Õ'tech'aynej Egipto laka niyat häp pänhichetek tä wujche
1Häp nekchäm tä once tä olhamel oihi Babilonia tä häpe honhat tä ka'ow'eta, wet iwel'a tä tres, wet häp ifwala tä ichunpe iwel'a, häp tä Lhawuk tahuy n'oyej wet yok:
2–Hin'o, is chik lefwenho Egipto kaniyat lhäy'e nilhokej häp laka wichi wet lhok, “Dios lhämet yok,
“¿Atsi m'ak chik otech'aynej awujyaj tä i'amej?
3Atet iwoye hal'ätaj
wok pänhichetek tä ihi Líbano,
tä lhachal isis wet wusche'pey,
wet lehupel tä is hip'o'pe tayhi.
Wet tä matche tä atojphä,
wet pules tä wey'ähen tajlhi häp lepesey.
4Häp pelhay lhäy'e inät tä tälho honhat,
häp tä ichihelit, lhayen tewoka
tä ilunejlhi honhat lhip tä ihi.
Wet tä wuj inät tä iläfwelchehen,
wet häp tä nilhokej hal'äy
tä ihi honhattso lhamel isej.
5Wet tä wuj inät tä nitsäche hal'ätso letes,
wet inu'pe hal'äy iyhäj tä ihi tayhi tä lhaichihelit,
wet lhachal t'aylhachetshi t'at tä wujpey.
6Wet nilhokej häp afwenchey tä w'enhache lhamejen
tä lhamel iwo lhupisahi,
wet äpte nilhokej itshätäy tä w'enhache lhamejen
tä takapuhtshanhenchufwi,
wet nilhokej wichi tä i'pe honhat
tä iwo w'etachufwi lehupel.
7Matche tä isilataj häp hal'ätso tä wujchey,
wet lhachal yik t'at tä lhaichihelit,
tsi häp tä lefwettsil ihi t'at inät tä tsaji.
8Häp pänhichetek tä ihihte Edén tä oka yachuyajw'et,
niwohit elh chik te iwoye hal'ätso tä wujchey.
Ihichet'a hal'ä chik häpe
chik lhachal te iwoye, lhäy'e lew'oley.
Wet matche tä hal'äy tä ihihte Edén tä oka yachuyajw'et
tä newache elh chik w'awulhi tä matche tä isilataj.
9Olham tä oyämte isilataj,
wet lhäy'e häp lhachal tä wujpey,
wet hal'äy iyhäj tä ihi Edén tä oka yachuyajw'et
lhamel matche tä y'äytene.
10“Häp tä tamenej tä Lhawuk Dios yämlhi wet yok, Häp hal'ä tä lhayäm atojphä wet pules tä wey'ähen tajlhi häp lepesey, wet lhaichäjejlhi tä matche tä atojphä tä lhaichihelit. 11Häp tä tamenej tä olham oy'ulhan wet oyachaje häp niyat tä wujpey honhatil tä lewuk, häpkhilek iwoyeje t'at m'ak tä mälhyej lakey tä ni'isa tä iwoye. 12Wet wichi tä tälhe iyhäj honhatil tä matche tä lajit lep'altsenyaja, häp tä lhamel yisthila wet yikhilach'oye, iwomlat katsi. Wet lhachal tä wasiche w'et lhahilatpe tachenhas lhäy'e lakawayhil, wet lhäy'e häp tewok lhayis tä ihi imälhewek honhat. Wet nilhokhiyeja häp wichil tä yen lew'eta lehupel tä lhamel yikhilach'oye wet iwomla. 13Wet nilhokhiyeja afwenchey tä w'enhache lhamejen tä lhamel yenla lelakata hal'ä tä imä katsi, wet lhäy'ehila nilhokej häp itshätäy tä w'enhache lhamejen tä yenla lemäweta lhachal tä ikatsi. 14Nilhokej hal'äy tä iwhäye inät tehit'ala iwoye tä atojphä, wet nemla pules tä wey'ähen tajlhi lepesey, tejlak ihi inät thayej. Tsi häp tä y'inhen t'at tä ilech'oye honhat, wet nech'e tan'isej häp wichi tä pajche y'inhen tä ihonhat lech'oye.
15“Häp olham tä ohäpe Dios tä matche oyok, Chik hal'äna nichäthiyela n'op'itseyhay lew'et, wet ow'enhihola lefwitajayajay inät tä ihi lewomekitaj tä pitoj, y'imhila. Äp tek owahnhichetshila tewok lhayis lhäy'e nilhokej häp inät lhayis tä iläfwelchehen. Wet tachenhas tä Líbano wujla lefwitajayaj chik iyeji, wet nilhokhiyeja häp hal'äy tä ihi tayhi tä lew'oley y'inhila. 16Othathiyela n'op'itseyhay lew'et häp hal'ätso, otan'isthiyeja wichi tä pajche y'inhen tä ihonhat lech'oye. Wet istunla nilhokej wichi tä i'pe honhat chik lhamel iläte lepak tä tehla iwoye pelhay tä t'ajan chik nichäthiyela n'op'itseyhay lew'et, wet lhamel tachetteyhiyejchehena lenowayhyajay. Wet nilhokej häp hal'äy tä tälhe Edén tä pajche iho honhat lech'oye, lhamel akäjiyejlhila chik hiw'en hal'ätso lewit'äyhyaj. Wet nilhokej hal'äymhaj isis tä lew'et Líbano tä õ'tsächehenpej inät, lhamel äpte akäjiyejlhila tä ihonhat lech'oye chik hiw'en hal'ätso lewit'äyhyaj. 17Nilhokej lhamel tä pajchehte nichäte honhat tä n'op'itseyhay lew'et, lhamel hap'akej häp wichi tä pajche y'inhen tä ihi n'oka'tshayajay. Wet hal'ätso tä lhaichäjlhi tan'isej t'at, wet wichi tä ihipmhaji lehupel lhamel w'et ifwtsatpehen honhatil wet lhayej t'at iyhäj wichi tä w'enha lhamejen. 18Wet matche tä newache hal'äy tä ihihte Edén chik te iwoye häp hal'ätso tä wujchey wet isilataj wet äp atojphä. Mat lham tan'isiyeja t'at hal'äy iyhäjtso tä lhamel tiyäj honhat lech'oye. Wet nech'e hap'akhiyeja t'at häp wichi tä kahäpeya oka wichi tä y'inhente tä ihi n'oka'tshayajay.
“Häp hal'ätso häpe Egipto kaniyat lhäy'e nilhokej laka wichi. Olham tä ohäpe Dios tä matche olhämet täja.”
