Samaria lheley fwetaj ikasthayen Israel lhayis lechumet
1Judá kawichi lhäy'e Benjamín kawichi, lhamel yäple Jerusalén tä tälhe honhat tä yen kwenkaya. Wet tä lhamel nämho Jerusalén, inech'aynhi tä yenlhi Lhawuk, häp Israel laka Dios, Lew'et. Mat tä letayhfwas ihanch'oye, 2ihoye Zorobabel lhäy'e hin'ol tä thänhäy, wet tahuyej tä yok:
–Olhamel ot'uhläk otch'ote hup tä lhenlhi. Tsi olhamel owunit amel aka Dios wet olänhenpej itshätäy tä oyen n'okhayajayej, tälhe ifwalas p'ante Asiria laka niyat tä lhey Esar-hadón ihän kana olhamel ochätilis.
3Matkat Zorobabel lhäy'e Josué, lhäy'e Israel lhayis tä thänhäy, lhamel nichulho wet yok:
–Olhamel tek owatläk letach'ote olhamel tä oyenlhi oka Dios Lew'et. Is chik ts'ilak t'at olhamel tä ohäpehen Israel lhayis tä onech'aynhi oka Dios Lew'et. Tsi Ciro, niyat tä ihi Persia, ne'tek häp täjtso m'ak tä olhamel owoye.
4Tä mälhyejtso, wichi tä ihi honhattso fwetaj iwo lenowayhyaja Judá kawichi yämthilek lhamel ileyej lechumet. 5Häte iwo lakahaya niyat leniyatfwas, wet lhamel ithahyen iyhäj lechumet nilhokej ifwalas tä Persia kaniyat häpe Ciro, pajtha nichäte ifwalas tä Darío häpe niyat.
Samaria lheley ichene laka carta rey Artajerjes
6Tä iwo tesa p'ante tä Asuero niyatej Persia, Samaria lheley ichene laka carta tä lhamel itiyej letes häp wichi tä ihi Judá lhäy'e wichi tä ihi Jerusalén.
7Wet ifwalas tä Artajerjes häpe niyat, wet hin'o tä lhey Bislam, lhäy'e Mitrídates, lhäy'e Tabeel, lhäy'e iyhäj, lhamel ichene laka carta häp Artajerjes. Itihi Arameo lhämet wet õ'wo traduciya Persia lhämet.
8Häte Rehúm, gobernador, lhäy'e lelesaynekwo tä lhey Simsay, häp lhameltso ichene laka carta häp Artajerjes tä lhamel itiyej letes wichi tä ihi Jerusalén. Wet lhämet yokwe:
9-11“Cartana tälhe t'at gobernador Rehúm, lhäy'e lelesaynekwo Simsay, lhäy'e iyhäj, lhäy'e n'okalelhthayajwos, lhäy'e iyhäj niyatey tä ihi Persia, lhäy'e leniyatfwas, lhäy'e lhamel tä ihi Erek, lhäy'e Babilonia, lhäy'e Susa, wok oyok, Elam, lhäy'e nilhokej wichi tä tälhomche laka honhates tä n'owujtaj Asnapar yen p'ante kwenkaya wet itihiche hupuy tä ihi Samaria lhäy'e lhipey iyhäj tä ihi honhat tä tumej tewokitaj Éufrates lhip elh.
“Niyat Artajerjes, olhamel tä akawos n'ohen tä tumej tewok lhip elh on'okwi amej.
12“Ochen ame olhämetna tä ahäpe olhamel oka niyat. Owo siläta ame tä Judío lhayis tä pajche tälhe aka honhat tä iho n'oyehen, tä lhamel nämho Jerusalén inech'aynhi hupuy tä ni'isa tä yen tayhfwasa wichi tä i'pe honhat. Wet lhamel ineyhatphä n'olafwek tä tuntey tä inech'aynhi, wet yenlhi lefwetes tä pajche wasi.
