Moisés itihi Josué tä ne'tek tujlhache lham lechumet
1Moisés yachajo tä tahuyej Israel lhayis wet yok:
2–Athana ow'en ciento veinte nekchämis wet nemhit okalhik owo w'ekyaja. Häte Lhawuk iwahnhit'a n'oyej chik oyistho tewok Jordán. 3Mat Lhawuk Dios ichunla ahilähen chik lhistho, wet itäyhthila wichi chik häpe chik lechäte, yämthilek lhen haw'eta laka honhat. Josué häpkhilek yikchufwi amel, mälhyej tä Lhawuk yäme. 4Wet Lhawuk iwohiyejela häp wichitso häp m'ak tä iwoyejenaj Sehón lhäy'e Og, häp lhamel tä häpehen Amorreo lhayis kaniyatey, wet itäyhthila lhamel lhäy'e laka honhates. 5Wet chik Lhawuk yachaj amehen häp wichitso wet lekalhi, woyejela nilhokej häp m'ak tä lham ne'tek lewoyeje. 6Akhajyenhen wet otle t'unhatay. Yej nowaye lhamel wet yej t'ayhatchä akhajyhayaj. Tsi Lhawuk Dios yik amchehen, ilehit'ala amejen wet tek aiwomla.
7Wet Moisés t'äne Josué wet tahuyej tä ihi tä Israel lhayis tatache. Wet yok:
–Akhajyen wet otle t'unhat. Tsi am tä lhekhilachufwi häp wichina, wet häne honhat p'ante Lhawuk hit'untejche lhämet tä ifwenho atetsel tä yok, “Ow'enhihola ales.” Amlak lew'enhomche lhamel, 8wet Lhawuk lhamlak ichun ahilä wet ihla amej. Ilehit'ala amej wet tek aiwomla. Tä mälhyejtso, yej noway wet yej t'ayhatchä akhajyhayaj.
Moisés ne'tek õyahyenpej Lhawuk lhämtes, häp nekchäm tä õ'täyhthen iyhäj letes
9Moisés ilesayen Lhawuk lhämtes wet hiw'enho Leví leles tä häpehen sacerdotes, häp lhamel tä lechumet tä tilhäjpej Arca tä N'ot'amajchet tä Lhawuk lhämtes ihi. Häte hiw'enho nilhokej Israel lhayis tä thänhäy. 10Wet ifwenho lhamel wet yok:
–Chik siete nekchämispej, häp lewhäy tä õ'täyhat iyhäj letes, is chik leyahyen Lhawuk lhämtesna häp ifwalas tä Israel lhayis yenlhi lakäjyaj tä N'ohupelis. 11Yahyen yämthilek nilhokej lhamel iläte chik lhamel lhaihutwek tä ihi tä Lhawuk Dios tatache tä ihi honhat lhip tä lham tatshupiye tä yen lew'eta. 12Wet is chik nilhokej wichi lhaihutwek, hin'ol, atsinhay, nä'tshas, lhäy'e wichi tä kahäpeya Israel lhayis tä i'amejen tä lhehiche haw'etes. Is chik nilhokej lhamel iläte tä õyahyen häp Lhawuk lhämtesna, wet lhaichufwenejen tä iwujyen Lhawuk, wet iwoye nilhokej m'ak tä ne'tek iwoye. 13Häpkhilek ales tä nhanayej lhämtestso lhamel tach'ahuhiyela wet lhaichufwenejen tä iwunit Lhawuk Dios nilhokej ifwalas tä lhamel ihi honhat tä amel lhenla haw'eta tä tumej tewok Jordán lhip elh.
M'ayhay tä ilepese tä Lhawuk ne'tek Moisés iwoye
14Wet Lhawuk tahuyej Moisés wet yok:
–Lhek yahin, nech'e tatäy lhimphaj wet let'inla. Tä mälhyejtso, äne Josué wet hoye carpa tä owukwe, lhäy'e lham, wet ofwenhihola m'ak tä is chik iwohiyela.
