tek lewoyen'e m'ak tä atha, lewoye t'at. Wet tä tajlhame tä yok, “Lej amche häpkhilek noj hat'inhayaj”, is chik lewoye t'at.

₁₄Tä mälhyejtso, Naamán ihoye tewok Jordán wet y'uyho siete lewhäyis, mälhyej tä Dios lakawo Eliseo ne'tek iwoye. Wet iches, wet t'isan hätet iwoye han'äfwaj t'isan, nech'e is t'at.

₁₅Wet Naamán pile p'ante Dios lakawo Eliseo, lhäy'e ilhokej iyhäj tä nekche. Wet tä lhamel ichäte, wet Naamán tahuyej Eliseo tä yok:

–Lhek yahinya, nech'e ohanej ihi tä newache Dios elh tä ihonhatena, ts'ilak Dios tä iyej Israel lhayis. Athana is chik lechumlä awayhat tä ow'en amho tä akawon'o.

₁₆Mat Eliseo ichulho tä yok:

–Owoyeje olhämet häp olham Owuk Dios tä n'ilataj, oyok, Tek ochumlä m'ak tä tälh ame.

Wet tanej tä Naamán inityenej Eliseo chik ichumlä m'ak chik häpe, mat iwohiyet'a. ₁₇Wet Naamán yok:

–Chik mälhyejtso, is chik lewahin n'oyej chik otilhäj lhip honhat tä tälho Israel, otetshanhiyeja tä w'awulhpe täkwfwas mola lhayis. Tsi tälhe ifwalana ts'ilakhila Israel lhayis Lewuk Dios tä on'okwiyej. Oyenhipeja lew'ayhata tshätäy tä õ'länhen lhäy'e tä õ'wunhomche, wet oleyej tä on'okwiyej dios lhayis iyhäj. ₁₈Mat iche m'ak weihalha tä ot'alhe Israel Lewuk Dios chik itäyhat n'oyej otes. Chik ichätepej lewhäy tä owuk rey ihoye laka dios Rimón lew'et yämlek n'okwiyej, wet chik lham lhaithatpe okwey wet hätej olham ot'upihchä tä oihi lew'ettso, is chik itäyhat otes chik owoye täjtso.

₁₉Wet Eliseo ichulho tä yok:

–Mäh tä lhek, atamsek ihi.

Naamán yikch'oye p'ante Eliseo wet yäk tojche tä tiyäjche honhattso. ₂₀Wet Giezi tä profeta Eliseo lakawo iwo letichunhayaja tä yok, “Athana tä owuk Eliseo tä nichumahlä m'ayhay tä Naamán ichäje, wet hich'anlhaye tä yik Aram lheletso, olham owoyeje olhämet häp Lhawuk tä n'ilataj, oyok, Ohänla, okelhichela, onuhla alhoho yämlek okatej m'ak chik häpe tä tälhe lham.”

₂₁Wet Giezi yik, ihän p'ante Naamán. Wet Naamán hiw'enlä tä inu alhoho tä ihänphä. Wet Naamán inuhchä tä tälho lakaletaj tä iyahinlä, wet y'ätshane tä yok:

–¿Atsi m'ak tä awit'äy? ¿Hät aisen amel?

₂₂Wet Giezi ichulho tä yok:

–Ey'a, olhamel oisen t'at. Mat owuk Eliseo tä ichenn'o ame, ne'tek ofwen amho tä nech'ene tä nämhen täkwfwas manses tä profetas tä tälhe chenaj tä ihi honhat tä lewuk wichi tä tälhe letes Efraín. Wet chik lewoye, lew'enho lhamel tres mil monedas tä plata wet lethatlä wesaj lhotay yämlek yenlhi lew'uyis tä nech'ayhas.

₂₃Wet Naamán ichulho tä yok:

–Is chik ow'en amho seis mil kolhki lhipey.

Wet Naamán inityenej chik ichumlä, wet ithatho täkwfwas lehis wet hip'ajtej wesaj lhotay. Wet yachaje täkwfwas lakawos, ne'tek lhamel tilhäje Eliseo, wet Giezi ihänphä lhamel.

₂₄Täjp'ante lhamel ichäte chenaj, Giezi ichuma m'ayhaytso wet t'amajej, itichufwi lewukwe. Tä ileyej, wet ichen Naamán lakawos, ne'tek yäpilthä. ₂₅Wet Giezi ihoye lewuk Eliseo, wet Eliseo y'ätshane tä yok:

–¿Giezi, chi tä letälhin'e?

Wet Giezi ichulho tä yok:

–Iwuk, olham tek ohoyene lhip chik häpe.

₂₆Mat Eliseo yok:

–Täjnaj hin'o inuhchä tä tälho lakaletaj yämlek iyahin ahilä, hätej olham otichun amche wet ow'ene m'ak tä lewoye. Isit'a tä lechumlä kolhki lhäy'e wesaj lhotay. Isit'ak lechäj yachuyajw'etes, wok tson'atas, wok w'asetas, lhäy'e õkawos tä hin'ol, lhäy'e õkawos tä atsinhay. ₂₇Tä mälhyejtso, Naamán t'inhayaj ailänla, lhäy'ehila ales yäk ichäte lepes lheley.

Wet täjp'ante Giezi yikch'oye Eliseo, wet amostas ilän wet wuj tä pelaj t'äj.