Daniel lhäy'e iyhäj let'unfwas ihi p'ante Babilonia
1Ihi tres nekchämis tä Joaquim niyatej p'ante Judá, wet nech'e niyat Nabucodonosor tä häpe rey tä ihi Babilonia, lham ihoye Jerusalén, lhäy'e laka nifwotas, wet ilunej tä tatayhlä. 2Wet Lhawuk ikhajyen Nabucodonosor yämthilek ikalhi p'ante Joaquim, wet äp lhayen lewuka iyhäj n'olhäthis p'ante ichufwi Dios Lew'et. Wet Nabucodonosor ichäje Babilonia hin'ol iyhäj wet yen kwenkaya, wet äp tachuma n'olhäthistso wet ichäje laka dios lhayis lew'et.
3Wet tahuyej häp lakawo tä lhamya tä lhey Aspenaz wet yok:
–Chäj alhoho iyhäj Israel lhayis tä okwenkay. Tshupyene iyhäj tä niyatey leles lhäy'e hin'ol tä n'otäfwnhay leles. 4Is chik häpehen hin'ol mamses tä n'äl t'at tä isis wet newache m'ak chik lewit'äyhyaj chik iyej t'isanis. Wet is chik häpehen iyhäj tä lehusek ihi wet ihan honhatejen wet lhaichufwenej m'ayhay, yämthilek tach'ote ochumet tä ihi oniyatyajw'etna. Wet iwatläk õ'chufwenejen lhamel häp n'amel tä n'ahäpe Babilonio lhayis lhalhayhi lhäy'e tä õ'lesayen.
5Wet rey ne'tek õhw'enho lhamel ifwalapej häp lhäk lhäy'e hat'es, mälhyej tä õyen lhäka tä häpe rey. Wet ne'tek õ'chufwenhen lhamel pajtha tres nekchämis, häpkhilek wak'alh chik tach'ote lechumet.
6Wet häp mamses tä õyämetso, iche iyhäj tä iyej lhamel tä lheyis Daniel, Ananías, Misael, wet Azarías. Nilhokej hin'ol mamsesna tälhehen wichi tä tälhe letes Judá. 7Wet rey lakawo tä lhamya iwo iyhäj lheyisa. Häp Daniel, rey lakawo yen lheya Beltsasar, wet Ananías häp tä yen lheya Sadrac, wet Misael häp tä yen lheya Mesac, wet Azarías häp tä yen lheya Abed-nego.
8Wet Daniel itihi lehusek tä nitufwa lhäk tä rey ne'tek tuj, lhäy'e tä niyäyayej hat'es tä rey ne'tek iyäyej. Tsi letichunhayaj yok, “Chik otufw wet oyäyej, wet nech'e okok'ayeje tä ihi tä Owuk Dios tatache.” Wet häp tä ifwenho Aspenaz wet yok:
–Yej nityen n'oye n'olhäk wet n'olhät tä kok'aye.
9Wet Dios itiyej lakäpfwayaj tä is häp Daniel, wet Aspenaz ihumin wet t'uhläk tach'ote. 10Mat nowaye rey, wet häp tä ifwenho Daniel wet yok:
–Häp m'ak tä letuj lhäy'e m'ak tä leyäyej, rey t'at tä ne'tek ow'en amho. Wet chik lham hiw'en tä lajit akhajyhayaja, tek amälhyej iwoye iyhäj mamses, häpkhilek letamenay n'oyej chik rey ilänn'o.
11Mat Daniel lhäy'e let'unfwas, iche hin'o tä Aspenaz ne'tek t'uye lhamel. Wet Daniel ihoye hin'otso wet yämhoplhi wet yok:
12–Is chik lhelhte ayej olhamel. Is chik õhw'en n'ohohen olhäk tä laj itshäwetayej, lhäy'e inät tä oyäyej, pajla'tha diez ifwalas. 13Chik tajyäme lewhäytso, wet letetshanhila n'oyejen wet äp letetshanhila iyhäj mamses. Lew'enla chik isen lhamel wok olhamel chik oisen p'iya. Wet lewohiyeja n'oyehen m'ak tä lefwetaj t'uhawetej.
14Tä hin'o iläte Daniel letichunhayaj, wet yok:
–Ofweta is t'at.
Wet diez ifwalas tä yenlhi p'ante lhelhtshayaj tä itiyej lhamel. 15Wet tä tefwaytshi lewhäytso, n'äl t'at lhamel tä wuj tä is lhäy'e tä takhajayhen, wet inu'pe iyhäj mamses tä tuj p'ante m'ak tä rey yen lhäka. 16Wet häp tä hin'o nem äp yachajo tä hiw'enho Daniel lhäy'e let'unfwas häp itshäwet lhäy'e hat'es, mat hiw'enhopej m'ak tä laj itshäwetayej lhäy'e inät tä iyäyej.
17Wet Dios hiw'enho p'ante lehanyaj lhamel, lhäy'e letäfwnhayaj, wet wuj tä ihan m'akejen. Wet Daniel lham t'at tä ihanej tä ifwenho elh chik häpe lefwilhey lhäy'e lew'enhay.
18Tä tefwaytshi p'ante tres nekchämis tä rey y'ithat, wet nech'e Aspenaz ichäj alhoho häp mamses wet itihi tä rey tatache. 19Wet rey yämhoplhi lhamel, wet hiw'en tä newache elh mamse tä hätet iwoye Daniel, Ananías, Misael, lhäy'e Azarías, tä lhamel matche tä lehusek ihi. Wet rey itshupyene lhamel yämthilek tach'ote lechumet. 20Wet m'ak at chik häpe chik rey tay'ätshane lhamel, wet n'äl tä wuj tä lehanyajay ihi, inu'pe häp han'ältshantses lhäy'e häp hiyawul tä ihi leniyatyajtso. 21Wet Daniel tujlhache lechumet pajtha rey tä lhey Ciro tiyäjo leniyatyaj.
