Deut 1

₁Häp täja lhämtes häp Moisés tä ifwenho p'ante Israel lhayis tä ihi ts'anis, häp tewok Jordán lhip tä tumej hichä. Wok oyok, tä lhamel ihi honhat tä ifwache tewok, häp lhip tä tatayhlä Suf, wet hupuy tä lhey Parán tumej lhip elh wet hupuy tä lheyis Tofel, Pelaj, Alhotas, lhäy'e Chinaj Ka'tu, tumej lhip elh. ₂Tälhe chenaj tä Horeb pajtha nichäte lhip tä lhey Kadés-barnea, häpe n'ow'ekyaj tä once ifwalas chik onukwe n'äyij tä ifwache chenhas tä lhey Seír.

₃Tä tajyäme cuarenta nekchämis tä Israel lhayis yikch'oye honhat tä Egipto, häp iwel'a once wet ifwala tä ichun, Moisés ifwenho lhamel nilhokej m'ayhay tä Lhawuk ne'tek ifwenho. ₄Lham pajche ikalhi Sehón, Amorreo lhayis laka rey tä lew'et Hesbón, lhäy'e Og, rey tä ihi Basán tä lew'et Astarot lhäy'e Edrey.

₅Tä mälhyejtso, tä Israel lhayis ihi p'ante Jordán lhip tä tumej hichä, häp honhat tä Moab, Moisés iwo tesa tä ifwenho tähesna yämthilek lhamel iwoye. Wet yok:

₆Lhawuk Dios tahuyhte n'oyehen tä olhamel oihihte Horeb wet yok, “Pitaj lewhäy tä lheyaywhäye chenajna. ₇Athana chuma aka m'ayhay wet mähen, hoyaye chenhas tä ihi Amorreo lhayis kahonhat, wet äp hoyaye honhates tä tott'ahomche, häp honhat tä ifwache tewok Jordán, lhäy'e honhat tä chenhas, lhäy'e honhat tä w'awulhchä, lhäy'e lhip tä tapinhiye tä lhey Négueb, lhäy'e lewomek lhip, lhäy'e Canaán lhayis kahonhat, lhäy'e Líbano pajtha nichäte tewokitaj Éufrates. ₈Olham tä Awukn'o pajche ow'en amhohen häp honhatna. Mähen wet chuma, a'en lewuhuya häp honhat tä ot'untejchehte olhämet häp atetsel Abraham, Isaac, lhäy'e Jacob, tä oyohtekwe, Ow'enla amhohen, lhäy'e ales tä lepes lheley.”

₉Wet Moisés yok:

Ifwalastso ofwenhohte ajchalis tä oyok, “Tä ots'ilak, okalhihit'a chik otetshan amel. ₁₀Tsi wujpey ales tä Lhawuk Dios hiw'en amhohen, wet athana ahäpe wichi tä wujpey, hätet iwoye katetsel tä ihi pule. ₁₁¡Is chik Lhawuk tä häpe atetsel laka Dios yäm wujpey amel, inu'pe athana, wet is chik takäpfway amehen, mälhyej lhämet tä pajche iwoyej amehen!

₁₂“Mälhyej tä oyäme, tä ots'ilak, okalhihit'ak otetshan nilhokej m'ayhay tä iyej amel. ₁₃Tä mälhyejtso, is chik let'ukwe hin'ol tä ihanche m'akejen tä iyej amel tä letälhehen doce atetsel. Is chik häpe hin'ol tä hiw'enpe nilhokej m'ayhay, wet oyenla häpeya amel aka niyatey.”

₁₄Mälhyejtetso olhämet. Wet lhamel nichulhte n'oho wet yok, “Is atichunhayaj.” ₁₅Wet otchumahte elhpej hin'ol tä iyej lhamel tä tälhehen doce letetsel. Häpe hin'ol tä ihanche m'akejen wet äp hiw'enpe nilhokej m'ayhay. Wet ow'enhomchehte len'ohyajay häp lhamel yämthilek häpe wichi laka niyatey. Iyhäj oyente laka wichiya milpej, wet iyhäj oyen laka wichiya cienpej, wet iyhäj oyen laka wichiya cincuentapej, wet iyhäj oyen laka wichiya diezpej. Wet iyhäj oyen niyatey lech'otfwasa.

