Ap.Lh 24

₁Tä tajyäme cinco ifwalas, Sacerdote tä Lhamya Ananías nech'e nämho Cesarea, lhäy'e elhpej hin'ol tä thänhäy, lhäy'e abogado tä lhey Tértulo. Lhamel ihoye gobernador yämlek y'ithatejlhi Pablo m'ak tä fwetaj häpe tä letes. _2-3Wet tä sip'äl ihäne Pablo lhamel, nech'e abogado iwoye lhämtes tä yok:

–Ika niyat Félix tä ahäpe elh tä lewujyaj ihi, olhamel lhäy'e oka wichi tä Judío lhayis wuj tä oispej amej wet otamsekis ihi t'at. Häte olhamel ow'enpej amho gracias häp ahanyaj tä i'amej, tsi ow'en tä yiklhaphä t'at m'ayhay tä isen tä ihi olhamel oka honhat, wet lhip at che häpe olhamel ow'en tä mälhyej'attso. Eh, Félix tä awujyaj ihi, wuj olhamel okäjyaj tä owoyej ame.

₄“Mat oyenek isit'ak pitaj olhämet. Tä mälhyejtso, woye tä owoye tä olhamel olhaip'altsen ame yämthilek letach'ahu aj n'oyehen lhimphaj. ₅Olhamel ow'en tä hin'otsi wit'äyhtsaj t'at, lhayen lhetekayej häp wichi tä Nazareno lhayis, wet honhat at che häpe tä ihoye, ika'tshayen t'at Judío lhayis wet ilhaklitwethä. ₆Wet iche m'ak elh tä iwoye. Lham ikokyene Dios Lew'et tä ihi Jerusalén, wet häp tä tamenej tä olhamel otsoklhi'pe täjtso. ₈Is che am letay'ätshaneje häp m'ak tä oyämejetso, wet lew'enla tä matche t'at.”

₉Tä Tértulo ileyej lhämet tä iwoyena, wet Judío lhayis tä iyej yok:

–Matche m'ak tä abogado yäme, mälhyej'attso.

₁₀Wet gobernador nech'e ne'tek Pablo yämlhi. Wet Pablo yok:

–Ohanej tä wujpe nekchämes tä am ahäpe lewo tä ikalelhätchä m'ayhay tä iyej wichi tä ihi honhatna. Tä mälhyejtso, onowayhiyet'a tä oyämlhi letape tä oihi tä letayche. ₁₁Che letay'ätshane wichi, lehanhiyeja tä ts'ilak doce ifwalas tä tälhe täjnaj onchätho Jerusalén yämlek on'okwiyej Dios. ₁₂Mat niwohit elh che hiw'en n'oyej che ottayejlä olhämet elh che häpe. Wet häte oka'tshayenhit'a wichi tä oihi Dios Lew'et, wok tä oihi n'ohusew'etes iyhäj, wok tä oihi lhip che häpe. ₁₃Nilhokej m'ak tä lhameltsi yen tesa n'oyej, ihanhiyejt'a iwoyneje che yäm kalelhäj. ₁₄Mat oweskathiyejt'a tä ofwel amho tä on'okwiyej häp olhamel ojchalis laka Dios tä onukwe N'äyij tä häpe Jesús, tä lhameltsi yäme tä häpe m'ak tä kamatache. Ot'ekhaye t'at nilhokej m'ak tä Ley p'ante tälhe Moisés yäme, lhäy'e profetas lhämtes p'ante. ₁₅Wet omälhyet iwoye lhamel tä t'ekhaye tä Dios inuhthichephäla n'op'itseyhay, häp wichi tä isen lhäy'e iyhäj tä ni'isahen. ₁₆Wet häp tä oy'enhiyejt'a mat olhay'amkatej tä owatläk newache otes che ihihlä Dios lhäy'e wichi.

_17-19“Nekchämes iyhäjnajtso olunche t'at honhatil iyhäj. Mat tä paj wet otpile naji oka honhat wet ochäje opuhfwas häp m'ak tä iyhäj tä otälhe yen t'awayhtesa. Wet ohoye Dios Lew'et wet olhayen t'amajcheta, mälhyej lakey tä Ley p'ante tälhe Moisés ne'tek õ'woye, wet owo Dios t'awayhtesa. Mat wujit'a'pe wichi tä ihi wet newache huyaj che häpe. Mat nech'e nämhen Judío lhayis tä tälhe Asia, wet lhamel hiw'en'atn'o tä oihi Dios Lew'et tä owoye täjtso. Häp lhameltso häp tä is che iho kana häpkhilek yäme m'ak tä tamenej tä tatay n'ohlä, che iche. ₂₀Wok lhamel tä ikana, häp tä is che yäme che laka Concilion'aj nilhoke m'ak tä otes, täjnaj oihi tä lhamel tatache. ₂₁Tajlhame tä ofwitsenej naji olhämet tä oiyej lhamel tä oyok, Olham ot'ekhaye tä Dios inuhthichephäla n'op'itseyhay, häp tä tamenej tä lhenay tesa n'oyej ifwalana.”

₂₂Félix ihanej t'at häp m'ak tä wichi tä yen lehäneka Jesús, t'ekhaye wet iwoye. Wet tä iläte Pablo lhämettso, wet yok:

–N'aleyej ayej m'ayhayna. Mat che näm sip'äl kaniyat Lisias, oläthiyela lhämet wet kalelhäjila m'ak tä owoye.

₂₃Wet Félix ne'tek sip'ä yachaje Pablo n'op'onthi tä itihi, mat äp yok:

–Ch'anlhayepeja ayej che iwoye m'ak tä t'uhläk iwoye, wet yej n'äyejo iyhäj che t'uhläk tach'oteje m'ak at che häpe.

₂₄Tä tajyäme ifwalas iyhäj, yachajo tä näm Félix, lhäy'e lech'efwa Drusila tä häpe Judío lhayis ka'tsinha. Wet Félix ne'tek õ'hän alhoho Pablo. Tä nichäte, lhamel iläte tä yäme häpet n'ot'ekhahyaj tä õ'tiyej Cristo Jesús. ₂₅Mat tä Pablo yäme n'o'isyaj, lhäy'e tä hin'o iwohiyet'ak nitumahlä lenech'ethayajay tä ni'isachehen, lhäy'e tä nämla t'at Dios lakalelhthayaj, Félix inuhat lhamho wet ifwenho Pablo wet yok:

–Mäh, is che lhek athana. Che ifwala elh ot'änla ame.

₂₆Mat häp m'ak tä Félix letichunhayaj, yenek Pablo ifwenhiho chinaj t'äj yämlek inuhatphä tä ihi n'op'onthi. Häp tä tamenej tä yachajopej tä t'äne wet yämhoplhipej.

₂₇Wet nekchämes täkwfwas tä mälhyej p'antetso, pajtha nichäte lewhäy tä Félix ileyej tä häpe gobernador, wet nech'e elh tä lhey Porcio Festo icheyäjo lew'et. Mat tä Félix t'uhläk ikänitlhi Judío lhayis, wet häp tä iwomhi t'at n'op'onthi häp Pablo.