Ezeq 17

₁Lhawuk tahuy n'oyej wet yok:

₂–Hin'o, fwenho wichi olhämet tä otech'aynej m'ak tä lhamel nitäfwelej. ₃Wet ok, “Häp täja häp Lhawuk Dios lhämet tä ne'tek ofwel amhohen: Häp afwenche tä wujtaj nämho häp Líbano. Lhafwis tsesomche wet lew'oley pites wet isis. Wet tachuma häp pänhichetek k'as tä tumphä ₄wet yiset, ihäne honhat tä lew'et wichi tä ifwelwethä lakhäy laka honhat, wet yen chumeta, itihi honhat tä nitäkw hupuy tä ihi.

₅“Wet tä tajyäme täjtso, wet tachuma häp hal'ä elh tä tälhe honhat tä Israel, wet itihchä lho, itihi honhat tä is tä iwhäye tewok tä wuj inät tä nekche. ₆Wet hal'ä lhotso tälh wet häpe uva lhile, lhachal wujpey. Tek atojphä, lhachal iwo lehäynhaya, tataye t'at afwenche tä wujtaj, wet lefwettsil tiyäjo honhat. Wet häp tä tetso, uva lhile t'at, wet yäm wujpey lhachal.

₇“Mat äp iche elh afwenche tä wujtaj, wet lhafwis pites wet lew'oley wujpey. Wet uva lhile lefwettsil yikhen, tej tä atofwe afwenche, pajtha nichäte, lehäynhay äpte nichäte, häp tä fwetaj afwenchena hiw'enhohla inät tä wuj. ₈Uva lhile tek iwatlä inät tä tälhe afwenche, tsi ihi t'at honhat tä is, iwhäye inät tä n'am hanej chik y'im, häpkhilek wujpey häp lhachal tä iwoye, wet äp wuj lhay tä iwoye, wet häpe häp uva lhile tä isilataj.

₉“Wet häp tä is chik lefwenho Israel lhayis olhämet tä oyok, Olham ohäpe Awuk Dios. Häp uva lhilena tek lhaichihelthila, tsi afwenche tä ichun häp tä itonhihila letes, wet lefwettsil hap'akhiyeja chik nämhi, wet lhay natla. Wet t'unhihit'a, tek iwatläk wujpey wichi chik itonhi letes, wet letälhes tä nech'efwas tä fwetaj iwoye wet y'il t'at tä nämhi letes. ₁₀Tej chik õyachaj tä õ'tihchä, w'atshanhit'ala, y'inhila t'at. Wet chik näm leyalh tä tälhche tä ifwala tälhche, tamchäyhla lew'oley tä ihi honhat tä onte iwohi lhayahi.”

₁₁Wet Lhawuk yachajo tä tahuy n'oyej wet yok:

₁₂–Lhek ätshane häp wichi tä nitch'ahuyawethäna chik nitäfwelche p'iya häp olhämet tä ofwenho lhamel tä oyen t'ittshanyaja häp uva lhile. Kalelhtho lhamel tä Babilonia laka rey ihoye Jerusalén, itsokwethä Judá laka rey lhäy'e leniyatfwas, wet ichäje Babilonia. ₁₃Wet tachuma rey lew'et lheley elh wet ne'tek yenlhi lhämet tä nemla lhayen letayhfwasa. Wet Babilonia laka rey ichäj häp hin'ol tä takhajayhen tä ihi honhat, ₁₄häpkhilek nemhit takhajay häp n'oniyatyaj tä ihi Judá wet lhay'ayhatchä, tajlhama tä imatitche t'at häp lhämet tä iwoyeje Babilonia laka rey, häpkhilek laj lewit'äyhyaja.

₁₅“Mat reytso lhaikhajyen tä tatayhlä häp Babilonia laka rey. Wet ichene lakawos häp Egipto, tsi häp tä t'alhe yel'atas lhäy'e häp wichi tä wuj chik õ'chene. Häp hin'o tä tetso m'ak tä iwoye, ¿hä lefwetajay ikalhihila m'ak tä iwoye? Häp hin'o tä inäk'äs häp lhämet tä iwoyeje elh, ¿hä ihanhiyeja iwoyneja chik tafwayej lewit'äyhyaj? ₁₆Wet olham tä ohäpe Dios tä n'ilataj, matche olhämet tä oyok, Y'inhila t'at tä ihi Babilonia häp hin'o tä iwoynejatso lakey tä yen läkwyhanyaja häp lhämet tä fwetaj lhaip'ajtej rey, tsi häp tä tamenej tä rey itihi leniyatyaj. ₁₇Wet chik Babilonia laka rey inuhiyela, wet yenhilhila häp honhat tä õ'potpe tä õyäm atojphä lhäy'e häp lew'etes tä atoschephä yämthilek isakanho hupuy. Wet Egipto kaniyat tek tach'othiyela häp Judá laka rey, ichenhit'ala laka sip'älis tä takhajayhen lhäy'e häp laka wichi tä wujpey, ₁₈häp tä Judá laka rey iläkwlhi lhämet tä iwoye wet inäk'äs. Tej tä pajche hit'unhatche, mat yämhit'a matche. Wet tä mälhyejtso m'ak tä iwoye, ihanhiyejt'a iwoyneja chik tafwayej lewit'äyhyaj.

₁₉“Wet olham tä ohäpe Dios tä n'ilataj, matche olhämet tä oyok, Tä lham yen läkwyhanyaja lhämette iwoyej n'oye wet inäk'äs, otasnhila'pe, ₂₀och'enla'pe oka hotanaj häpkhilek osakanej. Wet ohänhiyela Babilonia tä otiyej okalelhthayaj, häp tä niwoyaye olhämet. ₂₁Wet sip'älis tä takhajayhen õ'länhihena tä ihi n'oka'tshayaj, wet iyhäj tä tafwayej n'oka'tshayaj tä n'ilahen tä lhayämthen, häp tä w'et õ'lhahthilatpe honhat tä tafwojyhiye, tapinhiye, ifwala tälhche, lhäy'e tä ifwala y'uyhi. Wet häp tä nech'e amel lehanhiyeja tä olham tä ohäpe Awuk Dios, olham tä oyämlhi amhohen.

₂₂“Olham tä ohäpe Awuk Dios oyok, Olhamtej otchumhiyela häp pänhichetek lak'as tä tumphä, häp letälhes tä häpe lhachal tä lakonkay tä tak'efwichehen. Wet olham tä otihlahchä, otihla'pe tachenaj tä matche tä atojphä ₂₃tä inu'pe iyhäj tachenhas tä ihi Israel. Wet yämla wuj lhachal lhäy'e lhay wet häpehila pänhichetek tä isilataj. Wet nilhokhiyeja häp afwenchey tä w'enhache lhamejen, lhamel yenla lew'eta wet iwohla lhupisahi lhachal. ₂₄Wet häp tä nilhokhiyeja häp hal'äy tä tälhpe honhat ihanhiyeja tä olham tä ohäpe Lewuk Dios. Wet olham tä othat kanhi häp hal'ä tä lhaichäjlhi tä wujche, wet olham tä ochihelit häp hal'ä tälhe. Wet ohanej owoyneja chik ot'uhläk y'il häp hal'ä tä w'atshan, wet äp ohanej owoyneja chik ot'uhläk w'atshan hal'ä tä y'il. Olham tä ohäpe Lewuk Dios owoye olhämetna wet matche.”