13“Ika niyat, ot'uhläk lehanej tä Judío lhayis, chik wak'alh tä lhamel ineyhatphä hupuy, wet äp wak'alhila n'olafwek tä lep'ot häp hupuy, lhamel tiskanhit'ala'pe impuestos wet nemla hiw'enho chinaj t'äj häp niyat. Wet chik mälhhiyejatso, tatäyhla chinaj t'äj tä ihi aka honhat. 14Wet tä ohäpehen akawos, ika niyat, tek ohuminche chik wichi iti amej leläkwyhanyaj. Häp tä tamenej tä olhamel owo siläta ame, 15wet is chik let'ukwe n'olesaynhay tä yäme m'ayhay tä ichun p'ante tä achätilis yen p'ante häpeya ley. Wet lew'enla m'ak tä olhamel ofwel amena tä matche t'at, tä hupuyna yen tayhfwasa wichi tä i'pe honhat wet iwit'äyen niyatey lhäy'e iyhäj honhates. Tsi ifwalas tä pajche, wichi tä lew'et hupuyna lhamel iwo ka'tshayajayej wichi tä i'pe honhat, wet häp tä tamenej tä õ'wasthi.
16“Tä mälhyejtso, häp tä owo siläta ame, ika niyat, chik wak'alhila tä õ'nech'aynhi hupuyna, wet äp wak'alhila n'olafwek tä lep'ot, chik mälhhiyejatso, wet honhat tä tumej tewokitaj Éufrates lhip elh nemla alewuk.”
Rey Artajerjes nichulho lhamel laka carta
17Tä mälhyejtso, rey Artajerjes nichulho lhamel laka carta, wet ichene lhämet wet yok:
“Ochene olhämetna gobernador Rehúm tä ihi Samaria tä ihi honhat tä tumej tewokitaj Éufrates lhip elh. Häte ochene lelesaynekwo Simsay lhäy'e leniyatfwas tä ihiche lhipey iyhäj honhattso. Nilhokej amel ochen amehen on'okhayajna.
18“Häp amel aka carta tä lechen n'oye, okawo iwo traduciya wet yahyen, wet ohanej m'ak tä amel lefwel n'oye. 19Tä mälhyejtso, one'tek õt'ukwe n'olesaynhay tä õt'amajej. Wet otetshan m'ak tä õ'lesayen p'ante, wet ow'en tä matche t'at m'ak tä lefwel n'oye. Ow'en tä Jerusalén tatayp'antehlä reyes wet iwo ka'tshayajayej. 20Wet iche p'ante reyes tä takhajayhen tä ihi, wet lhamel ikalhi p'ante honhat tä tumej tewokitaj Éufrates lhip elh. Wet wichi tä ihi honhattso lhamel tiskanpe impuestos wet hiw'enho chinaj t'äj häp lhamel tä ihi Jerusalén.
21“Tä mälhyejtso, ochen amehen olhämet, fwenho häp hin'ol tä yenlhi lechumet, one'tek lhamel ileyej lechumet. Is chik inihihlä olhämet chik ochene lhamel. Is chik ileyej tä inech'aynhi hupuy. 22Wet ofwel amehen, woyaye m'ak tä one'tek lewoyena, häpkhilek newache lewit'äyhyaj häp reyes tä ihi oniyatyaj.”
23Wet õyahyen Artajerjes lhämet tä ihi tä Rehúm, lhäy'e lelesaynekwo Simsay, lhäy'e leniyatfwas tatache. Tä lhamel iläte, yofwajkwet yikhen tä ihoye Jerusalén. Wet sip'äl yokwes Judío lhayis tä tachumwethä, ne'tek lhamel ileyej lechumet.
Judío lhayis yachajo lechumet tä inech'aynhi Dios Lew'et
24Häp wichi tä inech'aynhi tä yenlhi Dios Lew'et tä ihi Jerusalén, lhamel ileyej lechumet pajtha nekchäm weihalha tä Darío ihi leniyatyaj tä ihi Persia.
