Nekchämis tä Israel lhayis ihi p'ante ts'anis
1Wet y'alhokej n'amel y'äpilche tä y'atälhche, wet y'anukwe n'äyij tä inukwe ts'anis tä tiyäje Lewomekchät, mälhyej tä Lhawuk ne'tek owoye. Wet pitaj lewhäy tä y'alunche chenhas tä lhey Seír. 2Wet Lhawuk tahuy n'oyej wet yok, 3“Pitaj lewhäy tä amel lelunche häp chenhas. Athana tiyäjche tä tafwojhiye, 4wet fwenho wichi olhämetna, olak, Amel lenuhikwela honhat tä lewuk häp wichi tä letes Esaú, häp lhamel tä ihi Seír, wet äp häpe wichi tä amel aiyhäj t'at. Lhamel wuj tä noway amehen. Mat oyok, uyayhlä, 5yej wola aka'tshayajayej lhamel. Tsi ow'enhit'a amhohen lhiphaj häp laka honhat, wok apach'o w'ethaj chik ow'en amhohen. Tsi chenhas tä Seír lewuk t'at häp wichi tä letes Esaú. Olham tä ow'enho lhamel. 6Is chik amel lewo lahaya äk chik tälhe lhamel lhäy'e inät chik amel leyäyej. 7Olham tä amel Awuk Dios wuj tä otkäpfwaye nilhokej m'ak tä amel lewoyaye. Wet cuarenta nekchämis tä oi'amejen wet ot'u amehen tä lewoyay haw'ekyaja tä lenukwe ts'anis tä wujna. Wet niwohit m'ak chik tatäy amejen.”
8Häpehte täjtso Lhawuk lhämet. Wet n'amel y'atujlhache lhaw'ekyaj wet y'atiyäjche n'äyij tä tiyäje Lewomekitaj Nosoy, lhäy'e hupuy tä lhey Elat, lhäy'e Esión-geber, wet y'anukwe honhates tä lewuhuy lhapuhfwas tä letes Esaú, häp lhamel tä lew'et Seír. Wet tä y'atälhehte, y'alunej tä y'istejlä n'äyij tä tiyäjche ts'anis tä tiyäje Moab.
9Wet Lhawuk tahuyhte n'oyej wet yok, “Yej lhaklitawethä Moab lhayis wet yej wola aka'tshayajayej. Tsi lhamel häpehen wichi tä letes Lot wet ow'enhit'ala amhohen lhiphaj lhamel laka honhat. Tsi olham tä ow'enho lhamel häp hupuy tä lhey Ar yämthilek lewuk t'at lhamel.”
10Wet honhattso ifwalas tä pajche wichi tä lhey Em lhayis häp p'ante tä lew'et. Wichi tä wus wet äp pites, hätet iwoye gigante Anak leles, wet äp wujpey p'ante lhamel. 11Wichi yäme tä häpehen Refaím lhayis, wet Moab lheley yen lheya Em lhayis. 12Wet häp honhat tä lhey Seír, ifwalas tä pajche wichi tä lhey Hor lhayis häp p'ante tä lew'et. Mat Esaú leles ilänhen p'ante wet isoyej laka honhattso, wet häp tä lhamel yen lew'eta, mälhyet iwoye Israel lhayis tä Lhawuk hiw'enho häp honhat yämthilek lewuhuy.
13Wet Lhawuk tahuyhte n'amejen wet yok, “Mähen, istho tewok n'äyij tä lhey Zered.” Wet matche, y'isthohte tewok n'äyijtso.
14Wet tajyäme treinta y ocho nekchämis, tälhe ifwalahte y'ekch'oye Kadés-barnea pajtha y'istho tewok n'äyij tä Zered. Wet hin'ol tä ihanej tä iwopej laka'tshayaja, y'inhen nilhokej, mälhyej tä Lhawuk yäme tä mälhhiyejattso. 15Lhawuk ichätyenpejpe lewäk pajtha nofwej. 16Wet tä niwohit elh lhamel chik imälhehi, 17Lhawuk tahuyhte n'oyej wet yok, 18“Ifwalana is chik letiyäjo Moab lepes wet lehoye Ar. 19Mat chik lechäte Amón lhayis, tä äp lhamel letes t'at Lot, yej lhaklitawethä wet yej wola aka'tshayajayej. Tsi tek ow'enla amhohen lhiphaj lhamel laka honhat, tsi pajche olham tä ow'enho yämthilek lewuhuy lhamel.”
