Ezeq 47

₁Wet häp hin'otso yachajo tä ihän n'oye Lhawuk Lewukwe lepe tä lhamya. Wet ow'en tä inät tälhchufwi lepe wet iläfwelche tä tataye lhip tä tumej tä ifwala inuhiphä, tsi lepetso häp tä tumej. Wet inättso iläfwelche tä tumej t'at häp hup lhip tä lefwomkat, wet nek lhipche altar lhip tä tumej tapinhiye. ₂Wet hin'otso yikhat n'och'oye häp hup lepe tä tumej tafwojyhiye, wet häp tä ihän n'oye lhip tä alhoye pajtha onchäte lepe tä i'alhoye tä tumej lhip tä ifwala inuhiphä. Wet häp tä ow'en inät tä inuphä tä tumej hup lepe lhip tä tapinhiye.

₃Wet hin'otso yik wet tataye lhip tä ifwala inuhiphä, wet ichäjlhi niyäkw tä lakaw'awlhanhatcha. Wet iwo mediya quinientos metros häp honhat, wet häp tä nech'e yisthayin n'oho inät tä iläfwelche. Wet inät tä oyisthotso ihi ofwonlis. ₄Wet nech'e äp yachajo tä iwo mediya quinientos metros häp honhat, wet äp yisthayin n'oho inät tä iläfwelche. Wet tä oyistho inättso, wet nech'e ihi okamchetey. Wet nech'e äp yachajo tä iwo mediya quinientos metros häp honhat, wet äp yisthayin n'oho inät tä iläfwelche. Wet inät tä oyisthotso nech'e ihi okawakw'et. ₅Wet nech'e äp yachajo tä iwo mediya quinientos metros häp honhat, wet inät nech'e häpe häp tewok. Wet häp tä nemhit okalhi chik oyistho tsi häp tä nech'e pitoj. Tsi chik oyistho, wet tajlhamat chik otlinho. ₆Wet häp tä hin'otso nech'e tahuy n'oyej tä yok:

–Hin'o, is chik lhäm matche tä leyahin häp m'ak tä lew'en.

Wet tä tajyäme täja, wet nech'e inachajn'o tumeja. ₇Wet tä onukwe tewok lhip, wet ow'en tä wuj hal'äy tä tälhche lhip tä tumeja wet lhäy'e häp lhip tä tumej ufwey. ₈Wet hin'otso tahuy n'oyej tä yok:

–Häp inät tä iläfwelchena tä tataye lhip tä ifwala inuhiphä, wet pajtha nichäte honhat tä ifwache tewok Jordán, wet häp tä nech'e nitsäyhiyela Lewomekitaj Nosoy. Wet tä nitsäye lewomekitajtso, wet inät tä ihi nemla nosoy, nech'e hak'onekhila. ₉Häp inät tä iläfwelchena, lhip at chik häpe tä nichäte, hiw'enhihola lew'atshancheyaj nilhokej itshätäy tä w'enhache lhamej, wet w'ahat lhayis pajla'tha wujpey tä ihi inät. Häp tewokna, häp inät tä iläfwelche tä nekche yenla hak'oneka inät tä tapay, wet häp tä nilhokhiyeja m'ak tä lew'atshancheyaj ihi tä lew'atshancheyaj tälhiyela. ₁₀Tälhiyela honhat tä lhey Kayla Kahits'ifwik pajla'tha nichäte W'asetaj Les Kahits'ifwik, wet wujla wichi tä t'iwokoyhen tä iche, wet wujla lewotey tä hich'enhen. Wet wujla w'ahat tä w'enhahiche tä ihichela, tehlat iwoye lewomekitaj tä Mediterráneo. ₁₁Mat inät tä ihiche fwehay lhäy'e lewomhay hak'onekhit'ala, tajlhama tä nosoy, häpkhilek wichi yen laka nisoya. ₁₂Wet nilhokhiyeja häp hal'äy tä w'enhache lhamej tä ihanej tä iwo lhaya, häp tä tälhichela tewok lhipey. Wet lew'oley tek natla, wet ihanhiyejt'ala chik niwohiyala lhaya. Iwel'apej iwohlat lhaya, tsi häp tä inät tä tälhchufwi Lhawuk Lewukwe tä iläfwelchena, häp tä ipumyen honhat tä hal'äy tälhchena. Wet lhay häp tä wichi lhäkhila, wet lew'oley häp tä wichi yenla lakachaya.

₁₃Lhawuk Dios yok:

–Häp täja lepesey häp honhat tä lewukla Israel lhayis tä tälhehen letetsel tä ihi doce, pajla'tha nichäte leles tä lepes lheley. Wet häp iyhäj tä tälhe letes José, täkwfwas honhat lhipey tä ow'enhatej. ₁₄Olham otiyejphähte otkwey olhämet tä ot'untejche amel atetsel tä ofwenhomche lhamel tä ow'enhihomchela häp honhatna. Athana is chik amel lew'awlhatchä häp lhipey tä lew'en amhomche. Alewuhuy t'at honhatna, pajla'tha y'aje ales tä lepes lheley.

₁₅“Häp täja honhatna lepesey tä tumej tafwojyhiye: Tälhiyela Lewomekitaj tä Mediterráneo, wet tiyäjiyela hupuy tä lhey Hetlón, Sedad, ₁₆Berota, lhäy'e häp Sibraim, pajla'tha nichäte Hasar-haticón. Sibraim ihi lechowej honhates tä Damasco lhäy'e Hamat. Wet Hasar-haticón häp tä ihi lepes honhat tä Haurán. ₁₇Häp tä mälhyejtso, häp honhatna lepes tä tumej tafwojyhiye tälhiyela lewomekitaj tä Mediterráneo wet pajla'tha nichäte honhat tä lhey Hasar-enán. Wet honhates tä Damasco lhäy'e Hamat tumej lhip tä tafwojyhiye.

₁₈“Nech'e häp honhat lepes tä tumej lhip tä ifwala inuhiphä, tälhiyela honhat lhip tä ihi lechowej häp Haurán lhäy'e Damasco, wet pajla'tha nichäte hupuy tä lhey Tamar tä iwhäye Lewomekitaj Nosoy. Wet línea nekhichela tewok Jordán tä õyen lepesa honhat tä Galaad lhäy'e honhat tä Israel.

₁₉“Nech'e häp honhat lepes tä tumej tapinhiye, línea tälhiyela Tamar wet tiyäjichela inätw'etes tä ihi Meriba-kadés, lhäy'e häp tewok tä tumejlä Egipto, wet pajla'tha nichäte lewomekitaj tä Mediterráneo.

₂₀“Wet lewomekitajtso tä tumej tä ifwala y'uyhi, häp tä õyenla honhat lepesa, wet tälhiyela honhat tä Egipto lepes pajla'tha äp nichäte lewomek lhip tä yiwithi tachenhas kawayhi tä ihi Hamat.

₂₁“Häp täja häp honhat tä is chik õhw'enhomche Israel lhayis tä tälhehen letetsel tä ihi doce. ₂₂Häp honhatna matche tä amel tä alewuhuy, lhäy'e ales, wet lhäy'e häp wichi tä i'amejen tä kahäpeya Israel tä lhamel iwo lelesa. Is chik amel letech'aynej chik häpe t'at Israel. Wet chik õhw'enhomche Israel lhayis tä tälhehen doce letetsel häp honhat lhipey, is chik te lhamel õhw'enho. ₂₃Häp Israel lhayispej tä wichitso iyej, is chik lhamel t'at tä hiw'enho lhiphaj honhat. Olham tä ohäpe Awuk Dios olhämet täja.