₁₆Wet häp ifwalatso ofwenhohte niyatey tä oyämetso wet oyohtek, “Ch'ahuye wichi, tetshan m'ak tä lhamel iwatlä, häte tetshan lewit'äyhyajay tä iyej elhpej. Wet woyayeje m'ak tä is alhoho häp lhamel tä häpehen Israel lhayis lhäy'e wichi tä kahäpeya tä i'amejen. ₁₇W'awlhatchä akalelhthayaj tä lewoyeje wichi, elh tä len'ohyaj ihi wok elh tä w'et m'ayek t'at. Yej nowaye lhamel, tsi Dios lakalelhthayaj t'at tä lewoye. Wet chik iche m'ak chik kahanayej lewoyneje, fwel n'oho wet olhamlak otetshan.”

₁₈Ifwalatso ofwenhomche lhamel nilhokej m'ayhay tä is chik lewoye.

₁₉Wet Moisés äp tahuyej wichi wet yok:

Tä olhamel oyiktech'oye Horeb, wet otiyäje chenhas tä ihi Amorreo lhayis kahonhat, mälhyej tä Lhawuk Dios ne'tek owoye. Wet onukwe ts'anis tä wuj wet äp lhäy'e lhip tä ni'isa, mälhyej tä iyhäj amel lew'ente, pajte'tha olhamel onchäte Kadés-barnea. ₂₀Wet tä olhamel oihihte, ofwenhohte wichi tä oyok, “Athana y'anchäte chenhas tä ihi Amorreo lhayis kahonhat, tä Lhawuk Dios hiw'en n'amhohen. ₂₁Häp Lhawuk Dios hiw'en amhohen honhatna. ¡Mähen wet chuma, enay aka honhata mälhyej Lhawuk lhämet, häp lham tä häpe atetsel laka Dios! Yej ti amejen anowayhyaj, mat akhajyenhen.”

₂₂Matkat ifwalatso lhamel iho n'oye wet ifwel n'oho tä yok, “Is chik iche hin'ol chik ichunlä n'amel yämthilek lhamel iyahinpe honhat. Wet chik tapil, lhamel ifwenla n'amhohen n'äyij chik y'anuhikwela lhäy'e hupuy chik y'achunkatlak y'atiyäjo.”

₂₃Wet tä olätehte lhamel, oyok, “Is t'at.” Tä mälhyejtso, ot'ähi doce hin'ol tä iyej lhamel, weihalhapej hin'o tä tälhehen wichi tä tälhehen doce letetsel. ₂₄Wet lhamel yikhen tä ihoye honhat tä chenhas. Wet tä nichäte p'ante tewok n'äyij tä lhey Eskol, wet ilunche t'at honhattso. ₂₅Wet lhamel tachuma lhay tä ihi wet ichäj n'oyehen. Wet ifwel n'ohohen tä wuj tä is honhat tä Lhawuk Dios hiw'en n'ohohen.

₂₆Mat wichi tek iwatläk ihoye, wet iwohiyet'a Lhawuk Dios lhämtes tä hiw'enho lhamel. ₂₇Mat iwoye lhämtes tä tatayhlä Lhawuk tä ihiche lew'etes. Wet yok, “Lhawuk tek matche tä ihumin n'amel. Tä itonphä n'amel tä y'atälhe honhat tä Egipto, t'uhläk ilän n'amejen Amorreo lhayis yämthilek y'anofwej. ₂₈Wet athana, ¿atsi honhat chik y'ahoye? Wuj tä lhanowayhyaj in'amejen tä y'aläte lhaka hin'ol tä tälhe honhattso tä lhamel yok, Wichi tä ihi honhat tä olhamel oyahne, wuj tä takhajayhen wet äp pites, inu'pe olhamel. Wet hupuy tä lhamel lew'etes lhäy'e lhip tä wus, wet n'olafwey tä lep'ot hupuy lhäy'e lhip tä atoschephä wet äp tach'opwayhen. Häte ow'en gigante Anak leles.”

