Dios äp yachajo tä yen lewoya Ezequiel tä iwo siläta Israel lhayis tä lewit'äy ihihila häp lhamel tä iwoye m'ak tä ni'isa
1Häp Lhawuk tahuy n'oyej wet yok:
2–Hin'o, is chik lhämhoplhi aiyhäj tä haw'etfwas wet lhok, “Häp täja häp Lhawuk lhämet tä t'uhläk ofwel amhohen wet yok, Chik olham ot'äne wichi tä tälhe honhat chik häpe, wet ochene honhat elh häpkhilek tatayhlä, wet wichi tä lew'et honhattso wet lhamel itshupyene elh häp lhamel häpkhilek yen silätwoya. 3Wet chik silätwotso hiw'enlä häp nifwotas tä lhamel letayhfwas tä atott'a chik nämhen, wet yafwutche lefwol tä tson'ataj ch'u, tsi häp tä iwo siläta wichi häpkhilek lhamel lhayäm hin'olwethä. 4Wet chik iche hin'o chik iläte tson'ataj ch'u tä õyafwutche, wet chik nitch'ahuyaye, wet chik letayhfwas nämhen wet ilän, wet lham tä tamen lhamej. 5Tsi tej tä iläte t'at n'ofwol tä õyafwutche, tha tach'ahuhiyet'a, wet häp tä lham t'at tä tamen lhamej. Mat chik lham tach'ahuye silätwotso, lajit lewit'äyhyaja.
6“Tha mat chik silätwo hiw'enlä häp nifwotas tä lhamel letayhfwas, wet nafwutache tson'ataj ch'u, iwohit'a siläta wichi, wet chik nämhen letayhfwas wet ilän hin'o chik häpe, nech'e hin'otso y'inhila t'at tä ihi lech'isukyaj, mat silätwo tä tamenej tä y'il, wet lham tä oyenla tesayej elh lewit'äyhyaj.
7“Häp am, hin'o, oayen lewoya tä lewopej siläta Israel lhayis chik iche lewit'äyhyaj chik nämhiyela lhamel. Olhämetpej tä ofwel amho häp tä lefwenhihopeja lhamel, häpkhilek ihanejpej m'ak tä ot'uhläk owoyeje lhamel. 8Etp'i iche hin'o tä ni'isa wet olham oyok, Y'inhila häp hin'otso. Wet chik am kafwelaho letes wet newache ämet tä lhok, Leche akeyis, oyok, hin'otso y'inhila t'at tä ihi lech'isukyaj. Mat amla t'at chik oayen tesayej tä älhyej niwoya chowej elha, häp tä kafwelaho olhämtes.
9“Tha mat chik lewo silätayej olhämtes häp elh tä ni'isa, wet nileyache lakeyis, häp hin'otso y'inhila t'at tä ihi lech'isukyaj. Mat am oayenhit'ala tesayej, tsi häp lham tä nitch'ahuya ame tä lefwenho olhämtes.
Hin'o ikathiyeja laha m'ak tä iwoye, chik is wok ni'isa
10“Hin'o, is chik lhämhoplhi häp Israel lhayis wet lhok, Häp täja häp Lhawuk lhämet tä t'uhläk ofwel amhohen wet yok, Amel lhoyaykwe, Olhamel nemhit owoye Dios lhämtes wet matche tä owo och'isukyaja, ikänchi n'ohen okeyis. ¿Chi iwoyek n'am t'inhihena?
11“Mat olham tä ohäpe Awuk Dios tä n'ilataj, matche olhämet tä oyok, Ohuminhit'a chik y'il hin'o tä ni'isa lakey tä iwoye, mat ohuminche chik iwo elha lakey wet iwoye m'ak tä is häpkhilek n'ila. Wet oyok, ¡Israel lhayis, leyache akeyis tä ni'isahen, leyache! ¿Chi iwoyek let'inhen?
12“Hin'o, fwenho aiyhäj tä haw'etfwas, tä chik hin'o tä lechowej ihi iwo lech'isukyaja, nemhit oyenla tichunhayaja ifwalas tä is m'ak tä iwoye, wet akalelhäj tä nemhit lefwayhyaj ihi. Wet chik hin'o tä n'och'isukyaj kwenek ileche lakey tä ni'isa, nemhit oyenla tichunhayaja lech'isukyajay. Mat häp hin'o tä lechowej ihi, chik iwo lech'isukyaja nemhit oyenla tichunhayaja lakeyis tä isen häp ifwalas tä pajche tä iwoye, wet matche tä y'inhila t'at.
13“Chik ofwenho hin'o tä lechowej ihi wet oyok, Let'inhit'ala, wet chik lham t'ekhaye t'at tä akalelhäj tä lefwayhyaj ihi tsi häp tä pajche tä iwoye t'at lechumtes tä isen, wet chik iwo lech'isukyaja, olham nemhit oyenla tichunhayaja lechumtes tä isen tä pajche tä iwoye. Y'inhila t'at, tsi häp tä iwo lech'isukyaja.
14-15“Wet chik ofwenho hin'o tä ni'isa wet oyok, Let'inla t'at, wet chik ileche lakey tä ni'isa tä iwoye wet iwoye m'ak tä is, akalelhäj tä y'inhit'ala. Wet chik yachaje elh len'äyek tä hin'äype letes, wok yachaje lewuk t'etanhat, wet iwoye olhämtes tä hiw'enho hin'o häp lew'atshancheyaj, wet matche tä ileche nilhokej häp lakeyis tä ni'isahen, akalelhäj tä y'inhit'ala. 16Wet nemhit oyenla tichunhayaja elhaj häp lakeyis tä ni'isa. Tsi tä matche tä lham ileche nilhokej lakeyistso wet iwoye m'ak tä is, akalelhäj tä y'inhit'ala.
