N'owit'äyhyaj tä häpe chol tä wuj
1Lhawuk ifwenho Moisés wet yok:
–Mäh hoye Egipto kaniyat, tsi olham t'at tä ot'unhat lehusek, lham lhäy'e leniyatfwas, häp tä ot'uhläk opäyne lhamel häp m'ayhay tä oselkatejen tä oyenlhi. 2Wet am lefwenhihola ales lhäy'e achetsos häp m'ayhay tä äyteschehen tä owoyeje Egipto lheley lhäy'e tä oyen koyeka lhamel, häpkhilek amel lehanej tä ohäpe Dios tä matche.
3Wet Moisés lhäy'e Aarón lhamel yikhen tä ihoye niyat, wet ifwenho tä yok:
–Hebreo lhayis Lewuk Dios yok, “¿Atsihila ifwalak lhok, Olhay'ayhatchä, tä lhehi tä ottache? Wahintshi oka wichi yämthilek n'okwi n'oyej. 4Mat chik kamaj kawoyaye, ochenla ame chol tä wuj chik fwala yämthilek tapoyej aka honhat tä Egipto. 5Wet hip'ohla'pe imälhewek honhat, wet tufwila m'ayhay tä kalatu niläna, lhäy'e nilhokej hal'äy. 6Wet tapohiyeja awukwey, lhäy'e aniyatfwas wukwey, lhäy'e nilhokej Egipto lheley wukwey. Häpkhila m'ak tä ajchalis lhäy'e achätilis ihanhiyejt'a chik hiw'en p'ante m'ak chik mälhyejtso yäk nämena.”
Tä Moisés ileyej tä yämhoplhi niyat, wet lhaitilhkathi wet yikch'oye. 7Wet leniyatfwas tahuyej niyat wet yok:
–¿Atsihila ifwalak ileyej tä iti n'amejen lhawit'äyhyaj häp hin'otso? Ika niyat, wahintshi Israel lhayis, wet is chik yikhen yämthilek n'okwiyej lewuk dios. ¿Hä lew'enhit'a häp Egipto tä matche tä lewit'äy ihi?
8Tä mälhyejtso, niyat yachajo tä ne'tek õt'äne Moisés lhäy'e Aarón. Tä lhamel nichäte, wet yok:
–¡Mähen wet n'okwiyeja amel awuk dios! Mat fwel n'oho iyhäj tä häpe tä yikhen.
9Moisés nichulho wet yok:
–Nilhokej olhamel tä oyikhen, nä'tshas, thänhäy, oles, lhäy'e oläy w'asetas, tson'atas lhäy'e kayla lhayis. Tsi olhamel oyen häpeya Owuk Dios lakäjyaj tä olhamel owoye.
10Mat niyat yok:
–¡Kalelhäj tä let'uyayhläk lewoye m'ak tä ni'isa! ¿Hä lefwetaj awuk dios yikhila amchehen? ¿Hä lhenek otch'anlhahla amehen chik lefwetaj lhekhen, lhäy'e ales? 11¡Tek mälhhiyejatso! Is chik ts'ilak hin'ol tä yikhen wet n'okwiyej dios, tsi häp täjtso tä let'uhläk lewoye.
Wet niyat ne'tek õ'hut alhoye Moisés lhäy'e Aarón. 12Mat Lhawuk tahuyej Moisés wet yok:
–Piyenpe akwey häp honhat tä Egipto, häpkhilek nek chol wet tufw nilhokej yachuyaj tä ihi lhäy'e nilhokej m'ak tä kalatu nitaja.
13Wet Moisés ipiyenpe letsut häp Egipto, wet Lhawuk ichen ihwok tä tälhche tä ifwala tälhche, wet ifwala mälhewek lhäy'e honatsi mälhewek tä yafwuthi. Tä nech'e fwala näm chol tä nekche ihwok, 14wet iso'pe honhat tä Egipto wet hip'o'pe, tsi lhäy'e lhip tä wuj. Ihanhiyejt'a chik iche chol tä lhäy'e lhip tä wuj chik te iwoye ifwalatso, wok ihichela. 15Tek n'älpe honhat, ichalajchä tsi wuj chol tä iche, wet tuj nilhokej yachuyaj lhäy'e hal'ä lhay tä kalatu nitaja. Wet niwohit m'ak chik w'atshan chik imälhehi tä ihi honhat tä Egipto, hal'ä tälhes, lhäy'e hup, lhäy'e hal'äy, noj t'at.
16Wet niyat yofwajkwet ne'tek õt'äne Moisés lhäy'e Aarón. Tä lhamel nichäte, wet yok:
–Och'isukyaj ihi, ottayhlä amel Awuk Dios wet äp ottay ahilähen. 17Mat olhaip'altsen ame, wet lepes athana, täyhat och'isukyaj wet alhyen n'oye Awuk Dios. Is chik itiyej kanhi owit'äyhyaj tä lhäy'e lhip tä ni'isa.
18Wet Moisés yikch'oye niyat wet t'alhe Lhawuk. 19Wet Lhawuk itsayhat ihwok wet nech'e tälhche tä ifwala y'uy, wuj tä äytaji, wet ichäj chol wet nichätho Lewomekchät. Wet tatäy nilhokej chol tä ihi honhat tä Egipto. 20Matkat Lhawuk hit'unhat lehusek häp niyat, wet tek iwahintshi Israel lhayis.
N'owit'äyhyaj tä häpe honataj tä wuj
21Lhawuk tahuyej Moisés wet yok:
–Piyen puleye akwey, häpkhilek honataj nichätpe mälhewek honhat tä Egipto wet wichi nemla hiw'enchehen honhat.
22Wet Moisés iwoye, ipiyen puleye takwey wet honataj nichätpe imälhewek Egipto, 23pajtha tres ifwalas tä wichi nem hiw'enchehen honhat wet ihanhiyejt'a chik ilunhen. Mat häp Israel lhayis lew'etes iche ifwala wet honatsi. 24Tä mälhyejtso, niyat ne'tek õt'äne Moisés. Tä nichäte, wet yok:
–¡Mähen amel wet n'okwiyeja awuk dios! Chäj ales mat yej chäj aläy.
25Mat Moisés nichulho wet yok:
–Chik mälhyejtso, is chik am t'at tä lew'en n'ohohen itshätäy yämthilek olänhen wet owunhomche tä oyen n'okhayajayej tä owujyen olhamel Owuk Dios. 26¡Olhamel owohiyet'a ämet! ¡Ochäjla oläy! Isit'ak imälhehchä tefwajni itshätäy. Ihichela iyhäj tä olhamel oyen n'okhayajayej Owuk. Tsi tä kamaj olhamel n'am chät kanhi, ohanhiyejt'a m'ak tä owatlahlä yämthilek oyen n'okhayajayej olhamel Owuk.
27Matkat Lhawuk hit'unhat niyat lehusek wet tek iwahintshi Israel lhayis. 28Wet ifwenho Moisés wet yok:
–¡Mä och'oye! ¡Ofwel amho, uhlä, yej lhachajolak leho n'oye! ¡Tek ot'uhläk oahiw'en! ¡Ifwalak lhachajohlak leho n'oye, õ'ailänla!
29Moisés nichulho niyat wet yok:
–Matche ämet. Tek oyachajiholak onäm ame.