₂₉Wet olham onchulho wichi wet oyok, “Yej nowayhen. ₃₀Lhawuk Dios ichunla ahilähen chik lhekhen. Lhamlak tatayhlä atayhfwas, mälhhiyeja iwoye täjnaj lew'en tä lheyayhi Egipto ₃₁lhäy'e tä lheyayhi ts'anis. Lhawuk Dios tachum amehen, hätet iwoye hin'o tä itsok lhäs kwey. Aitsok t'at tä lenekche n'äyij pajtha lenämhen kana.”

₃₂Matkat wichi kamaj ikachuye Lhawuk Dios, ₃₃häp lham tä ichunpejlä lhamel wet t'ukwepej honhat tä is yämthilek iwo lakasthawetahi. Wet tä honatsi itäj t'at tä hin'älitche n'äyij yämthilek lhamel inukwe. Wet tä ifwala pule t'at tä ichunlä wet ipäyne n'äyij tä is chik inukwe.

₃₄Tä Lhawuk iläte wichi tä ni'isachehen lhämtes, wuj tä lewäk ihi. Wet hit'unhatche lhämet tä yok, ₃₅“Häp wichi tä ni'isahenna, wohit'ala elh tefwajni chik hiw'enla'pe honhat tä is tä ofwenhohte letetsel. ₃₆Ts'ilakhila Jefone lhäs Caleb tä hiw'enla'pe, lhäy'e leles tä lepes lheley. Tä lham nileya n'oyej, ow'enhihola lhamel häp honhat tä lham pajche t'äspe.”

₃₇Häte lhamel tä tamen n'oyej tä Lhawuk iti n'oyej lewäk wet yok, “Häte am tek letiyäjihola honhattso. ₃₈Mat hach'otfwa Josué, Nun lhäs, häpkhilek tiyäjo. Tä mälhyejtso khajyen, tsi lhamlak hiw'enhomche honhat häp Israel lhayis. ₃₉Wet amel ales tä kamaj nhanache honhatej tä lefwetajay atayhfwas isohla amejen, lhamenlak tiyäjo honhattso. Tsi olhamlak ow'enho lhamel yämthilek lhayen lewuhuya. ₄₀Mat amel äpilche han'äyij tä letälhche, wet nukwe ts'anis tä letiyäje Lewomekchät.”

₄₁Wet wichi nichulhte n'oho wet yok, “Och'isukyaj ihi wet ottayhlä Lhawuk. Mat athana olhamel oyikhen, nemhit onowayhen, owohla oka'tshayaja mälhyej tä Lhawuk ne'tek olhamel owoye.”

Wet tä lhamel iwoyetso, iwo takwelheleya, fwetaj häpe t'at m'ak tä ni'thaya yämthilek ihoye honhat tä chenhas. ₄₂Mat Lhawuk ifwel n'oho wet yok, “Fwenho Israel lhayis, ok, Yej lhekhen tä lefwetaj lewoyay aka'tshayaja. Yej alew'enho atayhfwas yämthilek ikalh amhihen wet ailänhen, tsi olham nemhit oi'amejen.”

₄₃Wet ofwenhomche lhamel täjtso, mat lhamel iwohiyet'a wet tatayhlä Lhawuk lhämet. Wet tä lhaichäjwethä, fwetaj ihoye t'at chenhastso. ₄₄Wet Amorreo lhayis tä lew'etes chenhastso, lhamel tatayhlä wet ihänwethä, hätet iwoye masawos tä wujpe. Wet ikalhi lhamel wet ilänhen tä ihi Seír, pajtha nichäte lhip tä lhey N'otäyhyaj. ₄₅Wet iyhäj tä tapil, lhamel tafwchehchä tä ihi tä Lhawuk tatache, mat nemhit tach'ahuye lhamel. ₄₆Wet häp tä tamenej tä wujpe nekchämis tä amel tä ahäpehen leles lheyayhi t'at honhat tä Kadés.