17“Etp'i wichi tä haw'etfwas lhamel yok, Matche tä ni'isa alhoho m'ak tä Lhawuk iwoye. Mat olham oyok, Lhamel tä ni'isa alhoho m'ak tä iwoye. 18Chik hin'o tä is ileche lakey tä is tä iwoye wet nech'e iwoye m'ak tä ni'isa, lham y'inhila t'at, häp lakeyis tä ni'isa tä tamenej. 19Wet chik hin'o tä ni'isa ileche lakey tä ni'isa tä iwoye wet iwoye m'ak tä is, kamaj iläyhla t'at, y'inhit'ala.
20“Mat amel lhoyaypejkwe, Matche tä ni'isa alhoho m'ak tä Lhawuk iwoye. Wet häp tä tamenej tä olham okalelhthila amejen häp owäkw, amel tä ahäpehen Israel lhayis. Aelh weihalhapej otasnhila, mälhyej lech'isukyajpej tä iwoye.”
Õ'fwenho Ezequiel tä Jerusalén letayhfwas ikalhi
21Häp nekchäm tä doce tä olhamel oihi Babilonia tä häpe honhat tä ka'ow'eta, wet iwel'a tä diez, wet ifwala tä cinco, wet hin'o tä lhayämet tä õ'nuye Jerusalén, näm n'oye wet ifwel n'oho tä tatäy Jerusalén, letayhfwas ikalhi. 22Häp honatsi elhnaj kamaj ninäma hin'otso tä ilethanlä letayhfwas, wet Lhawuk iti n'o'pe takwey. Wet häp tä nech'e fwala tä näm häp hin'otso, Lhawuk inachaj n'oye olhämet wet nech'e oyämlhi.
Tej tä tatäy Jerusalén, mat wichi tä imälhehi iwohit'a lehusey iyhäja
23Häp Lhawuk tahuy n'oyej wet yok:
24–Hin'o, häp wichi tä ihi honhat tä Israel lhayis laka honhates tä pajche letayhfwas iwasthiche, lhamel yämpejwethä wet yok, “Häp Abraham wet tefwajp'antetni, wet kamaj lham t'at tä lhayen lewuka honhatna. Mat häp n'amel tä n'awujpey akalelhäj tä n'alewuhuy.”
25“Hin'o, is chik am lefwenho lhamel wet lhok, Häp täja häp Lhawuk Dios lhämet tä t'uhläk ofwel amhohen tä yok, Amel letufw itshäwet t'isan tä lew'oyis ihi. Äpte len'okwiyej acheyälis wet alhen anikoyisa, lelänhen iyhäj. ¿Wet hä lefwetaj alewuhuyla honhat? 26Wet äp amel let'ekhaye afwajnhates tä aka'tshayajchal, wet lewoye akeyis tä matche tä olham oy'ulhan, wet elh weihalhapej iwo lakain'oyajayej elh ch'efwa. ¿Wet hä lefwetaj alewuhuyla honhat?”
27Lhawuk yok:
–Is chik lefwenho olhämet häp lhamel wet lhok, “Häp Dios tä n'ilataj yok, Häp wichi tä ihiche honhates tä pajche letayhfwas ikänchi, õ'länhihena. Wet iyhäj tä lew'etes ichehen'attso, häp tä itshätäy tä fwitses tufwihena. Wet iyhäj tä yen lewukweya chowhay tä ihiche tachenhas, häp tä ochenhiyela äytes häpkhilek ilänhen lhamel. 28Oyenla ts'aniya honhat wet ohämthila häp lakhajyhayaj tä lhaichäjejlhi. Wet tachenhas tä ihi Israel nech'e ts'anisla t'at, wet nemhit ihichela hin'o chik nekhichela. 29Chik olham oyenla ts'aniya honhat häp tä lhamel iwoye lakeyis tä matche tä ni'isa tä olham oy'ulhan, wet häp tä nech'e lhamel ihanhiyeja tä olham tä ohäpe Lewuk Dios.”
Wichi iläte Ezequiel lhämtes mat tach'ahuhiyet'a
30“Häp am, hin'o, häp wichi tä haw'etfwas lhamel yämlhi amej tä lhamel iyej n'olafwek tä tuntey lhäy'e häp hupuy lepelis. Wet lhamel elhpej t'äne elh wet yok, Yaiyhäj, lhuyay n'atch'ahuch'oye Lhawuk lhämet. Iche p'iya häp lhämet tä t'uhläk ifwel n'amhohen.
31“Wet häp tä oka wichi näm ame, tet iwoye m'ak tä lakey wichi, wet tatachephä, ihi tä letatache. Wet lhamel w'et iläte t'at ämtes tä lefwenho lhamel, iwohiyet'a. Lhamel matche ihuminchehen t'at ämtes tä lefwenho lhamel, mat ihanhiyejt'a iwoyneja chik iwoye, tsi häp tä ts'ilak t'at chinaj t'äj tä lhamel yen tichunhayaja chik lhäy'epej lhip chik hiw'en. 32Lhamel itech'ayen amej hin'o tä itenhen n'otenkay tä n'ohumnhayaj tenkay, tä is lepänhi wet äp ihanej tä y'aji arpa. Lhamel w'et iläte t'at ämtes tä lefwenho lhamel, iwohiyet'a. 33Mat ämtestso tä mathichela, wet chik lhaimatthichela, wet nech'e lhamel ihanhiyeja tä matchep'a tä profeta tä iyej lhamel.”