20Häte honhattso wichi yäme tä Refaím lhayis tä lewuk p'ante. Tsi ifwalas tä pajche lhamel letetsel Refaím lhayis lew'et t'at, häp wichi tä Amón lhayis yen lheya Zamzum lhayis. 21Wichitso wujpey p'ante wet äp häpe wichi tä wus wet äp pites, hätet iwoye gigante Anak leles. Mat Lhawuk yachaje p'ante Amón lhayis wet itäyhat, wet häp tä lhamel yen lew'eta häp honhattso. 22Mälhyej p'antetso m'ak tä Lhawuk iwoyeje Hor lhayis. Lham yachaje wichi tä letes Esaú wet lhamel itäyhat. Wet häp tä lhamel yen lew'eta laka honhat Seír yäk häp ifwalasna. 23Hätet iwoye wichi tä Hiv lhayis tä lhamel lew'etes hupuy tä tott'ahomche Gaza. Häp Filisteo lhayis nämhen p'ante tä tälhe Creta, wet itäyhat lhamel wet yen lew'eta laka honhat.
24Wet Lhawuk äp tahuyhte n'amejen wet yok, “Mähen, istho tewok tä lhey Arnón. Olham otch'otla amehen wet lekalhihila Amorreo tä lhey Sehón tä häpe rey tä ihi Hesbón, wet alhenla lewuka laka honhat. Tiyäjola honhattso wet wola aka'tshayajayej. 25Tälhe ifwalana ochätyenla'pe lenowayhyaj nilhokej wichi tä i'pe honhat. Chik iläte wichi tä yäm amehen, lhamel tachettichehen wet wuj tä lelhakli ihi lhamel.”
Israel lhayis ikalhi rey Sehón
26Wet Moisés äp yok:
Tä n'amel y'ehihte ts'anis tä lhey Kademot, ochenehte oka silätwos häp rey Sehón tä lew'et Hesbón tä ot'uhläk owoyeje n'otamsek. Wet oyok, 27“Olhamel ot'uhläk onukwe aka honhat, mat onuhikwelat n'äyij tä lhamya wet tek ottsayhihena. 28Olhamel owohla lahaya olhäk chik owatlä chik ihi aka honhat, häpkhilek olhäk ihi t'at. Häte chik olhamel oyäyej inät tä ihi aka honhat, owohla lahaya. Tajlhama t'at tä ot'uhläk lewahin n'oyejen tä onuhikwela aka honhat, 29mälhyej häp wichi tä letes Esaú tä lhamel lew'et Seír, lhamel iwahin at n'oyejen tä onukwe laka honhat, häte Moab lhayis tä ihi Ar. Tsi olhamel oyikhen pajla'tha oyistho t'at tewok Jordán, yämthilek olhamel onchäte honhat tä olhamel Owuk Dios hiw'enla n'ohohen.”
30Matkat rey Sehón iwohiyet'a olhämettso, wet iwahnhit'a n'amejen yämthilek y'anukwe laka honhat. Tsi äp tälhet Lhawuk Dios tä hit'unhat lehusek wet tach'ot amehen yämthilek lekalhi, wet alewuhuy laka honhat pajtha häp ifwalana.
31Wet Lhawuk ifwelte n'oho wet yok, “Tälhe athana oyachaj ame Sehón lhäy'e imälhewek laka honhat. Athana tiyäjo laka honhat wet a'enay lewuhuya.”
32Wet Sehón inu n'amehen, lhäy'e imälhewek laka nifwotaj, yämthilek iwo laka'tshayaja n'amejen tä y'ehi honhat tä lhey Jahas. 33Mat Lhawuk Dios tach'ot n'amehen wet y'alän, lhäy'e leles, lhäy'e imälhewek laka nifwotaj. 34Nilhokej laka hupuy tä y'awasthiche, wet y'alänhen hin'ol, atsinhay, nä'tshas. Nilhokej y'ahämtej tä y'alänhen. 35Tajlhama itshätäy tä y'atchuma, lhäy'e m'ayhay tä laha ihi tä y'anlhoke tä ihiche hupuy tä y'awasthiche. 36Tälhe Aroer tä iwhäye tewok Arnón, lhäy'e hupuy tä ihi lakawayhi, pajtha nichäte Galaad, nehichet hupuy chik kay'akalhahi. Nilhokej Lhawuk Dios hiw'en n'amhohen wet häp tä y'akalhi. 37Tajlhama honhates tä kay'awoya lhaka'tshayajayej häpehen Amón lhayis kahonhat, lhäy'e imälhewek honhat tä tewok Jabok inukwe, lhäy'e hupuy lhayis tä iche chenhas, lhäy'e nilhokej wichi lew'etes tä Lhawuk Dios nine'tayek y'anuye.
