Ezeq 18

₁Lhawuk tahuy n'oyej wet yok:

₂–¿Chipte tä Israel lhayis ihumin tä yachaj lhamho lhämet tä yok, “Hin'ol tufw uvas tä nosoy wet leles tsotey äytes, tasip'ilej”?

₃“Olham tä ohäpe amel Awuk Dios tä n'ilataj, matche olhämet tä oyok, Nemhit amel lhachajohla chik lewoye ämettso tä lhehi Israel. ₄Olham tä Olewuk nilhokej häp wichi tä i'pe honhat. Hin'ol lhäy'e häp leles, olham tä Olewuk. Elh chik iwo lech'isukyaja, häp tä y'inhila.

₅“Hin'o tä lechowej ihi häp tä iwoye m'ak tä is alhoho. ₆Wet t'awayhiyet'a n'olhäk tä i'pe tachenhas tä õyen käjyajayej n'ocheyälis, wet t'ekhahiyet'a Israel lhayis lecheyälis, wet isohit'a elh ch'efwa, wet imähiyejt'a häp lham lech'efwa chik nichäte lewhäy tä nowaylhi. ₇Akantsajit'a, yachaje elh len'äyek tä hin'äype letes. T'etanhiyet'a m'ak tä lewuk iyhäj. Chik elh nichuyu, hiw'enho lhäk, wet iwo w'uya elh tä laj lew'uya. ₈Chik icheyjäntej elh häp lham laka chinaj t'äj, wet tek y'ayhattshi elh letes. Ihuminhit'a chik ikänchi elh chik häpe. Chik lham tä itetshan m'ak tä ikalelhätej häp wichi täkwfwas tä inokwaj, yäm is alhoho lakalelhthayaj. ₉Tsi iwoye nilhokej olhämtes wet tek hip'ethatlä ochufwenyajay. Häp hin'o tä mälhyej tso häp tä matche tä is, wet häp tä y'inhit'ala. Olham tä ohäpe Lewuk Dios olhämet täja.

_10-11“¿Mat chiwoye chik hin'ona hiw'en lhäs tä iwoye lakeyis tä kahäpeya lajcha keyis? Wet fwitsaj, anikoy, wet t'awaye n'olhäk tä i'pe tachenhas tä õyen käjyajayej n'ocheyälis, wet iso elh ch'efwa. ₁₂Wet hip'altsenhit'a p'elitsaj, wet ikanej elh tä m'ak niw'ena, wet t'etane m'ak tä lewuk iyhäj, wet yachajiyet'a elh len'äyek tä hin'äype letes, wet t'ekhaye n'ocheyälis tä kamatachehen, wet iwoye lakeyis tä on'äyiho. ₁₃Chik icheyjäntej elh häp lham laka chinaj t'äj, wet y'ayhattshi elh letes. Häp hin'o tä mälhyejtso m'ak tä iwoye y'inhila t'at. Tsi häp tä wuj tä ni'isa häp lakeyis tä iwoye wet matche tä oy'ulhan. Häp tä tamenej tä nemhit t'uhawetej chik iläy. Lakacha ihihit'a, lham t'at tä tamen lhamej tä nichäte t'ilek.

₁₄“¿Mat chiwoye chik hin'ona lhäs ihi, wet hiw'en nilhokej häp lajcha lech'isukyajay tä iwoye, mat itenhit'a lajcha keyistso? ₁₅Wet t'awayhiyet'a n'olhäk tä i'pe tachenhas tä õyen käjyajayej n'ocheyälis, wet t'ekhahiyet'a Israel lhayis lecheyälis. Wet äpte isohit'a elh ch'efwa, ₁₆wet akantsajit'a. Wet chik icheyjäntej elh laka chinaj t'äj, t'alhiyet'a elh chik iwo len'äyeka'pe. T'etanhiyet'a m'ak tä lewuk iyhäj. Wet chik iche elh tä nichuyu, hiw'enho lhäk, wet iwo w'uya elh tä laj lew'uya. ₁₇Ihuminhit'a chik ikänchi elh chik häpe. Chik icheyjäntej elh häp lham laka chinaj t'äj, wet tek y'ayhattshi elh letes. Wet iwoye nilhokej olhämtes wet tek hip'ethatlä ochufwenyajay. Häp hin'o tä mälhyejtso m'ak tä iwoye oyenhit'ala tesayej häp lajcha lech'isukyajay tä iwoye, wet matche tä y'inhit'ala. ₁₈Lajcha y'inhilatpe lech'isukyajay tä iwoye, tsi häpe elh tä kahap'altsentsaja, ikanej iyhäj, wet t'etane m'ak tä lewuk iyhäj, wet iwoye m'ak tä ni'isa tä iyej wichi.

