Ezeq 48

_1-7“Häp honhat lepes tä tumej lhip tä tafwojyhiye tälhiyela lewomekitaj tä Mediterráneo wet tiyäjichela Hetlón, lhäy'e tachenhas kawayhil tä ihi Hamat, lhäy'e häp Hasar-enán, wet inuhikwela lepes häp honhat tä Damasco lhip tä tapinhiye lhäy'e häp honhat tä Hamat lhip tä tapinhiye. Wet Israel lhayis tä tälhe letes tefwajpejni õhw'enhihopeja lhip häp honhat, tälhiyela honhat lepes tä tumej lhip tä ifwala inuhiphä, wet pajla'tha nichäte honhat lepes tä tumej lhip tä ifwala y'uyhi. Wet häp täja häp lhamel tä õ'kanchehchä: Häp wichi tä tälhe letes Dan, wet äp wichi tä tälhe letes Aser, wet äp wichi tä tälhe letes Neftalí, wet äp wichi tä tälhe letes Manasés, wet äp wichi tä tälhe letes Efraín, wet äp wichi tä tälhe letes Rubén, wet äp wichi tä tälhe letes Judá.

₈“Iwohiyet'ak õknit'amajayej n'oho häp honhat lhip tä hap'akej Judá lhayis kahonhat lepes. Wet is chik ihihila doce kilómetros y medio tä tsajo, wet tä pitaj häp tä tehlat iwoye lhipey iyhäj tä õhw'enhihomchela wichi, tälhe lhip tä ifwala inuhiphä pajtha nichäte lhip tä ifwala y'uyhi. Wet häp tä is chik Owukwe ihihila lechowej häp lhiptso. ₉Wet honhat lhip tä õyen t'amajcheta n'oyej tä ihihila honhat lhiptso, is chik õ'tihi doce kilómetros y medio tä pitaj, wet tä tsajo häp tä is chik ihi diez kilómetros. ₁₀Häp honhat lhipna, ihichela honhat lhip tä ihi tä õyenla t'amajchetayej sacerdotes. Tälhiyela lhip tä ifwala inuhiphä pajla'tha nichäte lhip tä ifwala y'uyhi, hiw'enla doce kilómetros y medio, wet tälhiyela lhip tä tafwojyhiye pajla'tha nichäte lhip tä tapinhiye, hiw'enla cinco kilómetros. Wet olham Owukwe ihihila lechowej honhat lhipna. ₁₁Häp honhat lhipna häp tä ot'amajejo sacerdotes tä olham tä oyen t'amajchetesa tä häpe hin'ol tä letes Sadoc. Lhamel t'ifwti n'oyej wet ilehiyejt'a ochumet, itenhit'a iyhäj Israel lhayis tä iwomn'o, wet itenhit'a Leví lhayis tä lhamel ileche tä ihänlhi on'äyhäy. ₁₂Wet häp tä tamenej tä iche honhat lhip tä lhamel tä lewuk tä ihi honhat lhip tä ot'amajchet. Wet ifwache t'at häp Leví lhayis kahonhat lhip, wet häpe honhat tä matche tä n'ot'amajchet.

₁₃“Wet Leví lhayis lhamel hiw'enla honhat lhip tä lhamel t'at tä laka honhat, ifwache t'at sacerdotes kahonhat. Wet hiw'en doce kilómetros y medio tä pitaj wet cinco kilómetros tä tsajo. Wet tä imälhewek honhat tä õyen t'amajchetan'o, ihihila doce kilómetros y medio tä pitaj wet diez kilómetros tä tsajo. ₁₄Wet häpe honhat lhip tä matche tä is. Wet isit'ak õ'wom, wok õ'thatlä m'ak at chik häpe, wok õhw'enho hin'o elh chik häpe, tsi ot'amajchet.

_15-16“Wet häp honhat lhip tä imälhehi tä hiw'en doce kilómetros y medio tä pitaj wet dos kilómetros y medio tä tsajo, khit'a honhat lhip tä ot'amajchet. Wet häp tä is chik wichi yen lew'eta, wet häp hup tä w'atshan tä itshätäy lhäk ilunhiyejlhila wichi lew'et. Wet dos mil doscientos cincuenta (2.250) metros tä pitaj wet dos mil doscientos cincuenta metros tä tsajo tä lew'etla hupuy tä lhamya tä nitäkw tä ihihila lechowej. ₁₇Wet häp hup tä itshätäy lhäk ilunhiyejlhila hupuy, wet hiw'enla ciento veinticinco metros tä tsajo häp lhip tä tumej tafwojyhiye, wet ciento veinticinco metros tä tumej tapinhiye, wet ciento veinticinco metros tä tumej lhip tä ifwala inuhiphä, wet ciento veinticinco metros tä tumej lhip tä ifwala y'uyhi. ₁₈Häp honhat lhipey tä iwhäye hupuy iche honhat lhip tä imälhehi tä ifwache lhip tä ot'amajchet. Wet ihi cinco kilómetros tä pitaj tä tumej lhip tä ifwala inuhiphä, wet cinco kilómetros tä tumej lhip tä ifwala y'uyhi. Wet honhat lhipeyna häp tä wichi tä lew'et hupuy lhamel tutcheyhihila, häpkhilek tufw häp lakäs lhay chik tälho. ₁₉Häp wichi tä ihi hupuyna tä tachumwethä, elh at chik häpe hin'o chik tälhe Israel lhayis, lhamel tutcheyhihila honhat lhipeyna. ₂₀Tä nilhokej honhat lhipeyhas tä õt'amajej n'oho, lhäy'e häp lhip tä õt'amajejo hupuy, ihihila doce kilómetros y medio tä tsajo wet doce kilómetros y medio tä pitaj.

