Ezeq 46

₁“Olham tä ohäpe Awuk Dios oyok, Häp lepe tä ihi tä ifwala inuhiphä tä tumejlä Owukwe ka'alho tä ilech'oye hup, iwohiyet'ak õknip'oyahi pajla'tha seis ifwalas tä lakey t'at tä wichi tachumwethä. Wet chik nichätepej ifwala tä n'ot'elakw'et, lhäy'e tä nichätepej tä iwel'a nech'ayek, häp tä nech'e is chik õ'fwoyenche. ₂Wet häp tä Israel lhayis laka niyat tälhihola Owukwe ka'alho, wet tiyäjichela lepe häp hup lech'o elh tä tsajo tä tumejlä Owukwe lepe, wet häp tä lham takasthihila t'at tä lepe ch'utey yiwithi. Wet sacerdotes nech'e iwunhihomchela itshätäy tä niyat ihän n'oye tä yen otw'ayhata, lhäy'e iyhäj tä õkniwunahomche tä niyat hiw'en n'oho häp tä lha'isyen n'oye. Wet häp tä niyat t'upeyhilahchä tä n'okwihla n'oyej tä ihi lepe, pajla'tha letacho tiji honhat. Wet chik ilehiyeja chik t'upeyhchä, wet häp tä inuhiphäla, mat lepetso wet nemhit õhp'ohi pajla'tha honaj. ₃Wet häp ifwalas tä n'ot'elakw'etes, lhäy'e tä iwel'a nech'ayekpej, häp tä wichi n'okwihla n'oyej tä ihihila tä lepetso tatache.

₄“Häp itshätäy tä niyat yachajila n'oye häp ifwalapej tä n'ot'elakw'et häpkhilek õ'wunhomche, is chik seis tson'ataj les wet tefwaji tson'ataj tä hin'o, wet nilhokej tä häpe itshätäy tä isis tä newache m'ak chik iyejen. ₅Häp otw'ayhtes tä is chik iwoye, tson'ataj tefwaji is chik hip'ajtejpej diez kilos yachuyaj lhoy, wet tson'ataj les häp tä itetshan t'at häp m'ak tä ikalhi tä hip'ajtej. Wet diez kilos yachuyaj lhoytso, is chik itsäyepej tres litros y medio aceite. ₆Wet chik nichätepej iwel'a nech'ayek, wet is chik hiw'en n'oho tolo lhäs tä õ'län, wet seis tson'ataj les tä õ'länhen, wet tefwaji tson'ataj tä hin'o tä õ'län. Wet is chik häpehen häp itshätäy tä isis tä newache m'ak chik iyejen. ₇Wet häp tolo lhäs tefwaji, is chik hip'ajtejpej diez kilos yachuyaj lhoy, wet häp tson'atajpej tä hin'o kamaj äp tet iwoye. Wet tson'ataj les häp tä itetshan t'at m'ak tä ikalhi tä hip'ajtej. Wet diez kilos yachuyaj lhoytso, is chik itsäyepej tres litros y medio aceite.

₈“Chik niyat tiyäjchufwi Owukwe, is chik inukwe t'at lepe häp hup lech'o elh tä tsajo tä tumejlä Owukwe lepe, wet äp kamaj tälhihola t'at chik inuphä. ₉Wet chik wichi iwo lakäjyaja tä n'okwi n'oyej, häp täja häp m'ak tä is chik iwoye: Häp lhamel tä tiyäjchufwi Owukwe tä tiyäjche lepe tä tumej tafwojyhiye, chik inukwephä is chik lhamel tälhche lepe elh tä tumej tapinhiye. Wet wichi iyhäj tä tälhche lepe tä tapinhiye tä ihochufwi Owukwe, wet chik lhamel inukwephä is chik tälhche lepe elh tä tumej tafwojyhiye. Isit'a chik kamaj tapilche t'at häp lepe tä tälhche tä tiyäjchufwi Owukwe. Is chik tälhche lhip elhe tä inukwephä. ₁₀Wet häp niyat chik ihochufwi Owukwe, is chik yikche t'at wichi tä ihochufwi. Wet chik wichi inukwephä, is chik äp yikche t'at häp lhamel. ₁₁Nilhokej n'okäjyajay tä w'enhache lhamejen, häp tolo lhäs tefwaji tä pumfwetaj is chik õhp'ajtejpej diez kilos yachuyaj lhoy, wet häp tson'atajpej tä hin'o kamaj äp tet iwoye. Wet tson'ataj les häp tä hin'o itetshan t'at häp m'ak tä ikalhi tä hip'ajtej. Wet diez kilos yachuyaj lhoytso, is chik õ'tsäyepej tres litros y medio aceite.