₁₉“Etp'i amel letay'ätshanej, lhok, ¿Chipte tä lhäs nitiskana'pe lhip häp lajcha lech'isukyaj? M'ak tä tamenej tä nitiskana'pe häp lajcha lech'isukyaj, häp tä is alhoho m'ak tä iwoye wet iwoye nilhokej olhämtes. Häp tä tamenej tä t'uhawetej t'at chik kamaj iläy. ₂₀Ts'ilak t'at hin'o chik iwo lech'isukyaja, häp tä y'inhila t'at. Wet lhäs tek tiskanla'pe häp lajcha lech'isukyaj, wet lajcha tek tiskanla'pe häp lhäs lech'isukyaj. Hin'o tä is alhoho m'ak tä iwoye, ikathiyeja laha häp m'ak tä is tä iwoye. Wet hin'o tä ni'isa m'ak tä iwoye, ikathiyeja n'otasnhayaj tä laha häp m'ak tä ni'isa tä iwoye.

₂₁“Chik hin'o tä ni'isa ileche lakeyis tä ni'isachehen, wet nech'e iwoye olhämtes wet iwoye m'ak tä is alhoho, häp tä y'inhit'ala, kamaj iläyhla t'at. ₂₂Olham nemhit oyenla tichunhayaja m'ak tä ni'isa tä iwoye, wet lham y'inhit'ala tsi häp tä iwoye m'ak tä is alhoho. ₂₃Olham ohuminhit'a chik y'il hin'o tä ni'isa lakey tä iwoye, mat ohuminche chik iwo elha lakey wet iwoye m'ak tä is häpkhilek n'ila. Olham tä ohäpe Lewuk Dios olhämet täja.

₂₄“Mat chik hin'o tä is ileyej lakey tä is tä iwoye wet iwoye m'ak tä lhäy'e lhip tä ni'isa tä hin'o tä ni'isa iwoye, ¿hä amel lefwetajay iläyhla t'at hin'ona? Oyok, olham nemhit oyenla tichunhayaja häp lechumyaj tä is tä iwoyepmhaji. Y'inhila t'at, häp tä ile n'oyej wet ileche olhämtes tä iwoye wet iwo ch'isukyaja.

₂₅“Amel lhämhiyela tä ni'isa alhoho m'ak tä owoye tä Awukn'o. Mat ch'ahu n'oye, amel tä ahäpehen Israel lhayis, ¿hä kamatache tä is alhoho m'ak tä owoye? Amel tä ni'isa alhoho m'ak tä lewoyaye. ₂₆Chik hin'o tä is ileyej lakey tä is tä iwoye wet nech'e iwoye m'ak tä ni'isa, lham y'inhila t'at, häp lakeyis tä ni'isa tä tamenej. ₂₇Mat chik hin'o tä ni'isa ileyej lakey tä ni'isa tä iwoye wet iwoye m'ak tä is, häpkhilek tafwayej lewit'äyhyaj wet n'ila. ₂₈Chik nech'e itetshan lakeyis tä iwoye wet ileche nilhokej häp m'ak tä ni'isa tä iwoye, matche tä kamaj iläyhla t'at, y'inhit'ala.

₂₉“Wet Israel lhayis yäme tä ni'isa alhoho m'ak tä owoye. ¿Hä wet matche tä ni'isa alhoho m'ak tä owoye? Lhamel tä ni'isa alhoho m'ak tä iwoye. ₃₀Israel lhayis, aelh tefwajpejni okalelhthila mälhyet lechumyaj tä iwoye. Olham tä ohäpe Awuk Dios olhämet täja. Woyay ahusey iyhäja, leyayej akeyis tä ni'isahen tä lewoyaye, häpkhilek nitmena amejen chik lenofwej. ₃₁Atontehlä nilhokej akeyis tä ni'isa tä lewoyaye tä letatayay n'ohlä. Nech'aynhi ahusey lhäy'e atichunhayajay. Israel lhayis, ¿chipte tä let'uhläk let'inhen ₃₂tä olham n'am t'uhläk let'inhen? Woyay ahusey iyhäja, leyayej akeyis tä ni'isahen häpkhilek kat'ilahen. Olham tä ohäpe Awuk Dios olhämet täja.”