₂₁“Wet äpte is chik iche täkwfwas honhat lhipey tä amel let'amajejo häp Israel lhayis laka niyat. Wet is chik tumej lhip tä ifwala inuhiphä wet lhip elh honhat is chik tumej tä ifwala y'uyhi. Wok oyok, honhat lhip tä ot'amajchet ihihila lechowej, lhäy'e häp lhip tä õt'amajejo Israel lhayis laka hupuy. Wet ihihila doce kilómetros y medio tä tsajo häp honhat lhip tä tumej tä ifwala inuhiphä, wet doce kilómetros y medio tä tsajo häp honhat lhip tä tumej tä ifwala y'uyhi. Wet häp lhip tä õt'amajejo Owukwe häp tä ihihila lechowej. ₂₂Wet honhat lhip tä lewuk Leví lhayis, lhäy'e häp lhip tä õt'amajejo hupuy, äpte ihihila lechowej. Wet honhat lhip tä lewuk wichi kaniyat ihlawhäye Judá lhayis kahonhat lhäy'e Benjamín lhayis kahonhat.

_23-27“Wet iyhäj Israel lhayis laka honhates tumhiyeja lhip tä tapinhiye. Wet lhamel tä tälhe letes tefwajpejni õhw'enhihopeja lhip häp honhat, tälhiyela honhat lepes tä tumej lhip tä ifwala inuhiphä, wet pajla'tha nichäte honhat lepes tä tumej lhip tä ifwala y'uyhi. Wet häp täja häp lhamel tä õ'kanchehchä: Häp wichi tä tälhe letes Benjamín, wet äp wichi tä tälhe letes Simeón, wet äp wichi tä tälhe letes Isacar, wet äp wichi tä tälhe letes Zabulón, wet äp wichi tä tälhe letes Gad.

₂₈“Wet häp Gad lhayis laka honhat lepes tä tumej tapinhiye, línea tälhiyela Tamar wet tiyäjichela inätw'etes tä ihi Meriba-kadés, lhäy'e häp tewok tä tumejlä Egipto, wet pajla'tha nichäte lewomekitaj tä Mediterráneo.

₂₉“Häp amel tä Israel lhayis tä tälhehen atetsel tä ihi doce, häp täjtso honhat tä is chik lew'en amhomche häpkhilek alewuhuy t'at, pajla'tha y'aje nilhokej häp ales. Olham tä ohäpe Awuk Dios olhämet täja.

₃₀“Häp tähesna häp Jerusalén lepelis. Wet n'olafwek tä tuntey häp tä ilunejlhi hupuy, wet lhip tä tumej tafwojyhiye häp tä hiw'en dos mil doscientos cincuenta (2.250) metros tä pitaj. ₃₁Wet lepelis õyen lheyisa häp Israel lhayis letetselte ihi doce. Wet iche tres häp lepelis tä tumej tafwojyhiye, wet elh lhey Rubén, wet elh lhey Judá, wet elh lhey häp Leví. ₃₂Wet häp lhip tä tumej lhip tä ifwala inuhiphä hiw'en dos mil doscientos cincuenta metros tä pitaj. Wet iche tres häp lepelis tä ihi, wet lepe elh lhey José, wet elh lhey Benjamín, wet elh lhey häp Dan. ₃₃Wet häp lhip tä tumej tapinhiye hiw'en dos mil doscientos cincuenta metros tä pitaj. Wet ihi tres häp lepelis, wet lepe elh lhey Simeón, wet elh lhey Isacar, wet elh lhey häp Zabulón. ₃₄Wet lhip tä tumej lhip tä ifwala y'uyhi hiw'en dos mil doscientos cincuenta metros tä pitaj. Wet tres häp lepelis tä ihi, wet lepe elh lhey Gad, wet elh lhey Aser, wet elh lhey häp Neftalí. ₃₅Wet n'olafwek tä ilunejlhi hupuy ihi nueve mil metros tä nilhokej.

“Wet tälhe ifwalatso tä hupuy nech'e lhey t'at tä õyok, Lhawuk ikana.”