₁₂“Wet chik niyat lham t'at tä letichunhayaj tä iwo otw'ayhata, tä häpe itshäwet tä õ'wunho wok häp itshäwet tä õ'län häpkhilek lha'isyen n'oye, wet häp tä õ'fwoynhichela lepe tä tumej lhip tä ifwala inuhiphä, wet häp tä nech'e yachajila n'oye otw'ayhat. Is chik iten t'at m'ak tä iwoyepej tä nichätepej ifwala tä n'ot'elakw'et. Wet chik ileyej, wet chik inuphä tä tälhchufwi Owukwe, is chik õhp'ohi lepe.

₁₃“Wet nilhokej ifwalas tä nech'e ifwalapej is chik õ'län häp tson'ataj lhäs tä hiw'en tefwaji nekchäm, tä isilataj tä newache m'ak chik iyej. Wet is chik õ'wunho wet õyen otw'ayhata. Ifwalapej is chik õ'woynejatso. ₁₄Wet äpte is chik nilhokej ifwalas tä nech'e ifwalapej tä õyen otw'ayhata harina, is chik ihi tres kilos y medio, wet un litro aceite tä õ'tsäye. Wet lajit lepesa tä amel lewoyepej täja. ₁₅Nilhokej ifwalas tä nech'e ifwalapej iwohiyet'ak ka'achaja n'oye tson'ataj lhäs tä õ'wunho, lhäy'e harina, wet lhäy'e aceite.

₁₆“Olham tä ohäpe Awuk Dios oyok, Chik Israel lhayis kaniyat yen t'awayhata lhäs häp honhat tä lham t'at tä laka honhat, wet matche tä lewukla t'at häp lhäs, pajla'tha y'aje leles tä lepes lheley. ₁₇Wet mat chik niyat yen t'awayhata lakawo häp honhat tä lham t'at tä lewuk, wet lewuklat ayej pajla'tha nichäte nekchäm tä õyachajehen lewuhuy häp honhates tä lhamel tä laka honhates. Häp tä nemhit lewukla honhat, yachajo tä lewuk niyat, tsi häp tä lham tä laka honhat wet lewukla leles.

₁₈“Niyat iwohiyet'ak iso häp honhat tä lewuk ihi, tsi häp tä laka honhathit'a. Häp honhat chik hiw'enho leles, is chik häpe t'at häp honhat tä lham tä laka honhat, häpkhilek nilhokej oka wichi tä laka honhat ihi wet häp tä yikhihent'ala.”

₁₉Tä tajyäme täja, wet hin'o tä ipäyen n'oye Lhawuk Lewukwe inekhat n'okwe n'äyij tä tälhe hup lech'ol tä tumej tafwojyhiye lepe, tä häpe lech'ol tä õyen t'amajchetayej sacerdotes. Wet hin'otso ipäyen n'oye lhip tä ilech'oye tä tumej lhip tä ifwala y'uyhi. ₂₀Wet tahuy n'oyej tä yok:

–Häp lhip tä lew'enna häp lhip tä sacerdotes ipenla itshäwet tä õyen n'otw'ayhata t'isanis tä hin'o tiskanejpe letes tä ihi wok lech'isukyaj chik häpe tä iwoye, wet lhamel hip'ohihena häp yachuyaj lhay tä häpe lhoy tä häpehen Lhawuk t'awayhtes. Häpkhilek nemhit iwatläk ihäne Lhawuk Lewukwe ka'alho häp n'otw'ayhtesna, wet wichi nemhit atott'aho m'ayhay tä n'ot'amajchetesna.

_21-22Wet tä tajyäme tä tahuy n'oyej hin'otso, wet ihän n'oye hup ka'alho pajtha onchäte letselhäs tä ihi cuatro. Wet häp tä ow'en tä elh tefwaji letselhästso iche laka alho lhäsaj tä hiw'enpej veinte metros tä pitaj wet quince metros tä tsajo. ₂₃Wet elh tefwajpeji iche lelafwek tä tuntey tä ilunejlhi, wet tä honhatepej wet iche itäjw'etes tä ichufwi. ₂₄Wet häp tä tahuy n'oyej hin'otso wet yok:

–Letselhäs laka alhosna häp tä wichi tä tach'ote Lhawuk Lewukwe ihihila tä ipen itshätäy tä wichi yachaje Lhawuk.