Wet Moisés lhäy'e Josué lhamel ihoye Lhawuk lewukwe, 15wet Lhawuk lhain'ältej tä ihi pule tä ihi lewukwe lepe. 16Wet tahuyej Moisés wet yok:
–Lhek yahin, let'inla wet lehohiyela achätilis. Mat ofwel amho tä wichina lhaikänchihiyeja dios lhayis tä ihi wichi tä w'enha lhamej laka honhat tä lhamel yenla lew'eta. Wet lhamel ilehla n'oyej wet nemla iwoye olhämet tä owoyeje. 17Wet otihiyeja owäk wet oyikhilach'oye. Nemla otetshan lhamel wet wujla lewit'äyhyaj. Wet wujla m'ak tä ni'isachehen chik ihiyeja lhamel, lhäy'e lelhaklis chik nichätla'pe lhamel. Wet chik lepesiyela, yohlak, “Lhateläythayaj in'amejen wet wuj m'ak tä ni'isachehen, tsi Dios nemhit in'amejen.”
18“Mat häp ifwala chik lhamel iwoynejetso lhämet, olham oyikhilach'oye lhamel tä iwoye m'ak tä ni'isa wet n'okwiyej dios lhayis tä w'enha lhamej. 19Tä mälhyejtso, lesayen n'otenekna wet chufwenejen Israel lhayis, häpkhilek lhamel itenpej wet ihanej t'at tä oyen tesayej m'ak tä ni'isa tä lhamel iwoye. 20Tsi ochätyenhihola häp honhat tä pajchehte ot'untejche olhämet tä ofwenhohte letetsel tä oyok, Ow'enhihola ales. Häp honhat tä t'os lhäy'e akäyek tet iwoye inät, iläfwelchehen tä ihi. Wet lhamel t'ekhihena yäk yipsen wet yätajen, wet lhamel ilehla n'oyej wet yenla lewuhuya dios lhayis tä w'enha lhamej. Wet yenlan'o w'et m'ayeka wet nemla iwoye olhämet tä owoyeje lhamel. 21Wet chik wuj m'ak tä ni'isachehen chik nichätpe lhamel wet lelhakli ihi, häpkhilek n'otenekna itichunyenhichela m'ak tä ni'isa tä lhamel iwoye. Wet leles tä lepes lheley yenla tichunhayaja wet lhamel itenhipeja n'otenekna. Tsi tä kamaj n'am chätyenho lhamel häp honhat tä pajche ofwenho lhamel, ow'en t'at m'ak tä ni'isa tä ihi letichunhayaj.”
22Wet ifwalatso Moisés ilesayen häp n'otenek wet ne'tek Israel lhayis lhaichufwenejen.
23Wet Josué, Nun lhäs, Lhawuk hiw'enho lhämetna tä yok:
–Akhajyen wet otle t'unhat. Tsi amlak lechätyenho Israel lhayis häp honhat tä pajchehte ot'untejche olhämet tä ofwenho lhamel. Wet olham oihla amej.
M'ak tä õ'woyeje Libro tä Dios lhämtes ihi
24Moisés ilesayen Dios lhämtes tä ihi Libro. Tä wak'alh, 25tahuyej Leví lhayis, häp lhamel tä lechumet tä tilhäjpej Arca tä N'ot'amajchet tä Lhawuk lhämtes ihi. Wet yok:
26–Chumaye Librona wet tiwhäye Lhawuk Dios laka Arca tä T'amajchet, häpkhilek ihi t'at wet yäme m'ak tä ni'isa tä wichi iwoye tä Dios yen tesayej. 27Olham ohanej tä häpehen wichi tä lehusey t'unhen wet akachuhantses. Ifwalasna tä kamaj oläy tä oi'amejen, ow'en t'at tä wichi tatayhlä Lhawuk. Wet chik oy'il, nemla koyhyaj m'ak tä ni'isachehen chik wichi iwohiyela. 28Hän alhoho nilhokej hin'ol tä thänhäy, lhäy'e aka niyatey, wet ofwenhihola lhamel häp m'ayhayna, wet one'tehlak pule lhäy'e honhat ifwel ates. 29Ohanej t'at chik oy'inhila, wichi nemla is m'ak chik iwoye, wet yikhilach'oye Lhawuk len'äyij tä one'tek inukwe. Wet ifwalas tä tatay alhoho, lewit'äyhyaj nämhiyela lhamel tä iwoye m'ak tä ni'isa wet tamenej tä Lhawuk itiyej lewäk.
Moisés letenek
30Wet Moisés tahuyej nilhokej Israel lhayis tä lhaihutwek, wet ifwenho häp lhämtes tä ihi n'otenekna, wet yok:
