Dios lhämet tä ifwenho laka wichi tä yikhen tä iwo laka'tshayaja
1Chik lhekhenpej tä lewo aka'tshayaja tä lenuye atayhfwas, wet lew'en tä wujpey yel'atas lhäy'e kaletas tä n'oka'tshayajchal tä iyejen lhamel, wet lew'en tä wujpey nifwotaj, inu'pe amel, yej nowaye. Tsi Lhawuk Dios tä itonphä ajchalis tä ihihte honhat tä Egipto, häp lham tä i'amejen. 2Wet chik nichäte lewhäy tä lenuwek, is chik sacerdote ihoho tä nifwotaj tatache, wet tahuyej 3wet yok, “Ch'ahuyaye, Israel lhayis, ifwalana lenuye atayhfwas. Akhajyenhen wet yej nowayhen. Yej chettiche wet yej nuhat amhohen. 4Tsi Lhawuk Dios yik amchehen, wet lhamlak tatayhlä atayhfwas yämthilek lekalhi.”
5Wet is chik niyatey tahuyej sip'älis wet yok, “Chik iche elh amel tä yenlhin'aj lewukwe tä nech'ayek wet kamaj newachufwi, is chik yäple wet ichufwi. Tsi elat õ'län chik ihi n'oka'tshayaj, wet mälhyej newachufwi lewukwe, wet elh lhayen lewuka. 6Wet chik iche elh amel tä tutchey wet kamaj nilanahi yachuyaj lhay, is chik yäple. Tsi elat õ'län chik ihi n'oka'tshayaj, wet elh tä ilanhi laka yachuyaj wet isej. 7Wet chik iche elh tä wak'alh t'at tä t'uhläk tawhayey, mat kamaj newayej atsinha, is chik yäpil. Tsi elat õ'län chik ihi n'oka'tshayaj, wet nech'e elh tä yen ch'efwaya atsinha.”
8Wet niyatey y'isiyeja lhämet tä yok, “Chik iche elh tä ilät lhame tä noway wet nitkhajaya, is chik yäpil, häpkhilek iyhäj nena lhama tä t'otle nit'una.”
9Wet chik niyatey ileyej tä yämhoplhi nifwotaj, is chik sip'älis kaniyatey ichunlä nifwotaj.
M'ak tä is chik Israel lhayis iwoye tä inuye hupuy tä letayhfwas ihi
10Chik amel atott'aye hupuy tä lenuye, chunkat wola silätaye wichi tä ihi chik lhamel iwatlä letamsek. 11Wet chik lhamel iwoye, wet iwahin amejen tä letiyäjo hupuy tä lhamel lew'et, ena akawosa yämthilek lechumyene lechumet tä äytaj. 12Mat chik lhamel niwoyaye ämet, mat ihumin t'at chik iwo laka'tshayaja, alunkatayeja hupuytso yämthilek lenuyaye. 13Lhawuk Dios tach'otla amehen yämthilek lekalhi wet länhena nilhokej hin'ol tä ihi. 14Wet atsinhay, nä'tshas, itshätäy, lhäy'e nilhokej m'ak tä ihi hupuytso, alewuhuy t'at. Chumela nilhokej m'ayhay tä Lhawuk Dios iwahin amejen tä lewuk atayhfwas, wet tila amejen. 15Häp täjtso m'ak tä one'tek lewoyeje nilhokej hupuy lhayis tä atofwehlä honhat tä Canaán tä lhenla haw'eta. Wok oyok, häp hupuy lhayis tä w'enha lhamej.
16Mat häp hupuy lhayis tä lheyayhi lechowej tä Lhawuk Dios hiw'enla amhohen wet alewuhuy, länhena nilhokej m'ayhay tä ihi. 17Täyhata nilhokej häp Het lhayis, Amorreo lhayis, Canaán lhayis, Ferez lhayis, Hiv lhayis, Jebús lhayis, mälhyej tä Lhawuk Dios ne'tek lewoyayeje. 18Häpkhilek nikana amejen yämthilek leten m'ak tä lhäy'e lhip tä ni'isachehen tä lhamel iwoye tä iwujyen laka dios lhayis, wet tamenla amejen tä lewoye hach'isukyajay tä letatayhlä Lhawuk Dios.
19Wet chik let'uhläk lekalhi hupuy, wet pitaj ifwalas tä alelunkatej tä lenuye, yej lhisthena häp hal'äy, tsi lewatlahlä lhay yämthilek amel letufw. Tsi hal'äy t'at, tek häte iwoye hin'ol tä tatay ahilähen wet lenuye. 20Mat tajlhama hal'äy tä niwoya lhaya, häp tä is chik lhisthen wet lhene aka'tshayajchal yämthilek lekalhi hupuy tä lenuye.
